Ontopolwa 116

Jesus ta longekidhile aayapostoli ye okuza po kwe

UULALELO wedhimbuluko owa pwa nale, ihe Jesus naayapostoli ye oye li natango mondjugo yopombanda. Nonando masiku Jesus ita ka kala po we mpoka, oku na natango iinima oyindji mbyoka a hala okupopya. “Oomwenyo dheni inadhi nika oluhodhi,” osho te ya hekeleke. “Itaaleni Kalunga.” Ihe ota gwedha po ta ti: “Ne mu itaale ndje wo.”

“Megumbo lyaTate omu na omahala ogendji,” Jesus ta tsikile ta ti. “[Otandi] yi, ndi ke mú longele eha . . . mu kale wo nkoka ndi li. Okokuma nkoka tandi yi ondjila mu yi shi.” Aayapostoli kayu uvite ko kutya Jesus ota popi kombinga yokuya kwe megulu, onkee ano Tomas ta pula ta ti: “Omuwa, katu shiwo nkoka to yi: ondjila otu yi shi peni?”

“Ongame ondjila noshili nomwenyo,” Jesus ta yamukula. Eeno, omoku mu taamba ko owala nomokuholela onkalamwenyo ye omuntu ta vulu okuya megumbo lyaHe lyomegulu, molwashoka ngaashi Jesus ta ti: “Kaku na ngoka te ya kuTate, okuninga ta pitile mungame.”

“Omuwa, tu ulukila Ho,” Filippus te mu indile, “tse notwa gwana.” Osha yela kutya Filippus okwa hala Jesus e ya pe eihololo lyaKalunga hali monika, ngaashi lya monikile methimbo lyonale kuMoses, Elia naJesaja. Ihe muushili wo wene, aayapostoli oye na sha shoka oshiwanawa noonkondo shi vulithe omamoniko goludhi ndoka, ngaashi Jesus ta ti: “Ongame nda kala nane olule, ongoye noku shi ndje, Filippus. Oongoka a mono ndje, oye nokwa mono Tate.”

Jesus otu ulike sha gwanenena uukwatya waHe omolwashono okukala pamwe naye nosho wo oku mu mona osha fa naanaa wa mona He. Niishewe He oku vule Omwana, ngaashi Jesus te shi zimine ta ti: “Oohapu ndhoka tandi dhi mú lombwele, itandi dhi popi mungame mwene.” Jesus ota gandja she eleka esimano alihe kuHe gwomegulu omolwomalongo ge.

Kashi li tuu etsomukumo kaayapostoli okuuva ngashingeyi sho Jesus te ya lombwele ta ti: “Oongoka i itaala ndje, naye wo ota ka longa iilonga mbika tandi yi longo, nota ka longa iinene yi vule mbiyaka”! Jesus ina hala okutya aalanduli ye otaya ka longitha oonkondo dhokulonga iikumithalonga iinene yi vule mbyoka a longo. Aawe, ihe okwa hala okutya yo otaya ka tsikila nuukalele wawo uule wethimbo olindji, moshitopolwa oshinene noonkondo nosho wo maantu oyendji noonkondo.

Jesus ita thigi po aalongwa ye konima yokuza po kwe. “Noshaa shoka tamu indile medhina lyandje,” te yu uvanekele, “otandi shi ningi.” Ota ti ishewe: “Ongame tandi indile Tate, oye note mú pe [omukwathi, NW] gulwe, a kale pune aluheluhe, Ombepo yashili.” Konima yethimbo sho a londo megulu, Jesus ota tilile aalongwa ye ombepo ondjapuki, omukwathi nguka gulwe.

Okuza po kwaJesus oku li popepi, ngaashi ye ta ti: “Okathimbo natango, uuyuni noitau mono ndje we.” Jesus ota ka kala oshishitwa shopambepo shoka omuntu kehe itaa vulu okumona. Ihe Jesus otu uvanekele ishewe aayapostoli ye aadhiginini ta ti: “One hamu kala nokutala ndje; oshoka ongame ndi na omwenyo, nane wo hamu kala mu na omwenyo.” Eeno, Jesus ite ke yi ihololela owala konima yokuyumuka kwe molupe lwomuntu, ihe konima yethimbo ote ke ya yumudhila momwenyo okukala pamwe naye megulu ye li iishitwa yopambepo.

