Ontopolwa 13

Ilonga sha momamakelo gaJesus

JESUS nziyanziya konima yokuninginithwa kwe, okwa falwa kombepo yaKalunga mombuga yaJudea. Oku na oshindji okudhiladhila, oshoka peninginitho lye ‘egulu olye egulukile’ opo a vule okudhimbulula iinima yomegulu. Dhoshili, oku na oshindji okutedhatedha.

Jesus ota kala mombuga omasiku 40 nosho wo omausiku 40 nethimbo ndyono ka li ta li nando osha. Opo nduno sho Jesus e niwe kondjala noonkondo, Ondiaboli otayi ya kuye oku mu makela, tayi ti: “Ongoye ngele Omuna gwaKalunga, lombwela ano omamanya ngaka, ga shituke iikwiila.” Ihe Jesus oku shi kutya osha puka okulongitha oonkondo dhe dhopashikumithalonga okumbilipaleka omahalo ge gopaumwene. Onkee ano ota tindi okumakelwa.

Ihe Ondiaboli itayi si uunye. Otayi kambadhala okuya kuye pamukalo gulwe. Otayi pula Jesus a nuke koshihoko shotempeli opo aayengeli yaKalunga ye mu hupithe. Ihe Jesus ina ya memakelo okuninga omaitalitha ga tya ngaaka. Jesus ota kutha mOmanyolo, tu ulike kutya osha puka okumakela Kalunga komukalo gwa tya ngaaka.

Memakelo etitatu, Ondiaboli otayi ulikile Jesus omaukwaniilwa agehe gomuuyuni pamukalo gwontumba gwopashikumithalonga e tayi ti: “Ayihe mbika otandi yi ku pe, ngele to [tsile ndje, OB-1986] oongolo noto galikana ndje.” Ihe natango Jesus ota tindi okugwila memakelo okuninga epuko, nota hogolola okukala omudhiginini muKalunga.

Tse otatu vulu okwiilonga sha momamakelo ngaka gaJesus. Pashiholelwa, go otagu ulike kutya Ondiaboli kayi shi owala uukwatya uuwinayi, ngaashi aantu yamwe haya ti, ihe oyo omuntu gwolela ihaa monika. Okumakelwa kwaJesus otaku ulike wo kutya omapangelo agehe gomuuyuni ogo eliko lyOndiaboli. Ongiini mbela okupewa po kwago Kristus kOndiaboli kwa li taku ka kala emakelo lyolela ngele go kage shi gayo shili?

Dhiladhila wo kwaashino: Ondiaboli oya ti kutya yo oya li ya hala okupa Jesus ondjambi ngele okwe yi galikana lumwe, noku mu pa nokuli omaukwaniilwa agehe gomuuyuni. Otashi vulika Ondiaboli tayi kambadhala oku tu makela komukalo gwa faathana, tashi vulika tayi tu tulile po oompito tadhi tu heke okumona eliko lyuuyuni, oonkondopangelo nenge ondondo. Ihe itashi ka kala tuu shopandunge ngele tatu landula oshiholelwa shaJesus mokukala aadhiginini muKalunga kutya nduno emakelo oli kale li thike peni! Mateus 3:16; 4:1-11; Markus 1:12, 13; Lukas 4:1-13.

▪ Osha yela kutya Jesus ota tedhatedha kombinga yiinima yini pethimbo lyokukala kwe omasiku 40 mombuga?

▪ Ondiaboli otayi kambadhala ngiini okumakela Jesus?

▪ Oshike tatu vulu okwiilonga momamakelo gaJesus?