Ontopolwa 37

Jesus ta tidha po oluhodhi lwomuselekadhi

NZIYA konima yokwaaludha omukalele gwelenga omunethele, Jesus ota yi kuNain, oshilando shi li ookilometa dhi vulithe 32 kuuningininolukadhi waKapernaum. Aalongwa ye nosho wo engathithi enene lyaantu otali yi pamwe naye. Otashi vulika kwa li kongulohi sho ya thiki koluha lwaNain. Mpoka otaya tsakaneke osheendo shu uka kefumviko. Omudhimba gwomulumentu omugundjuka ogwa humbatwa okuza moshilando gu ka fumvikwe.

Yina okwa nika oluhodhi olunene, molwashoka ye omuselekadhi naangoka oye awike omunona gwe. Sho omulumentu gwe a si, ye okwa li ta vulu okumona ehekeleko komwana omumati ngoka a li e na. Omuselekadhi okwa kala a tula etegameno lye, omahalo ge nosho wo omalalakano ge konakuyiwa yomwanamati. Ihe ngashingeyi kapu na we ngoka te mu hekeleke. Okwa li a nika oluhodhi olunene manga aantu yomondoolopa taye mu thindikile kehala lyefumviko.

Sho Jesus ta mono omukiintu nguno, omutima gwe otagu inyengithwa koluhodhi lwe olunene. Nohenda, ihe onetokolotoko ndyoka tali mu pe einekelo, ote mu lombwele: “Ino lila.” Iikala ye niilonga ye otayi hili eitulomo lyengathithi lyaantu. Onkee ano sho ta hedha popepi nontala hoka kwa humbatwa omudhimba e te yi gumu, aahumbati otaya thikama ya mwena thilu. Ayehe otayi ipula kutya ota ka ninga po shike.

Oshoshili kutya mboka ye li pamwe naJesus oye mu mona nale ta aludha aantu oyendji komauvu pashikumithalonga. Ihe osha yela kutya inaye mu mona nando onale ta yumudha omuntu kuusi. Mbela ota vulu ngaa oku shi ninga? Jesus ota taalele komudhimba nota ti: “Omugundjuka, otandi ku lombwele, penduka po.” Omulumentu nota kuutumba! Ota tameke ta popi, Jesus note mu gandja kuyina.

Sho aantu ye wete kutya omugundjuka oku na shili omwenyo, otaya tameke okutya: “Omuprofeti omunene a holoka mokati ketu.” Yalwe otaya ti: “Kalunga e ya, a tale aantu ye.” Nziyanziya onkundana kombinga yoshilonga shika oshikumithi otayi taandele muJudea ashihe nomomikunda adhihe dhopuushiinda.

Johannes Omuninginithi natango oku li mondholongo, nokwa hala okutseya oshindji kombinga yiilonga mbyoka Jesus ha vulu okulonga. Aalongwa yaJohannes otaye mu hokololele kombinga yiikumithalonga mbika. Einyengo lye mbela oli li ngiini? Lukas 7:11-18.

▪ Oshike mbela tashi ningwa po sho Jesus ta thiki popepi naNain?

▪ Jesus oti inyengithwa ngiini kwaashono e wete, nota ningi po shike?

▪ Aantu otayi inyenge ngiini koshikumithalonga shika shaJesus?