Ngashingeyi Jesus ota popi ompango yanathangwa ta ti: “Oongoka e na iipango yandje note yi dhiginine, oye tuu ngoka e hole ndje; ihe oongoka e hole ndje, oye e holike kuTate, nangame wo ndi mu hole notandi mu ihololele.”

Opo tuu mpono omuyapostoli Judas, i ithanwa wo Tadeus, ota kwata Jesus melaka ta ti: “Omuwa, sho wa hala, u tu ihololele, nohauyuni, oshike?”

“Ngele ku na ngoka e hole ndje,” Jesus ta yamukula, “oye ta dhiginine oohapu dhandje, naTate oha kala noku mu hola . . . Oongoka [kee] hole ndje, oye ita dhiginine oohapu dhandje.” Mepingathano naalanduli yaKristus aavuliki, uuyuni otau dhini omalongo ge. Onkee ano itee wu ihololele.

Pethimbo lyuukalele we kombanda yevi, Jesus okwa longo aayapostoli ye iinima oyindji. Otaye ke yi dhimbulukwa mbela ngiini ayihe, unene tuu molwashoka nokuli sigo opompito ndjino, itaya vulu okuuva ko iinima oyindji unene? Lago enene Jesus otu uvaneke ta ti: “[Omukwathi, NW], Ombepo Ondjapuki, Tate te ke mu tuma medhina lyandje, oye te mú longo ayihe note mú dhimbulutha ayihe nde yi mú lombwela.”

Jesus ote ya hekeleke ishewe ta ti: “Ombili otandi yi mú thigile, ombili yandje otandi yi mú pe . . . Oomwenyo dheni inadhi nika oluhodhi.” Dhoshili, Jesus ota zi po, ihe ota yelitha ta ti: “Andola mu hole ndje, ando mwa nyanyukwa, sho tandi yi kuTate, oshoka Tate e vule ndje.”

Ethimbo lyaJesus ndyoka lya hupu ko okukala pamwe nayo efupi. “Itandi popi we nane odhindji,” osho ta ti, “oshoka omupangeli guuyuni te ya, oye noke na nando osha mungame.” Satana Ondiaboli, ngoka a vulu okuya muJudas nokwa vulu oku mu pangela, oye omupangeli gwuuyuni. Ihe muJesus kamu na uunkundi wopalutu mboka tau vulu okulongithwa kuSatana oku mu kutha ko kokulongela Kalunga.

Okunyanyukilwa ekwatathano lyopothingo

Konima yuulalelo wedhimbuluko Jesus okwa ladhipike aayapostoli ye noshipopiwa inaashi sheywa tashi zi komutima. Otashi vulika sha li konima yomulongo nambali gwuusiku. Onkee ano Jesus ta ti: “Thikameni, tu zeni mpaka.” Ihe manga inaaya ya, Jesus oti inyengithwa kohole yoku ya hola, ota tsikile okupopya nayo note ya hokololele eudhi tali ya tsu omukumo.

“Ongame omuviinu gwashili, Tate oye omuneyana lyomiviinu,” osho a tameke. Omuneyana Omunene, Jehova Kalunga, okwa tsike omuviinu nguka gwopathaneko sho a gwayeke Jesus nombepo ondjapuki peninginitho lye poshikufuthinge shokolundume lwevi shomo 29 E.N. Ihe Jesus ota tsikile notu ulike kutya omuviinu otagu thaneke oshindji shaahe shi owala ye, nota ti: “Oye ta keke po oshitayi kehe shomungame shoka itaashi imi iiyimati, ihe kehe oshitayi shoka tashi imi, ote shi opaleke, shi ime iiyimati oyindji . . . One itamu vulu okwiima iiyimati, ngele itamu kala mungame, ngaashika naanaa oshitayi itashi vulu okwiima iiyimati, ngele kashi li momuviinu. Ongame omuviinu, one iitayi.”—OB-1986.

POpentekoste, konima yomasiku 51, aayapostoli nayalwe otaya ningi iitayi yomuviinu uuna ombepo ondjapuki tayi tililwa muyo. Lwahugunina aantu 144 000 otaya ningi iitayi yomuviinu gwopathaneko. Pamwe nekota lyomuviinu, Jesus Kristus, mbaka otaya ningi omuviinu gwopathaneko ngoka hagu imi iiyimati yUukwaniilwa waKalunga.

