Ontopolwa 99

Jesus ta longo muJeriko

MBALAMBALA Jesus nomangathithi gaantu mboka taye ende pamwe naye, otaya thiki kuJeriko, oshilando hapu endwa konyala uule wesiku limwe okuza muJerusalem. Osha yela kutya Jeriko oshilando shi na oombinga mbali, shimwe oshilando oshikulu shaJuda, pu na konyala uule wokilometa yimwe netata okuza moshilando oshipe shaRoma. Sho omangathithi gaantu ga zi moshilando oshikulu notaga thiki moshipe, aaposi yaali aaheheli oyu uvu epiyagano. Gumwe gwomuyo oye Bartimeus.

Sho Bartimeus nakuume ke tayu uvu kutya oJesus te ende po, otaya tameke okwiigidha taya ti: “Omuwa, omuna gwaDavid, tu sila ohenda!” Sho engathithi lyaantu tali ya ganda nongeyo ya mwene, otayi igidha nokuli pombanda ya dhiginina taya ti: “Omuwa, omuna gwaDavid, tu sila ohenda!”

Jesus sho e uvite ta zizilikwa ota kankama. Ota pula aantu mboka ye li pamwe naye yi ithane mboka tayi igidha. Otaya yi kaaposi aaheheli notaya lombwele gumwe gwomuyo taya ti: “Ikolelela, thikama, oye te ku ithana.” Nenyanyu lyaa na ongamba, omulumentu omuposi okwe ekelehi elwakani lye, ota nuka nota yi kuJesus.

“Omwa hala ndi mú ninge ngiini?” Jesus ta pula.

“Omuwa, omeho getu ga tonatithwe,” aaposi yaali taye mu galikana.

Jesus ote ya sile ohenda nota gumu omeho gawo. Pahokololo lyaMarkus, Jesus ota lombwele gumwe gwomuyo a ti: “Inda, eitaalo lyoye olye ku hupitha.” Mbalambala aaposi aaheheli otaya vulu okumona ko, nosha yela kutya ayehe yaali otaya tameke okusimaneka Kalunga. Sho aantu ayehe taya mono shoka sha ningwa po, otaya tameke wo okutanga Kalunga. Mbalambala Bartimeus nakuume ke otaya tameke okulandula Jesus.

Sho Jesus ta piti muJeriko, omu na omangathithi omanene gaantu. Ayehe oya hala okumona ngoka a aludha aalumentu aaposi. Aantu okuza koombinga adhihe otaya thininike Jesus, noshilanduliko osho kutya yamwe itaya vulu nokuli oku mu mona nando okashona. Mokati kawo omu na Sakeus, omukuluntu gwaateloni muJeriko nomomudhingoloko gwasho. Ye omufupi noonkondo okumona shoka tashi ningwa po.

Onkee ano Sakeus ota matuka u uka komeho nota londo komukwiyu gu li pooha dhondjila ndjoka Jesus te ende. Ota vulu okumona ko nawa okuza hoka. Sho omangathithi gaantu taga thiki popepi naampoka, Jesus ota tala komuti noti ithana: “Sakeus, za ko nziya, oshoka nena ndjika ndi na okuuhala megumbo lyoye.” Sakeus ota londoloka nenyanyu note endelele a ye kegumbo a ka longekidhile sha omuyenda gwe a simanenena.

Ihe sho aantu taya mono shoka sha ningwa po, otaya tameke ayehe okunyenyeta. Payo inashi opala opo Jesus a kale omuyenda gwomulumentu a tya ngaaka. Ou shi kutya Sakeus okwa ningi omuyamba mokuyuga aantu iimaliwa shaahe li pauyuuki mongeshefa ye yokufutitha oompale.

Aantu oyendji otaye ya landula naashono Jesus ta yi megumbo lyaSakeus, otaya nyenyeta taya ti: “Okwa yi mo e ku uhale nomulumentu omulunde.” Ihe Jesus oku wete kutya Sakeus otape ya e ki iyele ombedhi. Jesus ina yemata, oshoka Sakeus ota thikama e ta ti: “Tala, oshitopolelwakati shiinima yandje otandi shi gandjele oohepele, nongele ku na ngoka nde mu yugu niifundja otandi mu shunine lune.”

Sakeus otu ulike kutya eiyelombedhi lye olyashili mokugandja po oshitopolelwakati shiinima ye koohepele nomokulongitha oshitopolelwakati shilwe okushunina mboka a yugu niifundja. Osha yela kutya ota vulu okuyalula ta tala momambo ge goompale kutya iikolo ingapi yaantu mbaka e na. Onkee ano ta gana kutya ote ya shunine ayihe lune, metsokumwe nompango yaKalunga ndjoka tayi ti: ‘Ngele ku na omuntu ta yaka po onzi, oye oku na okufuta oonzi ne monzi yimwe.’

Jesus okwa hokwa omukalo ngoka Sakeus tu uvaneke okutopola iiniwe ye, oshoka Ota ti: “Onena tuu ndjika egumbo ndika lya mono elago, oshoka naye wo omuna gwaAbraham, oshoka Omuna gwOmuntu e ya okukonga nokuhupitha shono sha kana.”

Jesus opo a li a yelitha nehokololo lyomumati a kanene onkalo ‘yaamboka ya kana.’ Ngashingeyi otu na oshiholelwa sho sheneshene shagumwe ngoka a li a kana e ta monika. Nonando aawiliki yelongelokalunga nosho wo mboka taye ya landula otaya nyenyeta kombinga yokugandja eitulomo kwaJesus kaantu ngaashi Sakeus, Jesus ota tsikile nokukonga aana yaAbraham mbaka ya kana noku ya galulula. Mateus 20:29-34; Markus 10:46-52; Lukas 18:35–19:10; Eksodus 22:1, OB-1986.

▪ Osha yela kutya openi Jesus ta tsakaneke aaposi aaheheli note ya ningile shike?

▪ Sakeus oye lye nomolwashike ta londo komuti?

▪ Sakeus otu ulike ngiini kutya okwi iyela ombedhi?

▪ Oshiilongomwa shini tatu vulu okwiilonga mokukala kwaJesus naSakeus?