Ontopolwa 5

Jesus ota valelwa peni nuunake?

OMUPANGELI gwOshinenelongo shaRoma, Omukeesali Augustus, okwa gandja euthompango kutya kehe gumwe oku na okushuna koshilando hoka a valelwa e ki inyolithe. Onkee ano Josef ta yi koyaandjawo hoka a valelwa, koshilando shaBetlehem.

MuBetlehem omu na aantu oyendji tayi inyolitha, nehala owala ndyoka Josef naMaria taya vulu okumona opo ya kale mo olyo oshigunda shiimuna. Jesus ota valelwa mpoka uusino niimuna yilwe hayi edhililwa. Maria ote mu dhingile momalapi note mu langeke metemba, moka hamu lile iimuna.

Osha yela kutya okewiliko lyaKalunga Omukeesali Augustus a toto po ompango ye yokwiinyolitha. Shika oshe shi ningi tashi vulika opo Jesus a valelwe muBetlehem, oshilando shoka Omanyolo ga hunganeke nale osho tashi ka kala ehala moka omupangeli omuuvanekwa ta valelwa.

Uusiku mbuno inau simana tuu! Uuyelele otau adhimine ongundu yaasita mokuti kowala. Owo eadhimo lyaJehova! Nomuyengeli gwaJehova ote ya lombwele ta ti: “Inamu tila, oshoka tala, ngame otandi mú uvithile enyanyu enene tali ningi lyaantu ayehe: onena tuu ndjika mwa valelwa Omukulili moshilando shaDavid, oye tuu nguka Kristus, Omuwa. Nendhindhiliko, mu mu dhimbulule, olyo ndika: otamu ka mona okahanona ka dhingilwa momalapi noka langekwa metemba lyokuliliimuna.” Nombaadhilila otapu holoka aayengeli yalwe oyendji e tayi imbi taya ti: “[Esimano, OB-1986] lyaKalunga mokombandambanda nombili kombanda yevi maantu e ya hokwa!”

Sho aayengeli ya yi, aasita otaya lombwelathana taya ti: “Tu yeni ano kuBetlehem, tu tale shika sha ningwa ko, Omuwa e shi tu hololele.” Otaya yi nokweendelela notaya adha Jesus e li naanaa mpoka omuyengeli a ti otaye ke mu adha. Sho aasita taya hokolola shoka omuyengeli e ya lombwele, ayehe mboka taye shi uvu otaye shi kuminwa. Maria ota pungula oohapu adhihe ndhika momutima gwe note dhi dhiginine.

Nena aantu oyendji oyi itaala kutya Jesus okwa valwa momasiku 25 Desemba. Ihe Desemba olyo ethimbo lyomvula, ethimbo lyuutalala muBetlehem. Ethimbo ndyono aasita kaya li taya vulu okulangela omausita gawo uusiku mokuti kowala. Niishewe, kasha li tashi vulika Omukeesali gwaRoma a pule aantu mboka ya li ya hala nale oku mu ningila oshipotha ya ye molweendo nduka mokati kokufu ye ki inyolithe. Osha yela kutya Jesus okwa valwa petameko lyethimbo lyoshikufuthinge shomvula ndjoka. Lukas 2:1-20; Mika 5:1.

▪ Omolwashike Josef naMaria taya yi kuBetlehem?

▪ Oshinima oshikumithi shini tashi ningwa po uusiku mboka Jesus a valwa?

▪ Otu shi shi ngiini kutya Jesus ina valwa momasiku 25 Desemba?