Ontopolwa 119

Jesus ta falwa kuHannas, nopo nduno okuKaifas

JESUS okwa mangwa a fa e li omulongi gwomuyonena nota falwa kuHannas, ngoka a li nale omusaseri omukuluntu kuyakwawo a simana. Hannas oye a li omusaseri omukuluntu kuyakwawo sho Jesus e li okamati koomvula 12 a li a kumitha aahongi oorabbi motempeli. Konima yethimbo yamwe yomoyanamati yaHannas oya li ya longo ye li aasaseri aakuluntu kuyakwawo, noshitenya she Kaifas ngashingeyi osho shi li pondondo ndjoka.

Osha yela kutya Jesus ota falwa tango kegumbo lyaHannas molwashoka omusaseri omukuluntu ngoka okwa kala ethimbo ele a simana monkalamwenyo yopalongelokalunga lyOshijuda. Molwashoka otaya yi tango kuHannas, Omusaseri Omukuluntu kuyakwawo Kaifas okwa mono ompito okugongaleka Osanhedrin, ompangu yopombanda yAajuda yiilyo 71, nosho wo okugongela oonzapo dhiifundja.

Ngashingeyi omusaseri omukuluntu Hannas ota pula Jesus kombinga yaalongwa ye nokombinga yelongo lye. Ihe Jesus ota yamukula ta ti: “Uuyuni onde u lombwela montaneho; aluhe nda longo aantu moosinagoga nomotempeli, moka hamu ya Aajuda ayehe, ngaye inaandi popya sha meholamo. Oshike to pula ndje? Pula mbeyaka yu uvu ndje ndhoka nde dhi ya lombwele; tala, oye shi shi shoka nde shi popi.”

Opo tuu mpoka gumwe gwomomalenga ngoka ga thikama popepi naJesus ote mu ketsula nolupi moshipala e ta ti: “Osho to yamukula omusaseri omukuluntu [ngawo, OB-1986]?”

Jesus ota yamukula ta ti: “Nge nda popi nayi, tompela ndje uuwinayi, ihe ngele nda popi dhu uka, oto dhengele ndje shike?” Konima yokupopya huka, Hannas ota tumu kuKaifas Jesus a mangwa.

Ngashingeyi aasaseri aakuluntu naakuluntu nosho wo aanongoraamata ayehe, eeno, Osanhedrin ayihe, otaya tameke okugongala. Osha yela kutya ohaya gongalele megumbo lyaKaifas. Okuninga ompangu ya tya ngaaka ongulohi yOpaasa osha yela kutya otashi tsu ondumbo nompango yOshijuda. Ihe shika itashi imbi aawiliki yelongelokalunga ya gwanithe elalakano lyawo ewinayi.

Iiwike ya piti, sho Jesus a yumudha Lasarus, Osanhedrin oya adhika ya tokola nale kutya oku na okusa. Nokonima owala yomasiku gaali ga piti, mEtitatu, aakuluntu yelongelokalunga oyu uvanene okukwata Jesus mokuninga ompangela pamakoto ye mu dhipage. Dhiladhila owala, okwa li nokuli a pangulwa manga inaa ya mompangu!

Ngashingeyi otaya kambadhala okumona oonzapo ndhoka tadhi gandja uunzapo wiifundja opo Jesus a vule okuningilwa oshipotha. Ihe inaya vula okumona oonzapo ndhoka uunzapo wadho tau tsu kumwe. Hugunina, otapu ya oonzapo mbali dhiifundja e tadhi ti: “Otse twe mu uvu, sho a ti: Ongame tandi kumuna po otempeli ndjika ya tungwa niikaha, nomasiku gatatu tandi tungu onkwawo inaayi tungwa niikaha.”

Kaifas ota pula ta ti: “Ito yamukula sha komalundilo ngoka taye ku lundile?” (OB-1986) Ihe Jesus okwa mwena owala. Osanhedrin oya sithwa ohoni sho oonzapo itaadhi vulu okutsa kumwe mokugandja uunzapo kwadho nokuli shi na ko nasha nelundilo ndika. Onkee ano omusaseri omukuluntu kuyakwawo ota kambadhala nomukalo gulwe gwi ili.

Kaifas oku shi nkene Aajuda hayu uvu nayi mbala ngele gulwe ta ti kutya oye shili Omuna gwaKalunga. Poompito mbali dha tetekele oya li ye e endelele okuula Jesus omushekikalunga ngoka a gwana okusa—noshikando shimwe oya fekelele papuko kutya okwa ti oku thike pamwe naKalunga. Ngashingeyi Kaifas ota thininike nekoto ta ti: “Otandi ku ganitha kuKalunga omunamwenyo, u tu lombwele, ngele ongoye Kristus, Omuna gwaKalunga.”

Kutya nduno Aajuda otaya dhiladhila shike, Jesus oye shili Omuna gwaKalunga. Nokukala a mwena, otaku vulu okukala euliko kutya oti ikala kutya oye Kristus. Onkee ano Jesus ota yamukula nuulaadhi ta ti: “Eeno, ongame, notamu ka mona Omuna gwOmuntu a kuutumba kolulyo lwOonkondo note ya miikogo yegulu.”

Opo tuu mpoka, Kaifas ota tuula oonguwo dhe montaneho e ti igidha ta ti: “Okwa tuku Kalunga. Tatu kongele we shike oonzapo? Tala, ngashingeyi omu uvu etukano lye. Otamu ti ngiini?”

“Oku na ondjo yokusa,” Osanhedrin osho tayi tseyitha. Opo nduno otaya tameke oku mu yola notaye mu ula iinima oyindji yoku mu sheka. Otaye mu ketsula nolupi noku mu hiyila omayeye moshipala. Yalwe otaya siikile oshipala she notaye mu dhenge noongonyo nokupopya taye mu shadha taya ti: “Kristus, tu hunganekela, olye ngoka e ku dhenge”? Eihumbato ndika ewinayi nolyaahe li pampango otali ningwa ongulohi pethimbo lyompangu. Mateus 26:57-68; 26:3, 4; Markus 14:53-65; Lukas 22:54, 63-65; Johannes 18:13-24; 11:45-53; 10:31-39; 5:16-18.

▪ Jesus ota falwa ishewe peni, noshike ta ningilwa hoka?

▪ Openi Jesus ta falwa natango, nonelalakano lyashike?

▪ Kaifas ote shi ende ngiini opo Osanhedrin yi tye kutya Jesus oku na ondjo yokusa?

▪ Eihumbato ewinayi nolyaahe li pampango lini tali ningwa pethimbo lyompangu?