Ontopolwa 82

Jesus ta yi ishewe kuJerusalem

NZIYANZIYA Jesus oku li ishewe mondjila, nota longo aantu oshilando noshilando nosho wo omukunda nomukunda. Osha yela kutya oku li moshitopolwa shaPerea, handiyaka yomulonga gwaJordan okuza muJudea. Ihe uuthikilohala we okuJerusalem.

Edhiladhilo lyAajuda kutya omwaalu owala gwa ngambekwa tagu ka kala gwa gwana okuhupithwa otashi vulika olyo tali ulumike omulumentu a pule ta ti: “Omuwa, oomboka taa hupithwa aashona nani?” Jesus meyamukulo lye ota ningitha aantu ya dhiladhile kombinga yaashoka sha pumbiwa opo ya hupithwe: “Kondjeni, [tashi ti, itulii mo] mu ye mo mosheelo sha thinana.”

Okukondja noonkondo kwa tya ngaaka okwa pumbiwa neendelelo “oshoka,” Jesus ta tsikile ta ti, “oyendji taa ka hala okuya mo notaa ka nyengwa.” Omolwashike mbela taya ka nyengwa? Ota yelitha kutya ‘mwene gwegumbo nge a thikama e te edhile po omweelo, naantu otaya tameke okuthikama pondje nokukonkola pomweelo nokwiithana taya ti: Omuwa, tu egulula, oye te ya yamukula ta ti: Kandi mú shi mpoka mwa zi, zii po pungame, one amuhe aagwanithi yuulunde.’

Mboka ya patelwa pondje, osha yela kutya otaye ya owala pethimbo ndyoka lye yo opalela. Ihe pethimbo ndyoka omweelo gwompito yokuya mo otagu kala gwe edhilwa nale nogwa patwa. Opo ya ye mo, oya li ye na okuya kuyele, nonando kasha li she ya opalela oku shi ninga. Dhoshili, mboka taya kakadhala okuninga egalikano lyaJehova olyo elalakano lyawo enenenene monkalamwenyo yawo inaya tegelela tuu oshizemo shinikitha oluhodhi!

Aajuda mboka ya tuminwa Jesus e ya yakule, oyendji yomuyo inaya longitha ompito yawo ndjika onkumithi okuzimina esiloshimpwiyu lyaKalunga lyehupitho. Onkee ano Jesus ta ti kutya otaya ka lila notaye ki ikokota komayego uuna taya tidhilwa pondje. Mepingathano naashika, aantu otaya zi “kuuzilo nokuuninginino nokuumbangalantu nokuumbugantu,” eeno, taya zi miigwana ayihe, notaya “kuutumba poshililo [muukwaniilwa waKalunga, KB].”

Jesus ota tsikile ta ti: “Oku na aahugunini [mboka ya dhinika kaaye shi Aajuda, nosho wo Aajuda mboka ya thininikwa] taa ningi yotango, noku na yotango [Aajuda mboka ya yambekwa pamaliko nopambepo] taa ningi aahugunini.” Okukala kwawo aahugunini, otashi ti kutya aantu ya tya ngaaka aananyalo noihaaya pandula itaya ka kala nando mUukwaniilwa waKalunga.

Ngashingeyi Aafarisayi otaye ya kuJesus notaya ti: “Thikama, ngu u ze po [mpaka], Herodes [Antipas] a hala oku ku dhipaga.” Otashi vulika Herodes mwene oye ta tameke okutaandeleka omutoto nguka okuyitha Jesus ontuku okuza moshitopolwa. Otashi vulika Herodes a li a tila okukala e na ombinga meso lyomuprofeti gulwe gwaKalunga, ngaashi a li e yi na medhipago lyaJohannes Omuninginithi. Ihe Jesus ota lombwele Aafarisayi ta ti: “Indeni, mu ka lombwele ombandje ndjoka: Tala, onena nanofu te tidha mo oompwidhuli notandi aludha, nesiku etitatu otandi adha kethikilo lyandje.”

Konima sho Jesus a mana iilonga ye hoka, ota tsikile nolweendo lwe okuya kuJerusalem, oshoka ngaashi ye ta yelitha, “itashi [vulu okupitikwa opo, NW] omuprofeti a sile palwe, muJerusalem omo tuu.” Omolwashike mbela kwa tegelelwa Jesus a ka dhipagelwe muJerusalem? Omolwashoka Jerusalem osho oshilandopangelo moka mu na ompangu yopombanda yOsanhedrin, ndjoka ya thikama miilyo 71, nomo moka hamu yambelwa omayambo giinamwenyo. Onkee ano itashi ka kala sha pitikwa opo “Onzigona yaKalunga” yi dhipagelwe pehala lilwe kaali shi Jerusalem.

“Jerusalem, Jerusalem ongoye nguka ho dhipaga po aaprofeti noho dhipaga po nomamanya oomboka we ya tuminwa,” Jesus te shi lili, “halwindjilwindji nda li nda hala okugongela aamwoye ongondjuhwa hayi gongele uuyuhwena momawawa gayo, ihe ne inamu hala. Tala, ongulu yeni otayi kala owala.” Oshigwana osha pangulwa molwashoka oshe ekelehi Omwana gwaKalunga!

Sho Jesus ta tsikile nokuya kuJerusalem, okwa hiywa kegumbo lyomukuluntu gumwe gwAafarisayi. Olyo Esabati, naantu otaya tala Jesus nawa, oshoka opu na omulumentu ta hepekwa koshizinda, tashi vulika omeya gi igongela momaako ge nomomagulu ge. Jesus ota popi nAafarisayi naanongo yOmpango mboka ye li po note ya pula ta ti: “Okwaaludha omuntu mEsabati oku uka tuu nenge aawe?”

Kapu na nando gumwe ta popi sha. Onkee ano Jesus ta aludha omulumentu note mu laleke. Opo nduno ota pula ta ti: “Olye ano gwomune e na omwana nenge ongombe tayi gwile momuthima, ite yi hili mo ando mbalambala nando ku na Esabati?” Natango kapu na ngoka ta yamukula sha. Lukas 13:22–14:6; Johannes 1:29.

▪ Jesus otu ulike shike osho sha pumbiwa omolwokuhupithwa, nomolwashike oyendji ya patelwa pondje?

▪ Oolye “aahugunini” mboka taya ka kala yotango, noolye “yotango” mboka taya ka kala aahugunini?

▪ Otashi vulika omolwetompelo lini taku tiwa kutya Herodes okwa li a hala okudhipaga Jesus?

▪ Omolwashike itaashi pitikwa opo omuprofeti a dhipagelwe pondje yaJerusalem?