Ontopolwa 72

Jesus ta tumu 70

OSHO oshikufuthinge shokolundume lwevi shomo 32 E.N., oomvula ndatu komutse okuza peninginitho lyaJesus. Ye naalongwa ye opo ya li ya dhana Oshituthi shOmatsali muJerusalem, nosha yela kutya omo ye li natango momudhingoloko moka. Muushili wo wene, Jesus okwa kala ethimbo olindji lyomoomwedhi hamano ndhoka dha hupu ko dhuukalele we muJudea nenge handiyaka owala yomulonga gwaJordan moshitopolwa shaPerea. Oshitopolwa shika osha pumbwa wo okulongwa.

Dhoshili, konima yOpaasa yomo 30 E.N., Jesus oku uvitha konyala uule woomwedhi hetatu muJudea. Ihe sho Aajuda ya li taya kambadhala oku mu dhipaga hoka kOpaasa yomo 31 E.N., okwa kala ta longo omvula netata lwaampono ya landula ko muGalilea omo amuke. Pethimbo ndyoka okwa toto po ehangano enene lyaauvithi ya longekeka, ndyoka a li kee na nale. Ngashingeyi ota tameke noshikonga sheuvitho lya mana mo shahugunina muJudea.

Jesus ota tameke oshikonga shika mokuhogolola aalongwa 70 note ya tumu ooyaali nooyaali. Onkee ano opu na omapando gaauvithi yUukwaniilwa ayehe kumwe ye li 35 mboka taya longo moshitopolwa moka. Mbaka otaya tetekele moshilando kehe nomehala kehe ndyoka sha yela kutya oli li ompangela yaJesus opo li talelwe po, naayapostoli ye otaya yi pamwe naye.

Pehala lyokutuma mboka 70 koosinagoga, Jesus ote ya lombwele ya ye momagumbo gopaumwene note ya yelithile ta ti: “Nonge tamu yi megumbo, tyeni tango: Ombili nayi kale megumbo ndi. Nongele mu na omuna gwombili, ombili yeni otayi mu kalele.” Mbela etumwalaka lyawo oli na okukala lya tya ngiini? Jesus ota ti: “Ne mu ya lombwele: [Uukwaniilwa waKalunga owe, KB] mú hedha popepi.” Matthew Henry’s Commentary otayi ti shi na ko nasha niilonga yaamboka 70: “Ngaashi naanaa Omuhongi gwawo, shaampono ya yi oyu uvitha egumbo negumbo.”

Omalombwelo gaJesus kwaamboka 70 oga faathana naangoka a pele mboka 12 sho e ya tumine moshikonga sheuvitho muGalilea pwa pita konyala omvula yimwe. Mboka 70 ite ya londodha owala shi na ko nasha nomapataneko ngoka tage ke ya adha noku ya longekidha ya gandje etumwalaka kaanegumbo, ihe ote ya pe wo oonkondo okwaaludha aavu. Onkee ano konima yokathimbo sho Jesus ta thiki hoka, oyendji oya li ya hala noonkondo okutsakaneka Omuhongi gwaalongwa mboka haa vulu okulonga iikumithalonga ya tya ngaaka.

Euvitho lyaamboka 70 nolyiilonga yaJesus yomaishunoko otali pula okathimbo okafupi. Nziyanziya omapando 35 gaauvithi yUukwaniilwa otaga tameke okugalukila kuJesus. “Omuwa,” yo taya ti nenyanyu, “noompwidhuli odha vulika kutse omolwedhina lyoye.” Dhoshili, ehokololo lyiilonga lya tya ngaaka ewanawa kwaa na we otali nyanyudha Jesus noonkondo, oshoka ota yamukula ta ti: “Onda mono Satana a gu megulu ongolwaadhi. Tala, onde mú pe oonkondo okulyata omayoka noondje.”

Jesus okwa tseya kutya konima yevalo lyUukwaniilwa waKalunga pethimbo lyehulilo, Satana noompwidhuli dhe oya li taye ku umbwa mo megulu. Ihe eumbomo ndika lyoompwidhuli ihaadhi monika ndyoka tali ningwa kaantu yowala yopanyama otali shilipaleke oshiningwanima shoka shi na okuningwa natango monakuyiwa. Omolwashoka Jesus ta popi egwo lyaSatana megulu lyomonakuyiwa shi li oshinima shoka tashi ka ningwa shili. Onkee ano omondunge yopathaneko mboka 70 taya pewa oonkondo ya lyate omayoka noondje. Ihe Jesus ota ti: “Inamu nyanyukilwa shono, oombepo sho tadhi vulika kune, nyanyukilweni, omadhina geni sho ga nyolelwa megulu.”

Otashi nyanyudha noonkondo Jesus nota tanga He montaneho molwokulongitha aapiya ye aaifupipiki komukalo gwa tya ngaaka gu na oshilonga. Ota pungulukile kaalongwa ye nota ti: “Omeho taga mono mbyoka mwe yi tala, oge na elago. Oshoka tandi mú lombwele, aaprofeti naakwaniilwa ya li ya hala okumona mbyoka tamu yi tala, yo inaaye yi mona, nokuuva mbyoka tamu yi uvu, yo inaaye yi uva.” Lukas 10:1-24; Mateus 10:1-42; Ehololo 12:7-12.

▪ Jesus oku uvitha peni pethimbo lyoomvula ndatu dhotango dhuukalele we, nomoshitopolwa shini ta longo pethimbo lyoomwedhi dhe dhahugunina hamano?

▪ Openi Jesus ta tumu mboka 70 oku ka konga aantu?

▪ Omolwashike Jesus ta ti kutya okwa mona nale Satana ta gu megulu?

▪ Omondunge yini mboka 70 taya vulu okulyata omayoka noondje?