Ontopolwa 12

Jesus ta ninginithwa

OOMWEDHI hamano lwaampono konima sho Johannes a tameke okuuvitha, Jesus, ngoka ethimbo ndyoka a li e na oomvula 30, ote ya kuye puJordan. Omolwashike mbela? Oku mu talela po mbela? Jesus okwa hokwa owala mbela okuhuma komeho kwiilonga yaJohannes? Aawe, Jesus ota pula Johannes e mu ninginithe.

Johannes ote shi tindi mbalambala ta ti: “Ongame ndi na [okuninginithwa, NW] kungoye, ongoye noto ya kungame”? Johannes okwa tseya kutya ntsezi ye Jesus oye Omwana gwaKalunga i ikalekelwa. Nokuli Johannes okwa nukile mela lyayina kenyanyu sho Maria, ngoka a li metegelelo lyaJesus, a li e ya talele po! Yina yaJohannes, Elisabet, osha yela kutya konima yethimbo okwe shi mu hokololele. Nokwa li e mu hokololele wo kombinga yokutseyitha kwomuyengeli evalo lyaJesus nosho wo kombinga yokuholokela aasita kwaayengeli uusiku mboka Jesus a valwa.

Ano Jesus ke shi omukwiilongo kuJohannes. Na Johannes oku shi kutya okuninginitha kwe kaku na sha naJesus. Okwaamboka tayi iyele ombedhi omolwoondjo dhawo, ihe Jesus ke na nando ondjo yasha. Ihe nonando Johannes ta tindi, Jesus ota kondjitha: “Zimina tuu; oshoka osho ngeyi tatu opaleke okugwanitha uuyuuki auhe.”

Omolwashike mbela shi li mondjila opo Jesus a ninginithwe? Omolwashoka eninginitho lyaJesus itali ulike eitedhululo lyoondjo, ihe otali ulike okwiigandja kwe a longe ehalo lyaHe. Jesus okwa li omuhongi gwiipilangi, ihe ngashingeyi ethimbo olya thikana kuye okutameka iilonga yuukalele mbyoka Jehova Kalunga e mu tumu a longe kombanda yevi. Oto dhiladhila mbela kutya Johannes okwa li a tegelela kutya otapu ningwa sha inaashi monika nando onale uuna ta ninginitha Jesus?

Konima yethimbo Johannes ota ti: “Oonguka a tumu ndje [okuninginitha, NW] nomeya, oye a lombwele ndje: Oonguka to mu mono, Ombepo te mu lambele nota kala po, oye tuu ngoka ta [ninginitha] nOmbepo Ondjapuki.” Ano Johannes oku na etegameno kutya ombepo yaKalunga otayi ke ya kombanda yaangoka ta ninginitha. Ngiika omolwashono sho Jesus ta zi momeya Johannes inaa kumwa shili okumona “Ombepo yaKalunga ya fa onguti ya kuluka noye mu [lambele].”

Ihe oshindji shi vulithe mpoka otashi ningwa sho Jesus ta ninginithwa. ‘Egulu olye mu egulukile.’ Shika otashi ti shike mbela? Osha yela kutya otashi ti kutya manga ta ninginithwa, okudhimbulukwa onkalamwenyo ye megulu manga inaa ninga omuntu otaku shuna kuye. Ano ngashingeyi Jesus ota dhimbulukwa thiluthilu onkalamwenyo ye e li omwana gwaJehova Kalunga gwopambepo, mwa kwatelwa iinima ayihe mbyoka Kalunga e mu lombwele megulu pethimbo lyokukala po kwe manga inaa ninga omuntu.

Kakele kaashono, pethimbo lyokuninginithwa kwe, megulu omwa zi ewi tali ti: “Nguka Omumwandje omuholike nde mu hokwa.” Ewi olyalye mbela? Ewi lyaJesus mwene mbela? Hasho nando! OlyaKalunga. Osha yela kutya Jesus Omwana gwaKalunga, haye Kalunga, ngaashi aantu yamwe haya ti.

Ihe Jesus omwana gwaKalunga gwopantu, ngaashi naanaa omuntu gwotango Adam a li. Omulongwa Lukas, konima yokuhokolola okuninginithwa kwaJesus, ota nyola ta ti: “Ano Jesus sho a tameke okuholoka, oomvula dhe odha li dhi thike pomilongo ndatu, nokwa li ngaashi a tengenekwa, omuna gwaJosef yaEeli, . . . omuna gwaDavid, . . . [omuna gwaAbraham, . . . omuna gwaNoa, . . . omuna gwaAdam, omuna gwaKalunga, NW].”

Ngaashi naanaa Adam a li “omuna gwaKalunga” gwopantu, Jesus naye osho wo e li. Jesus oye omuntu omunenenene ngoka a li ko nale, naashika otashi tu yelele uuna tatu konakona onkalamwenyo yaJesus. Ihe Jesus peninginitho lye, ota yi mekwatathano epe naKalunga nota ningi wo Omwana gwaKalunga gwopambepo. Ngashingeyi mondunge yopathaneko, Kalunga ote mu ithana a shune megulu note shi ningi moku mu tula mondjila ndjoka tayi ke mu fala mokugandja omwenyo gwe gwopantu sigo aluhe gu li eyambo omolwaantu ya pangulwa. Mateus 3:13-17; Lukas 3:21-38; 1:34-36, 44; 2:10-14; Johannes 1:32-34; Aaheberi 10:5-9.

▪ Omolwashike Jesus e shiwike kuJohannes?

▪ Molwashoka Jesus ina yona sha, omolwashike ano ta ninginithilwa?

▪ Okutala kwaashoka Johannes e shi kombinga yaJesus, omolwashike tashi vulika inaa kumwa sho ombepo yaKalunga tayi lambele kuJesus?