Ontopolwa 95

Iiyilongomwa kombinga yehengano nosho wo kombinga yohole yokuhola aanona

JESUS naalongwa ye oye li mondjila okuya kuJerusalem ya ka kale pOpaasa yomo 33 E.N. Otaya taaguluka omulonga gwaJordan notaya yi nondjila ndjoka ye enda moshitopolwa shaPerea. Jesus okwa li nale iiwike yontumba muPerea, opo ihe okwa li i ithanwa kuJudea molwashoka kuume ke Lasarus okwa li te ehama. Manga Jesus a li muPerea, okwa li a popi nAafarisayi kombinga yehengo, nongashingeyi otaya popi ishewe oshinima osho tuu shoka.

Mokati kAafarisayi omwa li mu na omadhiladhilo ga yoolokathana kombinga yehengo. Moses okwa ti kutya omuntu ota vulu owala okuhenga po omukiintu gwe ‘molwasha shuuwinayi shoka a ninga.’ Yamwe oya dhiladhila kutya otashi ulike owala kokwaanuuyogoki. Ihe yalwe oya dhiladhila kutya “sha shuuwinayi” osha kwatela mo omayono omashona noonkondo. Onkee ano opo ya makele Jesus, Aafarisayi otaya pula taya ti: “Oshu uka tuu, omulumentu ta henge po omukiintu gwe omolwohapu kehe?” Oyi inekela kutya shaashoka Jesus ta popi otashi ke eta uudhigu pokati ke nAafarisayi mboka ye na etaloko lyi ili.

Jesus ota yamukula epulo ndyoka nuukeka inaa kankamena komadhiladhilo gopantu, ihe otu ulike elalakano lyopetameko lyondjokana. Ota pula ta ti: “Inamu lesha nani, Omushiti okwe ya shiti petameko omulumentu nomukiintu nokwa ti: Onkee ano omulumentu e na okuthiga po he nayina nokwiimangeleka komukiintu gwe, noyo mbaka yaali otaa ningi onyama yimwe? Osho ano kaye shi we yaali, aawe, onyama yimwe. Ano shono Kalunga e shi tula kumwe, shaa kuthwe kumwe komuntu.”

Jesus oku ulike kutya elalakano lyaKalunga lyopetameko olya li kutya ookuume kopandjokana ya kale kumwe, kutya yaaha hengathane. Aafarisayi otaya pula kutya ngele osho shi li ngawo: “Moses okwa lombwele shike ano okugandja oshishangwa shehengo noku mu henga po?”

“Moses okwe mú pitikile uukukutu wokoomwenyo dheni okuhenga po aakiintu yeni,” Jesus ta yamukula, “ihe kontsampo kasha li ngaaka.” Eeno, sho Kalunga a tula po omuthikampango gwoshili gwondjokana muEden, ina tya nando kutya otayi vulu okuteywa.

Ano Jesus okwa tsikile ta ti kAafarisayi: “Ihe ongame tandi mú lombwele: oongoka ta hengele po omukiintu gwe oshinima shilwe shaa shi oluhondelo [mOshigreka, por·neiʹa] e ta hokana gulwe, oye ta yono oondjokana; naangoka ta hokana po omuhengwa, oye ota hondele.” Kungeyi otu ulike kutya por·neiʹa, shoka shi li onyata yiipala yinyanyalitha, osho awike etompelo lya ziminwa ko kuKalunga lyehengathano.

Aalongwa mboka ye wete kutya ondjokana oyi na okukala uukumwe tau kalelele nehengo oli na okuningwa owala molwetompelo ndika, otayi inyengithwa ya tye: “Ngele okukala kwomulumentu nomukiintu gwe kwa tya ngeyi, nena okuhokana inaaku opala.” Kapu na omalimbililo kutya ngoka ta dhiladhila okuhokana, oku na okudhiladhila sha kwata miiti kombinga yuushili kutya ondjokana oyi na okukala tayi kalelele!

Jesus ota tsikile ta popi kombinga yokwaahokana nenge yokwaahokanwa. Okwa yelitha kutya aamati yamwe oya valwa aalutulwi noitaya vulu okuhokana molwashoka ihaya pendutha omahalo gopamilalo. Yalwe oya ningwa aalutulwi kaantu, molwashoka iilyo yawo yoluvalo oya lemanekwa nonyanya. Lwahugunina, yamwe ohaya thindile omahalo gokuhokana nogokunyanyukilwa omakwatathano gomomilalo pevi opo ya vule okwiigandja unene kiinima mbyoka yi na ekwatathano nUukwaniilwa womegulu. “Ngoka ta vulu [okukala inaa hokana nenge inaa hokanwa], ne shi ninge” (NW), Jesus osho ta hulitha ta ti.

Ngashingeyi aantu otaya tameke okweeta aanona yawo kuJesus. Ihe aalongwa otaya ganda aanona notaya kambadhala oku ya laleka, pwaahenomalimbililo, omolwashoka yo oya hala okugamena Jesus kaa mone uupyakadhi inaashi pumbiwa. Ihe Jesus ota ti: “Etheni uunona u ye kungame, ne inamu u kelela ko, oshoka [uukwaniilwa waKalunga owangaambuka]. Oshili otandi mú lombwele; oongoka ita taamba [uukwaniilwa waKalunga] ongokanona, ita yi mo [muwo].”—Yelekanitha KB.

Jesus ita gandja tuu mpaka iiyilongomwa iiwanawa! Ngele otwa hala okutaamba Uukwaniilwa waKalunga, otu na okuholela eifupipiko lyaanona nosho wo nkene haya vulu okulongwa nuupu. Ihe oshiholelwa shaJesus otashi yelitha wo nkene sha simana, unene tuu kaakuluntu, okutula po ethimbo okukala pamwe naanona yawo. Ngashingeyi Jesus otu ulukile aanona ohole ye moku ya papatela nomaako ge noku ya yambeka. Mateus 19:1-15; Deuteronomium 24:1; Lukas 16:18; Markus 10:1-16; Lukas 18:15-17.

▪ Omataloko geni ga yoolokathana Aafarisayi ye na shi na ko nasha nehengo, nongiini ano ya kambadhala okumakela Jesus?

▪ Jesus okwi inyenge ngiini konkambadhala yAafarisayi yoku mu makela, netompelo awike lini ta gandja li na ko nasha nehengo?

▪ Omolwashike aalongwa yaJesus ya ti kutya okuhokana inaku opala, na Jesus okwe ya ningile eetopo lini?

▪ Jesus okwe tu longo shike okupitila mokukala kwe naanona?