Ontopolwa 42

Jesus ta nyenyetele Aafarisayi

JESUS ota tompathana nayo kutya ngele okoonkondo dhaSatana ye ta tidha mo oompwidhuli, ano Satana oti itsile ondumbo ye mwene. “Ningeni omuti omwaanawa niiyimati yagwo iiwanawa,” ota tsikile, “nenge mu ninge omuti omwiinayi niiyimati yagwo iiwinayi; oshoka omuti ohagu dhimbululwa kiiyimati yagwo.”

Osha nika uugoya okupopya kutya oshiyimati oshiwanawa shokutidha mo oompwidhuli kwaJesus oshi li oshilanduliko shokulongela Satana. Ngele iiyimati iiwanawa, nena omuti itagu vulu okukala omwiinayi. Mepingathano naashono, iiyimati iiwinayi yAafarisayi yomalundilo ga nika uugoya nepataneko kaali na ekankameno okupataneka Jesus otayi ulike kutya nayo wo aawinayi. “Oluvalo ne lwomapili,” Jesus ti igidha, “otamu wapa ngiini okupopya uuwanawa, one yene sho mu li po aawinayi? Oshoka shono shu udhilila [momutima, osho shoka okana take shi popi, OB-1986].”

Molwashoka oohapu dhetu ohadhi ulike onkalo yomitima dhetu, shoka tatu popi osho tashi tu pangulitha. “Otandi mú lombwele,” Jesus ta ti, “okehe tuu ohapu yowala aantu taa tumbula, oyo ye na oku yi pulwa esiku lyepangulo. Oshoka okoohapu dhoye ongoye to uthwa omuyuuki, nokoohapu dhoye ongoye to pewa uusama.”

Nonando Jesus okwa longa iilonga oyindji yoonkondo, aanongoraamata nAafarisayi otaya pula taya ti: “Omuhongi, otse twa hala, u tu ulukile endhindhiliko.” Nonando aalumentu mbaka yokuJerusalem otashi vulika inaaya mona yo yene iikumithalonga ye, opu na uunzapo waamoni nomeho mboka itau vulu okupatanekwa kutya yo oya ningwa. Onkee ano Jesus ta lombwele aawiliki Aajuda ta ti: “Epipi ndika ewinayi tali hala endhindhiliko, ihe itali pewa endhindhiliko lilwe, aawe, olyo tuu alike lyomuprofeti Jona.”

Jesus ota yelitha shoka a hala okutya: “Ngashika Jona a kalele mela lyoshikwameya omitenya ndatu nomausiku gatatu, ano osho wo nOmuna gwOmuntu ota ka kala kohi yevi omitenya ndatu nomausiku gatatu.” (KB) Jona sho a ninwa po kohi, okwa zi mo a fa ongo a yumuka kuusi, nonkee ano Jesus ta hunganeke kutya ye ota ka sa nota ka yumuka mesiku etitatu. Ihe aawiliki Aajuda, nokuli sho Jesus a yumuka konima yethimbo, otaye ekelehi ‘endhindhiliko lyaJona.’

Onkee ano Jesus ta ti kutya aalumentu yokuNinive mboka yi itedhululithwa keuvitho lyaJona, otaya ka yumuka pepangulo ya pangule Aajuda mboka ye ekelehi Jesus. Sha faathana, ota ningi efaathanitho nomukwaniilwakiintu gwokuSaba, ngoka a zile kooha nooha dhevi okupulakena uunongo waSalomo nokwa li a kuminwa shoka a mono noku uvu. Jesus ota ti: “Ihe oonguka e li mpaka, oku vule Salomo.”

Opo nduno Jesus ota hokolola ethaneko lyomulumentu ngoka muye tamu zi ombepo ya nyata. Ihe omulumentu ehala ite li udhitha niinima iiwanawa, ano ota kwatwa koombepo heyali oombwinayi dhi yi vule. “Ano epipi ndika osho tali ningilwa,” Jesus ta ti. Oshigwana shaIsrael oshi iyopaleke noshi itedhulula—ngaashi okuza po kwopokathimbo kwombepo ya nyata. Ihe okweekelahi aaprofeti yaKalunga kwoshigwana shoka, okwe shi adhitha poshitsa shopombanda shokupataneka kwasho Kristus mwene, tashi ulike onkalo yasho ombwinayi kutya oya kwata miiti unene yi vulithe yopetameko.

Manga Jesus ta popi, yina naamwayina otaye ya po notaya thikama pengathithi lyaantu. Onkee ano gumwe ota ti: “Tala ko, nyoko naamwanyoko ye li pondje noya hala oku ku popitha.”

“Meme olye, naamwameme oolye?” Jesus ta pula. Ota ganeke oshikaha she kaalongwa ye e ta ti: “Tala, meme naamwameme oyo mbaka! Oshoka kehe tuu ngoka ta gwanitha ehalo lyaTate yomegulu, oye omumwameme omulumentu nomumwameme omukiintu nameme.” Komukalo nguno Jesus otu ulike kutya nonando oku kale e hole aakwanezimo ye shi thike peni, pokati ke naalongwa ye opu na ekwatathano lyohole lya kola li vule ndyoka. Mateus 12:33-50; Markus 3:31-35; Lukas 8:19-21.

▪ Ongiini Aafarisayi taya nyengwa okuninga “omuti” omwaanawa nosho wo ‘iiyimati’ iiwanawa?

▪ ‘Endhindhiliko lyaJona’ oshike nongiini tali ke ekelwahi konima yethimbo?

▪ Ongiini oshigwana shaIsrael shomethelemimvo lyotango shi li ngaashi omulumentu ngoka muye mwa zi ombepo ya nyata?

▪ Jesus ota tsu ngiini omuthindo ekwatathano lya kola pokati ke naalongwa ye?