Ontopolwa 96

Jesus nomupangeli omugundjuka omuyamba

MANGA Jesus te ende moshitopolwa shaPerea u uka kuJerusalem, omulumentu omugundjuka ota matuka te ya kuye nota tsu oongolo koshipala she. Omulumentu ohi ithanwa omupangeli, shoka tashi vulika tashi ti kutya oku na ondondo yopombanda ya simana mosinagoga shopuyo nenge nokuli oshilyo shOsanhedrin. Oku li wo omuyamba noonkondo. “Omuhongi omwaanawa,” ye ta pula, “ondi na okulonga shike, ndi mone omwenyo gwaaluhe?”

“Oshike to ti ongame omwaanawa?” Jesus ta yamukula. “Kaku na omukwawo omwaanawa, oKalunga awike.” Otashi vulika omugundjuka ta longitha oshitya “omwaanawa,” shi li ongo edhinasimaneko, onkee ano Jesus te mu lombwele kutya edhinasimaneko lya tya ngaaka oli na okupewa Kalunga owala.

Jesus ota tsikile ta ti: “Ihe ngele wa hala okuya momwenyo, gwanitha iipango.”

“Oyini po?” omulumentu ta pula.

Jesus okwa yamukula mokutumbula itano yomIipango Omulongo: “Oombino: Ino dhipaga; Ino hondela; Ino yaka; Ino lundila; Simaneka ho nanyoko.” Jesus ota gwedha po nokuli oshipango sha simanenena, ta ti: “Hola omukweni [ngangoye] u ihole mwene.”

“Ayihe mbika nde yi gwanitha nkene nda za muugundjuka wandje,” omulumentu ta yamukula e na uushili. “Oshike nde shi pumbwa natango?”

Mokupulakena keindilo lyomulumentu lya hwama nolya mana mo, Jesus okwe mu hokwa. Ihe Jesus oku wete kutya omulumentu okwa kakatela kiinima yopanyama nonkee ano ta popi shoka e na okuninga: “Shimwe oshe ku pumbwa: inda u ka [landithe] po iinima yoye ayihe, ngu u yi gandje koohepele, ngoye e to kala u na uuyamba megulu, ngu u ye ihe, u landule ndje.”

Osha yela kutya Jesus ota tala nolukeno nkene omulumentu ta thikama nota piluka ta shuna neyeme enene. Uuyamba we owe mu posipaleka okumona ongushu yeliko lyashili. Jesus ota popi nokunika oluhodhi ta ti: “Omuyamba e na uudhigu okuya [muukwaniilwa womegulu, KB].”

Oohapu dhaJesus odha kumitha aalongwa. Ihe oya kumwa nokuli noonkondo sho ta tsikile okupopya ompango yaapuhe ta ti: “Okupitila mo kwongamelo mombende yonane ihwepo, ku vule okuya mo kwomuyamba [muukwaniilwa waKalunga, KB].”

“Olye ano ta vulu okuhupithwa?” aalongwa oya hala ye shi tseye.

Jesus ote ya tala shu ukilila note ya yamukula ta ti: “Otashi nyenge aantu, ihe haKalunga, oshoka Kalunga iha nyengwa kusha.”

Petrus ngoka a ndhindhilika kutya ehogololo ndyoka ya ningi olya yooloka ko kehogololo lyomupangeli omugundjuka ngoka omuyamba, ota ti: “Tala, otse twa thigi ko iinima ayihe notwe ku landula.” Onkee ano ta pula: “Otatu mono shike?”

Jesus otu uvaneke ta ti: “[Meshitululo, NW], Omuna gwOmuntu sho ta ka kuutumba koshipundi shepangelo lyeadhimo lye, nane wo, one mboka mwa landula ndje, otamu ka kala [omutumba] kiipundi omulongo niiyali notamu ka pangula omazimo gaIsrael omulongo nagaali.” Eeno, Jesus otu ulike kutya otapu ka kala eshitululo lyonkalelo kombanda yevi opo iinima yi ka kale ishewe ngaashi ya li moshikunino shaEden. Petrus naalongwa yalwe otaya ka pewa ondjambi yokupangela pamwe naKristus mOparadisa kombanda yevi ndika alihe. Dhoshili, ondjambi onene ya tya ngaaka oya gwana oku tu inyengitha tu ninge eiyambo kehe!

Ihe opu na nokuli ngashingeyi oondjambi, ngaashi Jesus te dhi popi noku shi koleke ta ti: “Kaku na ngoka a thigile ko omolwandje nomolwevaangeli egumbo nenge aamwayina aalumentu nenge aamwayina aakiintu nenge yina nenge he nenge aanona nenge omapya, ye ita mono ko andola lwethele ongashingeyi muuyuni mbuka omagumbo naamwayina aalumentu naamwayina aakiintu nooyina naanona nomapya omomahepeko nomuuyuni tau ya omwenyo gwaaluhe.”

Ngaashi Jesus u uvaneka, aalongwa ye shaampono ye li muuyuni oya nyanyukilwa ekwatathano nAakriste ooyakwawo lya kola noli na ondilo onene li vule ndyoka ye na naakwanezimo yawo. Osha yela kutya omupangeli omugundjuka ngoka omuyamba ota kanitha ondjambi ndjika naandjika yomwenyo gwaaluhe mUukwaniilwa waKalunga womegulu.

Konima yaashino Jesus ota gwedha po ta ti: “Ihe oyendji yokomeho otaa ningi yokonima naamboka yokonima otaa ka ninga yokomeho.” Okwa hala mbela okutya shike?

Okwa hala okutya aantu oyendji mboka “yokomeho” mokunyanyukilwa kwawo omauthembahenda gopalongelokalunga, ngaashi omupangeli omugundjuka ngoka omuyamba, itaya ka ya mo mUukwaniilwa. Otaya ka kala “yokonima.” Ihe oyendji, mwa kwatelwa aalongwa yaJesus aaifupipiki, mboka ya talika ko kAafarisayi yi ishi uuyuuki ye li “yokonima”—ye li aantu yokevi, nenge ‛am ha·’aʹrets—otaya ka kala “yokomeho.” Okukala kwawo “yokomeho” otashi ti kutya otaya ka mona uuthemba wokuninga aapangeli pamwe naKristus mUukwaniilwa. Markus 10:17-31; Mateus 19:16-30; Lukas 18:18-30.

▪ Osha yela kutya omugundjuka nguno omuyamba oye omupangeli a tya ngiini?

▪ Omolwashike Jesus a tindi okwiithanwa omwaanawa?

▪ Oshimoniwa shomupangeli omugundjuka otashi ulike ngiini oshiponga shokukala omuyamba?

▪ Oondjambi dhini Jesus u uvanekele aalanduli ye?

▪ Ongiini mboka yokomeho taya ningi yokonima naamboka yokonima taya ningi yokomeho?