Ontopolwa 52

Jesus ta kutitha omayuvi pashikumithalonga

AAYAPOSTOLI 12 oya li ya nyanyukilwa olweendo lweuvitho olundhindhilikwedhi muGalilea ashihe. Ngashingeyi, okathimbo okafupi konima yedhipago lyaJohannes, otaya galukile kuJesus notaye mu hokololele kombinga yiimoniwa yawo iikumithi. Jesus oku wete kutya oya loloka nonokutya aantu oyendji otaye ya notaya zi po nomolwaashono kaaye na nando ethimbo lyokulya, nota ti: ‘Ileni tu ki ikaleleni otse atuke kokuma nkoka ku li owala, ne mu vule okuvululukwa po kashona.’

Otaya londo mowato yawo, tashi vulika popepi naKapernaum, notaya yi kehala li li owala, sha yela kutya okuuzilo waJordan handiyaka yaBetsaida. Ihe aantu oyendji oye ya wete sho taya yi nayalwe otaye shi uvu. Mbaka ayehe otaya matuka kooha dhomunkulofuta taya tetekele, naashono owato tayi thiki komunkulo, aantu opo ye li nale taye ya tsakaneke.

Sho Jesus ta londoloka mowato nota mono engathithi enene lyaantu, oku yu uvitile ohenda molwashoka aantu oya fa oonzi dhaa na omusita. Ano ota aludha aavu yawo nota tameke oku ya longa iinima oyindji.

Ethimbo otali matuka, naalongwa yaJesus otaye ya kuye e taya ti: “Pokuma mpaka opowala, nolya toko, ya laleka, ya ye nomagumbo nomikunda, ye ki ilandele iikulya.”

Ihe Jesus ota yamukula nota ti: “Ya peni iikulya.” Molwashoka Jesus oku shi nale shoka ta ka ninga, ota tala po Filippus moku mu pula ta ti: “Otatu ka landa peni iikwiila okuliwa kumboka?”

Filippus oku wete kutya itashi wapa. Opu na konyala aalumentu 5 000, notashi vulika pu na aantu ye vulithe 10 000 ngele aakiintu naanona oya yalulilwa ko! Filippus ota yamukula ta ti: “Iikwiila yoondenari dhomathele gaali [ondenari pethimbo mpono oyo ya li hayi futwa mesiku] kayi ya gwanene, ayehe ya pewe nando okashona.”

Andreas otashi vulika a hala okuulika kutya okukutitha aantu oyendji ye thike mpoka itashi wapa nota ti: “Ope na okamati ke na iikwiila itano yiilya noohi mbali,” nota gwedha ko, “ihe mbika otayi kwatha shike oyendji ye thike mpa”?

Molwashoka osho oshitemamvula, komeho owala yOpaasa yomo 32 E.N., opu na omwiidhi ogundji gwa ziza. Jesus ota lombwele ano aalongwa ye ya lombwele aantu ya kuutumbe pomwiidhi ye li moongundu dho 50 no 100. Ota kutha iikwiila itano noohi mbali, ta ligamene kegulu e ta hambelele. Opo nduno ota tameke okupambula iikwiila e ta topola oohi. Ote yi pe aalongwa ye notaye yi topolele aantu. Oshikumithi, aantu ayehe otaya li sigo ya kuta!

Konima yaashono, Jesus ota lombwele aalongwa ye ta ti: “Tooleni iipambu mbika ya hupu ko, kwaa hepe sha.” Sho taye shi ningi, otayu udhitha oontungwa 12 niipambu mbyoka ya hupu ko! Mateus 14:13-21; Markus 6:30-44; Lukas 9:10-17; Johannes 6:1-13.

▪ Omolwashike Jesus ta kongele aayapostoli ye ehala lyi ikalela?

▪ Openi Jesus ta fala aalongwa ye, nomolwashike itaaya mono evululuko ndyoka ya pumbwa?

▪ Sho taku toko, aalongwa otaya ladhipike Jesus a ninge shike, ihe aantu ote ya sile ngiini oshimpwiyu?