Ontopolwa 118

Jesus ta gwaalekwa e ta kwatwa

OSHO naanaa koongulasha ko kwene sho Judas ta fala engathithi lyaantu enene lyaakwiita, aasaseri aakuluntu, Aafarisayi nosho wo yalwe moshikunino shaGetsemane. Aasaseri oya zimina okufuta Judas iisilveri 30 opo a gwaaleke Jesus.

Nale, sho Judas a lalekelwe po puulalelo wOpaasa, osha yela kutya okwa yi u ukilila kaasaseri aakuluntu. Mbaka oya gongele nziyanziya omalenga gawo nosho wo ongundu yaakwiita. Otashi vulika Judas e yu ulikile tango mpoka Jesus naayapostoli ye ya dhanenene Opaasa. Sho ya mono kutya oya za po mpono, engathithi enene lyaantu ya humbata iikondjitho, oolamba noonyeka, oya landula Judas okuza muJerusalem e taya taaguluka esilu lyaKidron.

Manga Judas ta kwatele osheendo komeho shu uka kondundu yOomono, oku na uushili kutya oku shi mpoka Jesus ta adhika. Oshiwike sha piti, sho Jesus naayapostoli ya li taye endaenda pokati kaBetania naJerusalem, olundji oya li ya tula moshikunino shaGetsemane ya vululukwe po noya kundathane. Ihe ngashingeyi ongiini nduno aakwiita taya ka tseya kutya nguno oye Jesus, sho tashi vulika e li momilema kohi yomiti dhoomono? Otashi vulika yo inaye mu mona nando onale. Onkee ano Judas ta gandja endhindhiliko ta ti: “Oongoka tandi mu thipi komilungu, oye ngoka, mu kwateni, ne mu mu fale mwe mu kwatelelela.”

Sho Judas ta fala engathithi enene lyaantu moshikunino, ota mono Jesus e li paayapostoli ye notu ukilile kuye. “Rabbi, wa tokelwa,” osho ta ti, note mu thipilile komilungu.

“Kuume, [owi] ile po shike mpaka?” Jesus ta yamukula. Opo nduno ota yamukula epulo lye mwene ta ti: “Judas, Omuna gwOmuntu oto mu gwaalekitha ethipo lyokomilungu?” Ihe inali gwanena tuu omugwaaleki gwe! Jesus ota katuka u uka komeho muuyelele woonyeka noolamba dha tema e ta pula ta ti: “Olye ngo tamu mu kongo?”

Otaya yamukula: “Jesus Omunasaret.”

“Ongame ngu,” Jesus osho ta ti manga ta thikama e na uulaadhi komeho yawo ayehe. Mokukumithwa kuulaadhi we nokaaye shi shoka ya tegelela, aalumentu otaya shuna mbala lwanima notayi ihata pevi.

“Onde mú lombwele, ongame ngu,” Jesus ta tsikile ta popi a gundjila. “Ngele ano ongame tamu kongo, nena etheni mbaka, ya ye.” Okathimbo opo ka piti sho ya li mondjugo yopombanda, Jesus okwa lombwelele He megalikano kutya okwa gamena aayapostoli ye aadhiginini opo kaapu kane nando ogumwe gwomuyo, “oongoka awike omuna gwekano.” Opo oohapu dhe dhi vule okugwanithwa, ano ota pula opo aalanduli ye ethiwe.

Sho aakwiita ya ngungumana ishewe, otaya thikama notaya tameke okumanga Jesus, aayapostoli otaya mono shoka tashi ka ningwa po. “Omuwa, natu dhenge negongamwele?” osho taya pula. Manga Jesus inaa yamukula, Petrus ota yelula limwe lyomomagongamwele gaali ngoka ge etelelwa kaayapostoli e ta ponokele Malkus, omupiya gwomusaseri omukuluntu kuyakwawo. Petrus ota palutha okudhenga omutse gwomupiya ihe ota tete ko okutsi kwe kwokolulyo.

“Etheni, naashika shi ningwe,” Jesus ta ti manga te ya hangukununa. Ota gumu okutsi kwaMalkus nota panga oshilalo. Opo nduno ote ya longo oshiilongomwa sha simana e ta lombwele Petrus ta ti: “Shuna mo egongamwele lyoye molumpangwa; oshoka ayehe mboka taa kwata kegongamwele, oyo taa si kegongamwele. Nenge u shi kandi wapa okwiindila Tate, a tumine ndje ngashingeyi aayengeli ye vule omalegio omulongo nagaali!”

Jesus okwa hala a kwatwe, oshoka ota yelitha ta ti: “Ihe ooraamata otadhi gwanithwa ngiini andola ndhoka tadhi ti, osho ngeyi oshi na okuningwa.” Nota gwedha po ta ti: “Ndaa nwe ando oshitenga shoka nde shi pewa kuTate?” Ota tsu kumwe thiluthilu naashoka Kalunga e mu halela!

Opo nduno Jesus ota popi nengathithi lyaantu. “One mwe ya okukwata ndje ongomukolokoshi mu na omagongamwele noondhimbo”? osho ta pula. “Omasiku agehe kwi nda kuutumba muuyapuki nonda longo aantu, ne inamu kwata ndje. Ihe ayihe mbika oya ningwa, iinyolwa yaaprofeti opo yi gwanithwe.”

Opo tuu mpoka ongundu yaakwiita nomukuluntu gwawo nomalenga gAajuda otaya kwata Jesus e taye mu manga. Moku shi mona, aayapostoli otaya thigi po Jesus e taya yi ontuku. Ihe omulumentu omugundjuka—tashi vulika oye omulongwa Markus—ota kala po mokati kengathithi lyaantu. Otashi vulika a li kegumbo hoka Jesus a dhanenene Opaasa nokonima yaashono okwa zi ko ta landula engathithi lyaantu. Ihe ngashingeyi oye mu dhimbulula notaya kambadhala oku mu kwata. Ihe ota thigi po onguwo ye yoliina e ta fadhuka po. Mateus 26:47-56; Markus 14:43-52; Lukas 22:47-53; Johannes 17:12; 18:3-12.

▪ Omolwashike Judas e na uushili kutya ota ka adha Jesus moshikunino shaGetsemane?

▪ Jesus otu ulike ngiini kutya oku na ko nasha naayapostoli ye?

▪ Onkatu yini Petrus ta katuka okupopila Jesus, ihe Jesus ota lombwele Petrus shike kombinga yaashono?

▪ Jesus otu ulike ngiini kutya ota tsu kumwe thiluthilu naashoka Kalunga e mu halela?

▪ Sho aayapostoli taya thigi po Jesus, olye ta kala po, noshike tashi mu ningilwa?