Ontopolwa 59

Jesus oye lye naanaa?

SHO owato ndjoka yi na Jesus naalongwa ye tayi thiki puBetsaida, aantu otaye eta omulumentu omuposi kuye notaye mu indile a gume omulumentu noku mu aludhe. Jesus ota kwata omulumentu moshikaha note mu kutha mo mondoolopa, nokonima sho e mu hiyile omayeye momeho ge, ote mu pula: “U lwete ko sha?”

“Otandi mono ko aantu,” omulumentu ta yamukula, “oshoka ndi wete oonakweenda, yo ya fa omiti.” Jesus ota tenteke iikaha ye komeho gomulumentu nota aludha omeho ge opo a mone ko nawa. Konima yaashono, Jesus ota laleke omulumentu a shune kegumbo note mu lombwele kaa ye moshilando.

Ngashingeyi Jesus ota yi pamwe naalongwa ye komikunda dhaKesarea Filippi, kokule lela kolundumelela lwaPalestina. Ogwo omulondo omule gwookilometa 48 lwaampono gu uka komudhingoloko omwaanawa gwaKesarea Filippi, ngoka gwa lala oometa 350 lwaampono kombanda yondjalo yefuta. Olweendo otashi vulika talu pula omasiku gontumba.

Mondjila okuya hono, Jesus ota zi po a ka galikane oye awike. Oku na owala oomwedhi omugoyi nenge omulongo komeho geso lye, noti ipula kombinga yaalongwa ye. Oyendji oye etha po nale nokuli oku mu landula. Osha yela kutya yalwe oya limbililwa noya nika oluhodhi molwashoka okwe ekelehi oonkambadhala dhaantu oku mu ninga omukwaniilwa, nomolwashoka sho aatondi ye ye mu shongo, ye ina gandja endhindhiliko lyokegulu okuulika uukwaniilwa we. Aayapostoli ye mbela oyi itaala kutya oye lye? Sho taye ya puye mpoka e li ta galikana, Jesus ota pula ta ti: “Aantu otaa ti ongame lye?”

“Yamwe otaa ti, Johannes [Omuninginithi, NW],” yo taya yamukula, “yamwe oElia, yamwe oJeremia nenge gumwe gwomaaprofeti.” Eeno, aantu otaya dhiladhila kutya Jesus oye gumwe gwomaalumentu mbaka ngoka a yumuka kuusi!

“One ano otamu ti ngiini, ongame olye?” Jesus ta pula.

Petrus ota yamukula nziyanziya ta ti: “Ongoye Kristus, Omuna gwaKalunga omunamwenyo.”

Konima sho Jesus a hokwa eyamukulo lyaPetrus, ota ti: “Nangame wo otandi ku lombwele: ongoye Petrus, nokemanya tuu ndika tandi tungile po egongalo lyandje, noitali ka sindwa nokomiyelo [dhoHades, NW].” Osho oshikando shotango Jesus ta tseyitha mpaka kutya ye ota ka tunga egongalo, nonokutya nokuli eso itali ka kwatela mo iilyo yamo konima yonkalamwenyo yayo yuudhiginini kombanda yevi. Opo nduno ota lombwele Petrus: “Ongame otandi ke ku pa iipatululo [yuukwaniilwa wegulu, KB].”

Onkee ano Jesus ta holola kutya Petrus ota ka pewa omauthembahenda gi ikalekelwa. Aawe, Petrus ita pewa ondondo ya simana mokati kaayapostoli, noita ningwa ekankameno lyegongalo. Jesus ye mwene oye Emanya hoka egongalo lye tali ka tungilwa. Ihe Petrus ota ka pewa iipatululo itatu mbyoka ye ta ka patululila nayo oongundu dhaantu oompito okuya mUukwaniilwa womegulu.

Petrus okwa li ta ka longitha oshipatululo shotango pOpentekoste 33 E.N. okuulikila Aajuda mboka yi iyela ombedhi shoka yo ye na okuninga opo ya hupithwe. Okwa li ta ka longitha oshipatululo oshitiyali nziya konima yaashoka okupatululila Aasamaria ooitaali ompito okuya mUukwaniilwa waKalunga. Nokonima okwa li ta ka longitha oshipatululo oshititatu mo 36 E.N. okupatululila mboka kaaye shi Aajuda noinaaya pita etanda, Kornelius nookuume ke ompito oyo tuu ndjoka.

Jesus ota tsikile noonkundathana dhe naayapostoli ye. Ote ya nikitha oluhodhi moku ya hokololela kombinga yehepeko neso mbyoka ta ka mona konima yokathimbo muJerusalem. Petrus ke shi uvite ko kutya Jesus ota ka yumukila omwenyo gwomegulu note mu kutha po paantu. “Omuwa, shi valelwe, u ningwe ngaaka,” osho ta ti. Jesus ota punguluka nota yamukula ta ti: “Za po pungame, Satana; ongoye omwigo gwandje, oshoka ongoye ito dhiladhila shoka shaKalunga, aawe, [ooshono] shaantu.”

Kakele kaayapostoli, osha yela kutya opu na yalwe mboka taye ende pamwe naJesus nomolwashoka Jesus te ya ithana ngashingeyi ya hedhe popepi nota yelitha kutya itashi ka kala oshipu okukala omulanduli gwe. “Ngele ku na ngoka a hala okulandula ndje,” ye ta ti, “oye ni idhimbike ye mwene, na humbate [omuti gwomahepeko gwe, NW] ye na landule ndje. Oshoka oongoka a hala okuhupitha omwenyo gwe, ote ke gu kanitha, ihe oongoka ta kanitha omwenyo gwe omolwandje nomolwevaangeli, oye te gu hupitha.”

Eeno, aalanduli yaJesus oye na okukala ye na uupenda neiyambomwene ngele oya hala okukala ya hokiwa kuye. Ota ti: “Oshoka oongoka ta sile ndje noohapu dhandje ohoni mokati kepipi ndika lyuuholume nolyuulunde, oye ngoka nOmuna gwOmuntu ote mu sile ohoni, nge te ya meadhimo lyaHe pamwe naayengeli aayapuki.” Markus 8:22-38; Mateus 16:13-28; Lukas 9:18-27.

▪ Omolwashike Jesus ti ipula naalongwa ye?

▪ Aantu oya tala ko Jesus kutya oye lye?

▪ Iipatululo yini tayi pewa Petrus, nongiini yi na okulongithwa?

▪ Epukululo lini Petrus ta pewa, nomolwashike?