Ontopolwa 7

Jesus naayanekelinyothi

AALUMENTU yontumba otaya zi kUuzilo. Oyo aayanekelinyothi—aantu mboka haya ti kutya ohaya vulu okufatulula oonyothi. Manga ya li koyaandjawo kUuzilo, oya mono onyothi ompe, noye yi landula ookilometa omathele sigo okuJerusalem.

Sho aayanekelinyothi taya thiki muJerusalem, otaya pula taya ti: “Omukwaniilwa gwAajuda a valwa ngashingeyi, oku li peni? Oshoka onyothi ye otwe yi mono kuuzilo notwe ya okwiinyongamena kuye.”

Sho Omukwaniilwa Herodes muJerusalem te shi uvu, ota geye noonkondo. Onkee ano ota gongele aasaseri aakuluntu note ya pula mpoka Kristus ta ka valelwa. Otaya yamukula ya kankamena kOmanyolo taya ti: “OmuBetlehem.” Herodes oti ithanitha aayanekelinyothi note ya lombwele ta ti: “Indeni ko ano ne mu ka konge shili okanona; nongele mwe ka mono, lombwelii ndje, nangame wo ndi ye, ndi inyongamene kuko.” Ihe muushili wo wene, Herodes okanona okwa hala e ka mone opo e ka dhipage!

Konima yokuya kwawo, otapu ningwa sha oshikumithi. Onyothi ndjoka ya monene sho ya li kUuzilo, otayi ya kwatele komeho. Osha yela kutya ndjika kayi shi onyothi yowala, ihe oya gandjwa owina opo yi ya kwatele komeho. Aayanekelinyothi otaye yi landula sigo tayi ka thikama naanaa kombanda yegumbo moka mu na Josef naMaria.

Sho aayanekelinyothi taya yi megumbo, otaya mono Maria nokanona, Jesus. Oyo ayehe otaye ki inyongamene. Notaya kutha moondjato dhawo omagano goshingoli, iitsinino nomirha. Opo nduno konima yethimbo sho ya hala okushuna ya ka hokololele Herodes mpoka okanona ke li, Kalunga ote ya londodha mondjodhi kaaye shi ninge. Onkee ano otaya shuna koshilongo shawo nondjila yilwe.

Oto dhiladhila mbela kutya olye a longekidha onyothi ndjoka ya kwatele komeho aayanekelinyothi? Dhimbulukwa, onyothi inayi ya fala shu ukilila kuJesus muBetlehem. Mepingathano naashika, oye ya fala kuJerusalem hoka ya mono Omukwaniilwa Herodes, ngoka a hala okudhipaga Jesus. Nokwa li e na oku shi ninga ando Kalunga ka katukile onkatu nokulondodha aayanekelinyothi kaaya lombwele Herodes mpoka Jesus e li. Osha li omutondi gwaKalunga, Satana Ondiaboli, ngoka a li a hala Jesus a dhipagwe, nokwa longitha onyothi ndjoka okukambadhala okugwanitha elalakano lye. Mateus 2:1-12; Mika 5:1.

▪ Oshike tashi ulike kutya onyothi ndjoka aayanekelinyothi ya mono kaya li onyothi yowala?

▪ Openi aayanekelinyothi ya adha Jesus?

▪ Omolwashike tu shi shi kutya Satana oye a gandja onyothi yi kwatele komeho aayanekelinyothi?