Jesus ota yelitha kutya oshipatululo shokwiimika iiyimati osho shike ta ti: “Oongoka ta kala mungame nangame omuye, oye oti imi oshindji; oshoka mwaa na ndje, kamu vulu okulonga sha.” Ihe ngele omuntu iti imike iiyimati, Jesus ota ti kutya, “oye te ekelwahi ongoshitayi, notashi kukuta; oyo otayi gongelwa notayi umbilwa momulilo notayi pile mo.” Mepingathano naashika, Jesus otu uvaneke ta ti: “Ngele tamu kala mungame, noohapu dhandje tadhi kala mune, indileni shaa shoka mwe shi hala notamu shi pewa.”

Natango Jesus ota lombwele aayapostoli ye ta ti: “Opo mpoka Tate ta adhimithwa, nge tamu imi oshindji notamu ningi aalongwa yandje.” Oshiyimati shoka Kalunga a hala kiitayi osho okuholola omaukwatya gopaKriste, unene tuu ohole. Kakele kaashono, molwashoka Kristus okwa li omuuvithi gwUukwaniilwa waKalunga, iiyimati mbyoka ya halika oya kwatela mo wo iilonga yawo yokuninga aantu aalongwa, ngaashi naanaa ye a ningi.

“Kaleni mohole yandje,” Jesus osho te ya ladhipike ngashingeyi. Ihe mbela aayapostoli ye otaya vulu oku shi ninga ngiini? “Ngele tamu dhiginine iipango yandje,” ye ta ti, “otamu kala mohole yandje.” Jesus ota tsikile ta yelitha ta ti: “Oshipango shandje ooshika, mu holathane, ngangame ndi mú hole. Kaku na ngoka e na ohole yi vule yaangoka ta gandjele ookuume ke omwenyo gwe.”

Meni lyoowili dhontumba, Jesus ote ku ulika ohole ndjika onenenene mokugandjela aayapostoli ye nosho wo aantu yalwe mboka ye na eitaalo tali longo muye omwenyo gwe. Oshiholelwa she oshi na okwiinyengitha aalanduli ye ya kale ye ninathane ohole yokwiiyamba mwene oyo tuu ndjoka. Ohole ndjika otayi ke ya ndhindhilikitha, ngaashi Jesus e shi popile nale a ti: “Opo mpoka ayehe taye mú dhimbulula, one aalongwa yandje, ngele mu holathane.”

Jesus ota popi ookuume ke e ta ti: “One ookuume kandje, nge tamu ningi shono tandi shi mú lombwele. Itandi mú ithana we [aapiya], oshoka [omupiya] ke shi shi, omuwa gwe shoka ta ningi; ihe onde mú ithana ookuume kandje, oshoka ayihe mbyoka nde yi uvu muTate, onde yi mú tseyithile.”

Ekwatathano lya tya ngaaka kali na tuu ondilo—okukala ookuume kaJesus kopothingo! Ihe opo ya tsikile okunyanyukilwa ekwatathano ndika, aalanduli ye oye na okukala ‘nokwiimika iiyimati.’ Ngele taye shi ningi, Jesus ota ti, “opo shaa shoka tamu shi indile Tate medhina lyandje, oye e shi mú pe.” Dhoshili, okwiimika iiyimati yUukwaniilwa kashi na tuu ondjambi onene! Konima yokuladhipika ishewe aayapostoli ya ‘kale ye holathane,’ Jesus ota yelitha kutya uuyuni otau ke ya tonda. Ihe ote ya hekeleke ta ti: “Uuyuni nge tau mú tondo, kaleni mu shi shi, owa tondo ndje tango.” Jesus ngashingeyi otu ulike molwashike uuyuni tau tondo aalanduli ye, ta ti: “Oshoka [ne kamu shi oshitopolwa shuuyuni, NW] ongame sho nde mú yoolola mo muuyuni, onkee uuyuni tau mú tondo.”

Jesus ota yelitha natango kutya molwashike uuyuni tau ya tondo nota tsikile ta ti: “Mbika ayihe otaye [yi] mú ningile omolwedhina lyandje, oshoka inaa tseya [Jehova Kalunga] nguka a tumu ndje.” Muushili wo wene iikumithalonga yaJesus otayi pangula mboka ye mu tonda, ngaashi ye ta ti: “Andola nda li inaandi longa mokati kawo iilonga mbiyaka, inaayi longwa kugulwe, ando ya li kaye na oondjo; ihe [ngashingeyi] oya mono noya tonda, ongame naTate.” Kungeyi omanyolo otaga gwanithwa ngaashi Jesus ta ti: “Oyo ya tondo ndje owala.”

