Ontopolwa 38

Johannes okwa li mbela kee na eitaalo?

JOHANNES Omuninginithi, ngoka ngashingeyi e li mondholongo uule womvula lwaampono, otu uvu onkundana yi na ko nasha neyumuko lyomwanamati gwomuselekadhi gwokuNain. Ihe Johannes okwa hala e shi uve kuJesus mwene kutya shika otashi ti shike, onkee ano ota tumu yaali yomaalongwa ye, ye mu pule: “Ongoye tuu nguka onakuya, nenge tu tegelele gulwe?”

Epulo ndika otashi vulika tali kumitha, unene tuu molwashoka Johannes okwa monene ombepo yaKalunga tayi kulukile kuJesus noku uvile ewi lyaKalunga lyoku mu hokwa sho ta ninginitha Jesus pwa pita oomvula mbali lwaampono. Epulo lyaJohannes otali vulu okweeta yamwe pehulithodhiladhilo kutya eitaalo lye olya nkundipala. Ihe hasho ngaaka. Andola Johannes okwa tamekele okulimbililwa ando Jesus ine mu lenga shi thike mpono, ngaashi te shi ningi pompito ndjika. Omolwashike nduno Johannes ta pula epulo ndino?

Otashi vulika Johannes a hala owala Jesus e shi koleke kutya Ye oye Messias. Shika otashi ka koleka unene Johannes manga e li mondholongo ta thithonoka po. Ihe osha yela kutya epulo lyaJohannes olya kwatela mo oshindji shi vulithe mpoka. Osha yela kutya ye okwa hala okutseya ngele opu na gumwe i ili te ke ya, omulanduliko gwopathaneko, ngoka ta ka gwanitha iinima ayihe mbyoka ya li ya hunganekwa tayi ka longwa kuMessias.

Pamahunganeko gOmbimbeli ngoka Johannes e shi, Omugwayekwa gwaKalunga ota ka kala e li omukwaniilwa, omuhupithi. Ihe Johannes okwe edhililwa natango e li onkwatwa, nokuli oomwedhi odhindji okuza konima yokuninginithwa kwaJesus. Onkee ano osha yela kutya Johannes ota pula Jesus ta ti: ‘Ongoye tuu shili ngoka ta ka dhika po Uukwaniilwa waKalunga, nenge opu na gulwe i ili, omulanduliko, ngoka tu na okutegelela okugwanitha omahunganeko agehe omakumithi ge na ko nasha neadhimo lyaMessias?’

Pehala lyokulombwela aalongwa yaJohannes ta ti: ‘Osho lela, ongame ngoka a li e na okuya!’ otundi oyo tuu ndjoka Jesus ota longo sha oshindhindhilikwedhi mokwaaludha aantu oyendji komikithi nokomauvu gi ili nogi ili. Opo nduno ota lombwele aalongwa ta ti: “Indeni, mu ka hokololele Johannes mbika mwe yi mono nomwe [yi] uvu: aaposi otaa mono niitiningili [otayi] ende, aanuulepela taa yele noombolo taa uvu, aasi otaa yumudhwa noohepele taa uvithilwa evaangeli.”

Niitya yimwe, epulo lyaJohannes otashi vulika tali ulike etegameno kutya Jesus ota ka longa oshindji shi vulithe pwaashoka ta longo notashi vulika ta ka mangulula Johannes. Ihe Jesus ota lombwele Johannes kaa tegelele oshindji kaashi shi iikumithalonga mbyoka Jesus ta longo.

Sho aalongwa yaJohannes taya zi po, Jesus ota taalele komangathithi gaantu note ga lombwele kutya Johannes oye “omutumwa” gwaJehova a hunganekwa muMalakia 3:1, noye wo omuprofeti Elia a hunganekwa muMalakia 4:5, 6. Onkee ano ye okwa lenga Johannes e li e thike pomuprofeti kehe ngoka e mu tetekele nota yelitha: “Oshili tandi mú lombwele: mumboka ya valwa kaakiintu, kaku na omunene e vule Johannes [Omuninginithi]; ihe oonguka omushuushuka [gwomuukwaniilwa wegulu] oye e mu vule. Ihe okomasiku gaJohannes [Omuniginithi] nosigo onena [uukwaniilwa wegulu otau] matukilwa.”—Yelekanitha NW.

Jesus otu ulike mpaka kutya Johannes ita ka kala mUukwaniilwa womegulu, molwashoka omushuushuka gwamo, omunene e vule Johannes. Johannes okwa longekidhile Jesus ondjila, ihe okwa si manga Kristus inaa ninga ehangano nenge euvaneno naalongwa ye, ya ka kale aapangeli pamwe naye mUukwaniilwa we. Osho molwashono, Jesus ta ti kutya Johannes ita ka kala mUukwaniilwa womegulu. Pehala lyaashono, Johannes ota ka kala omulelwa gwokevi gwUukwaniilwa waKalunga. Lukas 7:18-30; Mateus 11:2-15.

▪ Omolwashike Johannes ta pula ngele Jesus oye Onakuya nenge oye na okutegelela gulwe?

▪ Omahunganeko geni Jesus ta ti kutya oga gwanithwa kuJohannes?

▪ Omolwashike Johannes Omuninginithi itaa ka kala pamwe naJesus megulu?