Ontopolwa 21

Jesus mosinagoga shomoshilando shaandjawo

OSHA yela kutya muNasaret omu na euyagano molwenyanyu sho Jesus ta galukile kegumbo. Manga Jesus inaa ya a ka ninginithwe kuJohannes, pwa pita omvula yimwe, okwa li a tseyika e li omuhongi gwiipilangi. Ihe ngashingeyi okwa tseyika apuhe e li omulongi gwiikumithalonga. Aakalimo yopuyo oya hala noonkondo oku mu mona ta longo yimwe yomiikuthalonga mbika mokati kawo.

Etegameno lyawo otali nenepala sho Jesus, ngaashi i igilila, ta yi kosinagoga shopuyo. Pethimbo lyelongelokalunga, ota thikama a leshe, nota pewa oraamata ya gonywa yomuprofeti Jesaja. Oti itsu pehala tapu popi kombinga yaaNgoka a gwayekwa nombepo yaJehova, ehala ndyoka li li mOmbimbeli yetu nena montopolwa 61.

Konima yokulesha kombinga yankene Nguka te ku uvithila oonkwatwa emanguluko naaposi etonato nosho wo omumvo omutoye gwaJehova, Jesus oraamata ya gonywa ote yi shunitha komuyakuli e ta ka kuutumba. Omeho agehe otage mu tala nawa. Opo nduno ota popi, tashi vulika uule wethimbo lyontumba, ta yelitha ta ti: ‘Nena ndjika enyolo ndika lya gwanithwa ngaashi mu uvu.’

Aantu oya kuminwa “oohapu oombwanawa” (OB-1986) dhe e taya lombwelathana taya ti: “Nguka ke shi omuna gwaJosef?” Ihe Jesus mokutseya kutya oya hala ye mu mone ta longo iikumithalonga, ota tsikile ta ti: “Ngiika mwa hala okulombwela ndje eyele ndika: Omwaaludhi, ialudha mwene, shono twe shi uvu sha ningilwa muKapernaum, shi ninga muka moshilando shaandjeni wo.” Osha yela kutya aashiinda yaJesus yonale otaya dhiladhila kutya ealudho oli na okutameka pegumbo, li kwathele tango aantu yopuyo. Onkee ano oye wete Jesus e ya dhina.

Jesus mokutseya shoka taya dhiladhila, ota hokolola ondjokonona yimwe tayi opalele. MuIsrael omwa li mu na aaselekadhi oyendji pethimbo lyaElia, osho ta ti, ihe Elia ka li a tumwa okuya nando okugumwe gwomuyo. Pehala lyaashono okwa yi komuselekadhi kee shi Omwiisrael muSidon, hoka a longo oshikumithalonga tashi hupitha omwenyo. Nopethimbo lyaElisa, opwa li aanashilundu oyendji, ihe Elisa okwa yeleke owala Naeman gwokuSiria.

Mboka ye li moosinagoga, ya geyithwa komayelekanitho ngaka gopandjokonona kaage shi omawanawa ngoka taga tula pomutenya okwiihola kwawo nokwaaneitaalo, otaya thikama e taya tidha mo Jesus moshilando. Hoka, kolungenge lwondundu ndjoka Nasaret sha li sha tungilwa kuyo, otaya kambadhala oku mu undulila pevi. Ihe Jesus ote ya yi ontuku e ta yi inaa ningwa sha. Lukas 4:16-30; 1 Aakwaniilwa 17:8-16; 2 Aakwaniilwa 5:8-14.

▪ Omolwashike muNasaret mu na euyagano molwenyanyu?

▪ Aantu otaya dhiladhila shike kombinga yoshipopiwa shaJesus, ihe oshike tashi ya geyitha unene?

▪ Aantu otaya kambadhala okuningila Jesus shike?