Jesus ote ya hekeleke ishewe, ngaashi e shi ningile nale, moku yu uvanekela oku ya tumina omukwathi, ombepo ondjapuki, ndjoka yi li oonkondo dhaKalunga tadhi longo. “Oye ta [ka] hokolola ndje. Nane wo tamu hokolola.”

Ekumagidho lilwe omolwokuza po kwe

Jesus naayapostoli oyi ilongekidha okuza mo mondjugo yopombanda. “Mbika onde yi mú lombwele, mwaa ninge omwenyo omwiinayi,” osho a gwedha ko. Opo nduno ota gandja elondodho lya mana mo ta ti: “Oyo taye mú kondo mo mosinagoga; eeno, omasiku tage ya, shaa ngoka te mú dhipaga, oye e shi, ta gandjele Kalunga eyambo.”

Osha yela kutya aayapostoli oya yematekwa unene kelondodho ndika. Nonando nale Jesus okwa tile kutya uuyuni otau ke ya tonda, ine shi holola shu ukilila kutya otaya ka dhipagwa. “Shino inaandi shi mú lombwela petameko,” Jesus ta yelitha, “oshoka ongame nda li pune.” Ihe kashi li tuu nawa ngele te ya hokololele kombinga yaashino manga inaa ya!

Jesus ota tsikile ko ta ti: “Ihe ngashingeyi otandi yi kungoka a tuma ndje, nokape na ngoka gwomune ta pula ndje: Oto yi peni?” Ongulohi oyo tuu ndjoka oya pulile mpoka ta yi, ihe ngashingeyi otaya kakamithwa unene kwaashoka e ya hokololele opo nduno itaye mu pula we shi na ko nasha naashino. Ngaashi Jesus ta ti: “Oshoka nde mú lombwele shino, oomwenyo dheni tadhi udha oluhodhi.” Aayapostoli inaya nika owala oluhodhi molwashoka yu uvu kutya otaya ka hepekwa nayi notaya ka dhipagwa, ihe omolwashoka Omuwa gwawo te ya thigi po.

Onkee ano Jesus ta yelitha ta ti: “Okuya kwandje otaku mú kwatha. Oshoka ngele itandi yi ko, [omukwathi, NW] ite ya kune; ihe nge tandi yi, otandi mu tumu kune.” E li omuntu, Jesus ota vulu owala okukala mehala limwe poshikando, ihe uuna e li megulu, ota vulu okutuma omukwathi, ombepo ondjapuki yaKalunga, kaalanduli ye shaa mpono ye li kombanda yevi. Onkee ano okuya kwaJesus taku ke ya kwatha.

Jesus ota ti kutya ombepo ondjapuki ‘otayi tompele uuyuni uulunde wawo, nuuyuuki nepangulo.’ Uulunde wuuyuni, okwaahe na kwawo eitaalo tali longo mOmwana gwaKalunga, otau ka hololwa. Kakele kaashono, okuya kwaJesus kuHe otaku ka gandja uunzapo washili wuuyuuki we. Okunyengwa kwaSatana nuuyuni we uuwinayi okweethitha po Jesus okukakatela uudhiginini kwe otaku gandja uunzapo wa yela kutya omupangeli gwuuyuni mbuka okwa pangulwa nayi.

“Natango [ondi] na iinima oyindji oku mú lombwela,” Jesus ta tsikile ta ti, “ihe ngashingeyi kamu vulu oku yi humbata.” Onkee ano Jesus otu uvaneke kutya uuna te ya tilile ombepo ondjapuki, ndjoka yi li oonkondo dhaKalunga tadhi longo, otayi ke ya kwatha okuuva ko iinima mbika, metsokumwe noonkondo dhawo oku yi uva ko.

Aayapostoli kaye uvite ko, unene tuu kutya Jesus ota ka sa nopo nduno te ke ya holokela konima yokuyumuka kwe. Onkee ano taya pulathana taya ti: “Otaku ti ngiini, sho ta ti kutse: Okathimbo, nokamu wete ndje, niishewe okathimbo, notamu mono ndje, na: Otandi yi kuTate?”

