Ontopolwa 133

Jesus ta gwanitha ashihe shoka Kalunga ta pula

ITASHI ka kala tuu shinyanyudha uuna Omukwaniilwa Omusindani Jesus Kristus ta ka komba po Satana nuuyuni we waahenuuyuuki! Lwahugunina Elelo lyOomvula Eyuvi lyaJesus lyombili opo tali ka tameka!

Kohi yewiliko lyaJesus naakwaniilwa ooyakwawo, aahupipo yopuHarmagedon otaye ko opaleka iikulukuma mbyoka ya thigwa po kiita yopauyuuki. Osha yela kutya aahupipo kombanda yevi otaya ka kala wo taya mono aanona uule wethimbo lyontumba notaya ka kala ye na ombinga miilonga yinyanyudha yokulonga evi li kale oshikunino sha fa oparka ombwanawa lela.

Konima yethimbo, Jesus ota ka yumudha omamiliyona itaaga vulu okuyalulwa okuza moombila dhago ga nyanyukilwe Oparadisa ndjika ombwanawa. Shika ote ke shi ninga mokugwanitha eshilipaleko lye tali ti: “Ethimbo tali ya, nena ayehe mboka ya kala moombila, otaa . . . holoka mo.”

Mokati kaamboka Jesus ta yumudha otamu ka kala ngoka a li nale omuyoni ngoka a sile koshiti shomahepeko pooha dhe. Dhimbulukwa kutya Jesus okwe mu uvanekelele ta ti: “Oshili tandi ku lombwele nena, oto ka kala pamwe nangame mOparadisa.” (NW) Aawe, omuntu ngoka ita ka falwa megulu a ka pangele e li omukwaniilwa pamwe naJesus, nosho wo Jesus ita ka ninga we omuntu nokukala pamwe naye mEviparadisa. Mepingathano naashika, Jesus ota ka kala pamwe naangoka a li nale omuyoni mondunge yoku ke mu yumudha okukala nomwenyo mOparadisa nokusila oshimpwiyu oompumbwe dhe dhopanyama nosho wo dhopambepo, ngaashi tashi ulikwa methano pepandja tali landula.

Dhiladhila kwaashika! Kohi yesiloshimpwiyu lyopahole lyaJesus, uukwanegumbo auhe wopantu—aahupipo puHarmagedon, oluvalo lwawo nomamiliyona omayuvi goonakusa aayumudhwa mboka haya vulika kuye—otaya ka koka sigo omegwaneneno lyopantu. Okupitila mOmwana gwe ngoka e li Omukwaniilwa, Jesus Kristus, Jehova ota ka kala pamwe naantu pambepo. Nongaashi ewi ndyoka lyu uvika kuJohannes okuza megulu tali popi tali ti: ‘Ota ka theta po omahodhi momeho gawo, neso itali ka kala po we nenge oluhodhi nenge elilagano, nenge uuwehame kau kala mo we.’ Kapu na we omuntu kombanda yevi ta ka mona iihuna nenge te ke ehama.

Pehulilo lyElelo lyOomvula Eyuvi lyaJesus, onkalo otayi ka kala naanaa ngaashi sha li elalakano lyaKalunga lyopetameko sho a lombwele aantu yotango, Adam naEva, yi indjipale nokuudhitha evi. Eeno, evi otali ku udhithwa nepipi lyaantu aayuuki ya gwanenena. Shika otashi wapa molwashoka omauwanawa gekuliloyambo lyaJesus otaga ka longithwa kukehe gumwe. Eso molwuulunde waAdam itali ka kala po we!

Onkee ano Jesus ota ka kala a gwanitha ashihe shoka Jehova e mu pula a ninge. Ano pehulilo lyoomvula eyuvi, ota ka gandja Uukwaniilwa nosho wo uukwanegumbo waantu ya gwanenena kuHe. Opo nduno Kalunga ota ka mangulula Satana noompwidhuli dhe okuza molumbogo moka mu na onkalo ya fa eso ndjoka ihaayi vulu okulongwa sha. Onelalakano lyashike?

Pehulilo lyoomvula eyuvi, oyendji yomwaamboka ye li mOparadisa otaya ka kala aayumudhwa mboka eitaalo lyawo inaali makelwa nando onale. Manga inaaya sa, omauvaneko gaKalunga kaya li ye ga shi nando, nonkee ano, inaaya vula okuulika eitaalo mugo. Opo nduno, konima yokuyumudhwa nokulongwa ooshili dhOmbimbeli, osha li oshipu kuyo okulongela Kalunga ye li mOparadisa, kaapu na shoka tashi ya pataneke. Ihe ando oya ka kala ngaa mbela ya dhiginina kohi yemakelo ando Satana okwa pelwe ompito a kambadhale oku ya keelela ya tsikile okulongela Kalunga? Opo epulo ndika li yamukulwe, Satana ota ka mangululwa.

