Ontopolwa 128

Jesus oku na omwenyo!

SHO aakiintu ya adha ombila yaJesus yi li owala, Maria Magdalena ota matuka e ke shi lombwele Petrus naJohannes. Ihe osha yela kutya aakiintu yalwe oya thigala pombila. Nziya, otapu holoka omuyengeli note yi ithana ye ye meni.

Moka aakiintu oye wete mo omuyengeli gulwe natango, nagumwe gwomaayengeli ote ya lombwele ta ti: “One inamu tila; oshoka ndi shi shi, one tamu kongo Jesus, omwaalelwa [koshiti, NW]. Ke mo muka, oshoka okwa yumuka ongashika a tile. Ileni, mu tale eha mpoka a lalele. Indeni ihe nokweendelela, mu ka lombwele aalongwa ye, okwa yumuka kuusi.” Ano aakiintu mbaka ya tila noya nyanyukwa noonkondo otaya matukile wo kaalongwa.

Pethimbo ndino Maria, Petrus naJohannes okwe ya mona note shi ya hokololele ta ti: “Oyo ya kutha mo Omuwa mombila, tse katu shiwo mpoka ye mu tula.” Nziyanziya aayapostoli mbaka yaali otaya matukile ko. Johannes ota matuka neendelelo—sha yela kutya oye omushona kumukwawo—nota thiki tango kombila. Pethimbo ndyoka aakiintu oya za po nale, onkee ano kapu na ngu e li po. Johannes oto ontamene mombila noku wete mo omalapi moka a li a dhingilwa, ihe ota kala pondje.

Sho Petrus ta thiki po, ita kwatakwata ihe otu ukilile mombila. Ota mono mo omalapi moka a li a dhingilwa nosho wo oshifugulitho shoka sha li sha dhingilwa komutse gwaJesus. Osha gonyenwa pehala lilwe. Ngashingeyi Johannes naye wo ota yi mo mombila noti itaale shoka sha hokololwa kuMaria. Ihe Petrus naJohannes itaya dhimbulula kutya Jesus okwa yumuka, nokuli nonando Ye okwa li e ya lombwelele olundji kutya Ota ka yumuka. Mbaka yaali otaya shuna kegumbo ya limbililwa, ihe Maria ngoka a galukile kombila, ota thigala po.

Pokati mpono, aakiintu yalwe otaye endelele ya ka lombwele aalongwa kutya Jesus okwa yumuka, ngaashi aayengeli ye ya lombwele ye shi ninge. Manga taya matuka taye endelele ngaashi tashi vulika, Jesus ote ya tsakaneke nota ti: “Mwa penduka!” Otaya tsu oongolo poompadhi dhe e ta ye mu inyongamene. Opo nduno Jesus ota ti: “Inamu tila; indeni, mu ka lombwele aamwameme, ya ye kuGalilea, [oko] taa ka mona ndje.”

Nale sho ekakamo lyevi lya ningilwe naashono aayengeli ya holokele, aakwiita aalangeli oya halukile noya ningile ya fa ya sa. Sho ya kala nawa ishewe, oya yi mbala koshilando noya lombwele aasaseri aakuluntu shoka sha ningwa po. Konima yokukundathana ‘naakuluntu’ yAajuda, opwa ningwa etokolo okukambadhala okukanitha po oshinima shoka mokupa aakwiita ombumbo. Oya lombwelwa taku ti: “Tyeni, aalongwa ye ye ya po uusiku noye mu yaka mo, manga twa kotha.”

Molwaashoka aakwiita Aaroma otaya vulu okugeelwa neso ngele oya kotha miilonga yawo, aasaseri oye yu uvanekele taya ti: “Nongele [ehokololo lyokukotha kweni tali] uvika komupangeli, otatu mu geulukitha e tatu mu popile, mu wape okukala mwaa na oombudhi.” Molwaashoka ombumbo oya li ya gwana lela, aakwiita oya ningi ngaashi ya lombwelwa. Oshizemo, ehokololo lyiifundja kutya omudhimba gwaJesus ogwa yakwa mo, oli ihanene apuhe mokati kAajuda.

Maria Magdalena, ngoka a thigala kombila okwa nika oluhodhi olunene. Openi mbela Jesus e li? Ota kotama a tale mombila, nota mono mo aayengeli yaali ya zala oonguwo oontokele mboka ya holoka po ishewe! Gumwe okwa kuutumba komitse nagulwe okomagulu mpoka pwa li pwa lala omudhimba gwaJesus. “Omukiintu, oto lilile shike?” osho taya pula.

“Oshoka oya kutha mo Omuwa gwandje,” Maria ta yamukula, “ngaye ndaa shiwo mpoka ye mu tula.” Opo nduno ota punguluka nota mono omuntu ngoka te endulula epulo ndyoka: “Omukiintu, oto lilile shike?” Naanguka ota pula wo: “[Oto] kongo lye?”

Molwashoka ota dhiladhila kutya oye omukeeleli gweyana moka mu na ombila, ota ti kuye: “Omuwa, ngele ongoye we mu kutha mo, lombwela ndje mpoka we mu tula, notandi ke mu tala ko.”

“Maria,” omuntu ta ti. Mbalambala okwa dhimbulula kutya oye Jesus okupitila momukalo gwa tseyika ngoka ta popi naye. “Rabbuni”! (tashi ti “Omuhongi”) ti igidha. Ote mu idhiingile nenyanyu enene. Ihe Jesus ota ti: “Ino guma ndje, oshoka inandi londa natango kuTate; inda ihe kaamwameme, ngu u ya lombwele, ongame tandi londo kuTate nokuHe, okuKalunga kandje nokuKalunga keni.”

Ngashingeyi Maria ota matukile hoka kwa gongala aayapostoli nosho wo aalongwa ooyakwawo. Ota hokolola wo shoka sha hokololwa nale kaakiintu yalwe shi na ko nasha nokumona Jesus omuyumuki. Ihe aalumentu mbaka, inaa itaala aakiintu yotango, osha yela kutya naMaria itaye mu itaale. Mateus 28:3-15; Markus 16:5-8; Lukas 24:4-12; Johannes 20:2-18.

▪ Maria Magdalena ota ningi shike sho a mono kutya ombila oyi li owala, noshike tashi ningilwa aakiintu yalwe?

▪ Petrus naJohannes otayi inyenge ngiini sho ya adha ombila yi li owala?

▪ Oolye taya tsakaneke aakiintu yalwe manga ye li mondjila oku ka hokololela aalongwa kutya Jesus okwa yumuka?

▪ Oshike sha ningilwa aakwiita aalangeli, naasaseri oyi inyenge ngiini kwaashoka ya hokolola?

▪ Oshike tashi ningwa po sho Maria Magdalena e li oye awike pombila, naalongwa otayi inyenge ngiini kwaashoka sha hokololwa kaakiintu?