Jesus ota dhimbulula kutya oya hala oku mu pula, nonkene ta yelitha ta ti: “Oshili, oshili tandi mú lombwele: otamu ka lila nokuyemata, ihe uuyuni tau ka nyanyukwa; one tamu kala nokunika oluhodhi, ihe uuyuni tau ka nyanyukwa; one tamu kala nokunika oluhodhi, ihe oluhodhi lweni otalu ka shituka enyanyu.” Konima yaashono esiku olyo tuu ndyono, omutenya, sho Jesus ta dhipagwa, aawiliki yelongelokalunga yuuyuni oya nyanyukwa, ihe aalongwa oya nika oluhodhi. Ihe oluhodhi lwawo otalu lundulukile menyanyu sho Jesus a yumuka! Enyanyu lyawo itali tsikile tuu sho e ya pe oonkondo ya kale oonzapo dhe pOpentekoste moku ya tilila ombepo ondjapuki yaKalunga!

Mokuyelekanitha onkalo yaayapostoli naandjoka yomukiintu pethimbo lyuuwehame we wokuvala, Jesus ota ti: “Omukiintu nge ku li po ta vala, okwa nika oluhodhi, oshoka okathimbo ke oka thikana.” Ihe Jesus ota ti kutya omukiintu iha dhimbulukwa we uudhigu we konima yokuvala okanona, nota ladhipike aayapostoli ye ta ti: “Nane wo ngashingeyi omu na oluhodhi; ihe otandi mú mono ishewe, [ngele nda yumuka] noomwenyo dheni otadhi ka nyanyukwa, nokaku na ngoka te mú kutha enyanyu [lyeni].”

Sigo ethimbo ndino, aayapostoli inaya pula sha nando medhina lyaJesus. Ihe ngashingeyi ota ti: “Ngele tamu indile sha kuTate, oye te shi mú pe medhina lyandje. . . . Oshoka Tate oye mwene e mú hole, oshoka mu hole ndje, one nomwi itaala, ongame nda za muKalunga. Ongame nda za kuTate nonde ya muuyuni; uuyuni otandi u thigi po ishewe notandi yi kuTate.”

Oohapu dhaJesus odha li etsomukumo enene kaayapostoli. “Onkee ano twi itaala, ongoye wa za muKalunga,” yo taya ti. “Ngashingeyi omwi itaala”? Jesus te ya pula. “Tala, ethimbo tali ya nolye ya nokuli, one tamu ka halakanithwa, okehe tuu oti iyukile, notamu thigi ndje po awike.” Nonando osha fa tashi monika shaa shi okwiitaalwa, shika otashi ningwa manga uusiku inaawu pwa ko!

“Mbika onde yi mu lombwela, mú kale mu na ombili mungame.” Jesus ota hulitha ta ti: “Muuyuni omu li mo mu na uudhigu; ihe ikoleleni, ongame nda sinda [uuyuni].” Jesus okwa sinda uuyuni mokugwanitha nuudhiginini ehalo lyaKalunga nonando pwa li iinima ayihe mbyono Satana nuuyuni we ya kambadhala okuninga okweethitha Jesus okukakatela uudhiginini kwe.

Egalikano lyahugunina mondjugo yopombanda

Jesus okwi inyengithwa kohole yomuule yokuhola aayapostoli ye, note ya longekidhile okuza po kwe hoka ku li popepi. Ngashingeyi, konima yoku ya kumagidha noku ya hekeleka ethimbo ele, ota ligamene kegulu nota galikana kuHe ta ti: “Adhimitha Omumwoye, Omumwoye e ku adhimithe wo; ngashika ongoye we mu pe epangelo lyonyama ayihe, opo ayehe mboka we mu pa, e ya pe omwenyo gwaaluhe.”

Jesus ita popi tuu oshipalanyolo shituntula—omwenyo gwaaluhe! Molwashoka Jesus okwa pewa “epangelo lyonyama ayihe,” ye ota vulu okugandja omauwanawa gekuliloyambo lye kaantu ayehe mboka taya si. Ihe ota gandja “omwenyo gwaaluhe” kwaamboka owala ya hokiwa kuHe. Okutungila koshipalanyolo shika shomwenyo gwaaluhe, Jesus ota tsikile negalikano lye ta ti:

“Nomwenyo gwaaluhe ogwo tuu nguka, oyo ye ku tseye, ongoye Kalunga awike gwashili, naanguka we mu tuma, Jesus Kristus.” Eeno, okumona ehupitho okwi ikolelela kokumona ontseyo yokutseya Kalunga nosho wo Omwana. Ihe opwa pumbiwa oshindji shaahe shi owala ontseyo yomomutse.

