Ontopolwa 87

Ilongekidhila onakuyiwa mokulongitha uunongo tau longo

JESUS opo owala a adhika a hokololele omangathithi gaantu ehokololo lyomumati a kanene mwa kwatelwa aalongwa ye, aateloni yaahe na uuyuuki nayalwe mboka ya tseyika kutya oyo aalunde, nosho wo aanongoraamata nAafarisayi. Ngashingeyi ota popi naalongwa ye note ya hokololele eudhi lyomulumentu omuyamba ngoka u uva ehokololo ewinayi li na ko nasha nomulangeli gwegumbo nenge elenga lye.

Jesus ota ti kutya omulumentu omuyamba oti ithana elenga lye note li lombwele kutya ote ke li laleka li ye. “Otandi ningi ngiini, omuwa gwandje nge ta kutha ndje epangelo?” elenga tali ipula. “Okupapula kandi vulu, nokuhehela nda si ohoni. Ondi shi shi shono tandi shi ningi, opo ya taambe ndje momagumbo gawo, nge tandi tidhwa mo muulenga.”

Elenga mbela otali dhiladhila okuninga po shike? Otali ithana mboka ya lila omuwa gwalyo oongunga. Otali ya pula tali ti: “Oongunga dhoye we dhi lile omuwa gwandje odhi thike peni?”

Gwotango ota yamukula: ‘Omagadhi goomono oolitela 2 200.’

‘Kutha omukanda gwoye gwoongunga, ka kuutumbe nou shangele mo nziyanziya 1 100,’ tali mu lombwele.

Otali pula omukwawo: ‘Ngoye, oongunga dhoye odhi thike peni?’

Ota ti: ‘Iilya oolitela 22 000.’

‘Kutha omukanda gwoye gwoongunga u shune, ngu u shangele mo 18 000.’

Elenga oli na uuthemba okushonopeka oongunga ndhoka dha lilwa omuwa gwalyo, oshoka olyo natango tali tonatele iinima yopaimaliwa yomuwa gwalyo. Mokushonopeka omiyalu, lyo otali ilikolele ookuume mboka nayo taya vulu oku ke li kwathela ngele lya kanitha iilonga yalyo.

Sho omuwa gwalyo tu uvu shoka sha ningwa po, otashi mu kumitha. Muushili wo wene, okwa “pandula elenga lyaa shi omuyuuki, molwashoka lya longitha uunongo tau longo.” (NW) Dhoshili, Jesus ota gwedha po ta ti: “Aana yuuyuni mbuka oye na oondunge mokukalathana kwawo ye vule aana yuuyelele.”

Ngashingeyi Jesus otu ulukile aalongwa ye shoka ye na okwiilonga mo note ya ladhipike ta ti: “Ilikoleleni neliko [lyaa li pauyuuki, NW] ookuume, olyo nge tali hulu po, opo ye mu taambe momagumbo gaaluhe.”

Jesus ita pandulile elenga okwaahenuuyuuki kwalyo, ihe uunongo tau longo walyo wokutala komeho. “Aana yuuyuni mbuka” olundji ohaya longitha iimaliwa yawo nenge ondondo yawo noondunge okwiilikolela ookuume mboka nayo taya vulu oku ke ya kwathela. Onkee ano aapiya yaKalunga, “aana yuuyelele,” oye na okulongitha wo iiniwe yawo yopanyama, ‘eliko lyawo lyaa li pauyuuki,’ komukalo gwopandunge opo yi imonene uuwanawa.

Ihe ngaashi Jesus ta ti, yo oye na okulongitha eliko ndika okwiilikolela ookuume mboka taya vulu oku ya “taamba momagumbo gaaluhe.” Kiilyo yoshigunda oshishona, omagumbo ngaka oge li megulu; ‘koonzi dhilwe,’ omEviparadisa. Molwashoka Jehova Kalunga nOmwana oyo ayeke taya vulu okutaambela aantu momahala ngaka, tse otu na okukala aalaadhi mokupanga uukuume nayo mokulongitha kehe “eliko lyaa li pauyuuki” ndyoka tu na opo tu humithe iinima yUukwaniilwa komeho. Opo nduno uuna eliko ndyoka lyopanyama tali pu po nenge tali hulu po, ngaashi tashi ka ningwa shili, onakuyiwa yetu yaaluhe otayi ka kala ya shilipalekwa.

Jesus ota tsikile ta ti kutya aantu mboka haya tonatele nokuli nuudhiginini iinima mbika yopanyama nenge iishona, otaya ka tonatela wo nuudhiginini iinima mbyoka ya simana noonkondo.

Ota gwedha ko ta ti: “Ano ngele ihamu kala aadhiginini melelo lyeliko [lyaa li pauyuuki, NW], olye te mú pe mbika yoshili [sha hala okutya, iinima yopambepo, nenge iinima yUukwaniilwa]? Nongele ihamu kala aadhiginini melelo lyiinima yaantu [iinima yUukwaniilwa mbyoka Kalunga i inekelela aapiya ye], olye te mú pe mbyoka yeni yene [ondjambi yomwenyo momagumbo gaaluhe]?”

Tse itatu vulu nando okukala aapiya yashili yaKalunga omanga pethimbo opo tuu mpono tu li aapika yeliko lyaa li pauyuuki, eliko lyopanyama, ngaashi Jesus ta hulitha ta ti: “Kaku na omukalele ta vulu okulongela aawa yaali, oshoka ha kala [nokutonda] gumwe nokuhola omukwawo, nenge ta hokwa [nguka] nota dhini omukwawo. Kamu vulu okulongela Kalunga [pamwe nemona, OB-1986].” Lukas 15:1, 2; 16:1-13; Johannes 10:16.

▪ Elenga meudhi lyaJesus otali ilikolele ngiini ookuume mboka nayo taya vulu oku ke li kwatha konima yethimbo?

▪ “Eliko lyaa li pauyuuki” oshike, nongiini tatu vulu okulikola nalyo ookuume?

▪ Oolye taya vulu oku tu taamba “momagumbo gaaluhe,” nomagumbo ngaka oshike?