Ehololo ndyoka lya pewa Johannes otali ulike kutya konima yElelo lyOomvula Eyuvi lyaJesus, Satana ote ke shi pondola okupilula ko omwaalu itaagu vulu okuyalulwa gwaantu kokulongela Kalunga. Opo ihe nduno uuna emakelo lyahugunina lya pu, Satana, oompwidhuli dhe naayehe mboka a pondola moku ya pukitha otaya ka hanagulwa po sigo aluhe. Mepingathano naashika, aahupipo aadhiginini mboka ya makelwa sha gwana, otaya ka kala nomwenyo okunyanyukilwa omalaleko nuuyamba gaHe yawo gwomegulu sigo aluhe.

Osha yela kutya Jesus okwa dhana nota ka tsikila okudhana onkandangala ya simana noonkondo mokugwanitha omalalakano omakumithi gaKalunga. Onakuyiwa kayi shi tuu onkumithi ndjoka tatu vulu okunyanyukilwa molwaayihe mbyoka ta gwanitha e li Omukwaniilwa omunene gwomegulu gwaKalunga. Ihe itatu vulu okudhimbwa ashihe shoka a ningi manga a li e li omuntu.

Jesus okwe ya kombanda yevi nehalo ewanawa e te tu longo kombinga yaHe. Kakele kaashono, okwa holola pamukalo gwa dhenga mbanda omaukwatya ge na ongushu gaKalunga. Omitima dhetu otadhi inyengithwa uuna tatu dhiladhila kuulaadhi we uunene nokunika oshilumentu kwe, uunongo we kaau shi okuyelekwa nasha, uunkulungu we e li omulongi, okukwatela komeho kwe kee na uumbanda nosho wo olukeno lwopahole lwe nohenda. Ngele tatu dhiladhila nkene a hepekwa shaa shi okuhokololwa sho a gandja iikulila, mbyoka okupitila muyo awike tatu vulu okumona omwenyo, omitima dhetu ohadhi inyengithwa shili kolupandu oku mu pandula!

Dhoshili, omuntu ngoka twa mona mokukonakona huka onkalamwenyo yaJesus ke shi tuu omuntu dhingi! Uunene we owi iwetikile nuukumithi. Otwi inyengithwa tu popye wo ngaashi omupangeli Omuroma Pontius Pilatus ngoka a tile: “Tala, omuntu!” Eeno, ‘omuntu,’ omuntu omunenenene ngoka a li ko nale!

Mokutaamba esiloshimpwiyu lyekuliloyambo lye, omutenge gwuulunde neso mbyoka twa thigulula kuAdam, otayi vulu okukuthwa mo mutse, nosho wo Jesus ota vulu okukala ‘Tate yetu gwaaluhe.’ Ayehe mboka ya hala okumona omwenyo gwaaluhe oye na okumona ontseyo, hakutseya owala Kalunga ihe nOmwana wo, Jesus Kristus. Okulesha nosho wo okukonakona kwoye embo ndika naku ku kwathele u mone ontseyo ndjika ogandjimwenyo ya tya ngaaka! 1 Johannes 2:17; 1:7; Johannes 5:28, 29; 3:16; 17:3; 19:5; Lukas 23:43; Genesis 1:28; 1 Aakorinto 15:24-28; Ehololo 20:1-3, 6-10; 21:3, 4; Jesaja 9:5.

▪ Uuthembahenda wokunyanyukwa uni aahupipo yopuHarmagedon nosho wo aanona yawo taya ka nyanyukilwa?

▪ Oolye taya ka nyanyukilwa onkalamwenyo mOparadisa pamwe naahupipo yopuHarmagedon nosho wo aanona yawo, nomondunge yini Jesus ta ka kala pamwe nayo?

▪ Onkalo otayi ka kala ngiini pehulilo lyoomvula eyuvi, noshike Jesus ta ka ninga ethimbo ndyono?

▪ Omolwashike Satana ta ka mangululwa a ze mo molumbogo, nolwahugunina oshike tashi ke mu ningilwa nosho wo ayehe mboka taye mu landula?

▪ Ongiini Jesus ta vulu okuninga ‘Tate yetu gwaaluhe’?