Omuntu oku na oku ya tseya thiluthilu nokukala e na uukuume neuvathano nayo. Ou na okukala u uvite ngaashi yo yu uvite shi na ko nasha niinima nosho wo oku yi tala ko ngaashi yo haye yi tala ko. Nuunene tuu, omuntu ou na okulalakana okuholela omaukwatya gawo ga dhenga mbanda mokukala nayalwe.

Konima yaashono, Jesus ota galikana ta ti: “Ongame nde ku adhimitha kombanda yevi, onda gwanitha oshilonga shoka we shi pa ndje, ndi shi longe.” Molwashoka sigo oompano okwa gwanitha oshilonga she shoka a pewa nomolwashoka oku na uushili kutya onakuyiwa ye otayi ke shi pondola, oti indile ta ti: “Tate, adhimitha ndje pungoye neadhimo ndyoka nda li ndi li na pungoye, manga uuyuni wa li waa ko.” Eeno, ngashingeyi ota pula, opo mokupitila meyumuko, a shunithilwe eadhimo lye ndyoka a li e na nale megulu.

Okukwatela kumwe iilonga ye ya simana kombanda yevi, Jesus ota ti: “Edhina lyoye onde li hololele aantu mboka we ya pe ndje yomuuyuni. Oyo ya li oyoye, nowe ya pe ndje, oyo noya dhiginine oohapu dhoye.” Jesus ota longitha edhina lyaKalunga, Jehova, muukalele we notu ulike uutumbulilo walyo we eleka, ihe okwa longo nokuli oshindji kaashi shi owala okuhololela aayapostoli ye edhina lyaKalunga. Okwe ya kwathele wo okutamununa mo ontseyo yawo yokutseya Jehova nokupandula uuntu we nosho wo oompangela dhe.

Mokusimaneka Jehova ngoka e li Omunene e mu vule, Ngoka ye ta longo e li kohi ye, Jesus ote shi zimine neifupipiko ta ti: “Oohapu ndhoka we dhi pe ndje, onde dhi ya pe; oyo noye dhi taamba noye shi shi shili, ongame nda za mungoye, noyi itaala, ongoye wa tuma ndje.”

Mokuninga eyooloko pokati kaalanduli ye nosho wo noshihupe shaantu, Jesus ota galikana ishewe ta ti: “Itandi galikanene uuyuni, ihe oomboka we ya pe ndje . . . Sho nda li puyo, onde ya gamene . . . [Ongame onde ya gamene, OB-1986] nokaku na nando ogumwe a kanithwa, oongoka awike omuna gwekano,” oye Judas Iskariot. Pethimbo opo tuu mpoka Judas oku li mondjila oku ka longa iilonga ye yidhinitha yokugwaaleka Jesus. Kungeyi Judas ota gwanitha Omanyolo inee shi tseya.

‘Uuyuni otau ya tondo,’ Jesus ta tsikile ta galikana. “Itandi galikana, u ya kuthe mo muuyuni, aawe, u ya gamene kuuwinayi. Oyo yaa shi [oshitopolwa shuuyuni, ngaashi nangame ndaa shi oshitopolwa shuuyuni, NW].” Aalanduli yaJesus oye li muuyuni, uulipamwe waantu wu unganekwa mboka tau pangelwa kuSatana, ihe oya yooloka ko noye na okukala aluhe ya yooloka ko kuwo nokuuwinayi wawo.

“Ya yapulila moshili; oohapu dhoye odho oshili,” Jesus osho ta tsikile ko ta ti. Mpaka Omanyolo gOshiheberi ga nwethwa mo moka Jesus a totha aluhe, ote gi ithana “oshili.” Ihe shoka a longo aalongwa ye naashoka ya ka nyola konima yethimbo kohi yokunwethwa mo kuKalunga osho Omanyolo gOshigreka gopaKriste, nasho oshi li wo “oshili.” Oshili ndjika otayi vulu okuyapula omuntu, okulundulula thiluthilu onkalamwenyo ye noku mu ninga omuntu a yooloka ko kuuyuni.

Ngashingeyi Jesus ite ya galikanene ‘oyo ayeke, aawe, naamboka wo taye mu itaalithwa okoohapu dhawo.’ Onkee ano Jesus ta galikanene mboka taya ka kala aalanduli ye aagwayekwa nosho wo aalongwa yamwe yomonakuyiwa mboka taya ka gongelwa natango ‘moshigunda shimwe.’ Oshike mbela ta pula omolwayo ayehe?

“Ayehe opo ya kale yamwe, ngaashi ongoye, Tate, u li mungame nangame ndi li mungoye, . . . opo ya kale yamwe, ngashika otse nangoye tu li yamwe.” Jesus naHe kaye shi omuntu gumwe lelalela, ihe yo ohaya tsu kumwe miinima ayihe. Jesus ota galikana aalanduli ye ya nyanyukilwe uukumwe wa faathana opo “uuyuni u tseye, ongoye wa tuma ndje nowa kala, u ya hole, ngaashi u hole ndje.”

Jesus ngashingeyi oti indile kuHe gwomegulu molwaamboka taya ka kala aalanduli ye aagwayekwa. Omolwashike mbela? “Ya kale wo nkoka ndi li, opo ya tale eadhimo lyandje we li pe ndje, oshoka ongoye wa kala u hole ndje nomanga uuyuni inaau dhikwa,” sha hala okutya, manga Adam naEva inaaya mona aanona. Nalenale komeho gaashino, Kalunga okwa kala e hole Omwana epona, ngoka a ningi Jesus Kristus.

Mokuhulitha egalikano lye, Jesus ota tsu omuthindo ta ti: “Ongame onde ya tseyithile edhina lyoye notandi li tseyitha natango, opo ohole ndjoka wa kala u hole ndje, yi kale muyo, nangame ndi kale muyo.” Kaayapostoli, okwiilonga edhina lyaKalunga osha li sha kwatela mo okutseya paumwene ohole yaKalunga. Johannes 14:1–17:26; 13:27, 35, 36; 10:16; Lukas 22:3, 4; Eksodus 24:10; 1 Aakwaniilwa 19:9-13; Jesaja 6:1-5; Aagalati 6:16; Epsalmi 35:19; 69:5; Omayeletumbulo 8:22, 30.

▪ Openi Jesus ta yi, neyamukulo lini Tomas a mono li na ko nasha nondjila yaahono?

▪ Pakwiindila kwe, osha yela kutya Filippus okwa hala Jesus e ya pe shike?

▪ Omolwashike ngoka a mona Jesus, a mona wo He?

▪ Aalanduli yaJesus otaya ka longa ngiini iilonga iinene ye mu vule?

▪ Omondunge yini Satana kee na mo sha muJesus?

▪ Uunake Jehova a tsike omuviinu gwopathaneko, nuunake nongiini yalwe taya ningi oshitopolwa shomuviinu?

▪ Iitayi ingapi omuviinu gwopathaneko lwahugunina tagu ka kala gu na?

▪ Oshiyimati shini Kalunga a hala kiitayi?

▪ Ongiini tatu vulu okukala ookuume kaJesus?

▪ Omolwashike uuyuni u tonde aalanduli yaJesus?

▪ Elondodho lyaJesus lini tali yemateke aayapostoli ye?

▪ Omolwashike aayapostoli itaaya pula Jesus mpoka ta yi?

▪ Oshike naanaa aayapostoli kaayu uvite ko?

▪ Jesus ota yelitha ngiini kutya onkalo yaayapostoli yokunika oluhodhi otayi ka shituka enyanyu?

▪ Jesus ota ti masiku aayapostoli otaya ka ninga shike?

▪ Jesus ota sindi ngiini uuyuni?

▪ Omondunge yini Jesus ta pewa “epangelo lyonyama ayihe”?

▪ Okumona ontseyo yokutseya Kalunga nOmwana otashi ti shike?

▪ Okomikalo dhini Jesus ta holola edhina lyaKalunga?

▪ “Oshili” oshike, nongiini tayi ‘yapula’ Omukriste?

▪ Ongiini Kalunga, Omwana naagalikani ye ayehe yashili ye li yamwe?

▪ ‘Uuyuni owa dhikwa’ uunake?