Ontopolwa 11

Johannes ta longekidha ondjila

OPWA pita oomvula 17 okuza sho Jesus a li okanona koomvula 12 a li ta pula aalongihapu motempeli. Osha li poshitemamvula shomumvo 29 E.N., nosha yela kutya ayehe otaya popi kombinga yantsezi yaJesus Johannes, ngoka tu uvitha moshilongo ashihe momudhingoloko gwomulonga gwaJordan.

Johannes oye shili omulumentu omundhindhilikwedhi momutalelo nosho wo mokupopya. Oonguwo dhe odhiifufu yongamelo, noha zala epaya lyoshipa mombunda ye. Iikulya ye oombahu nomagadhi goonyushi. Netumwalaka lye olini mbela? “Itedhululeni, oshoka [uukwaniilwa wegulu we, KB] ya popepi.”

Etumwalaka ndika otali nyanyudha aapulakeni ye. Oyendji oya tseya kutya oya pumbwa okwiitedhulula, sha hala okutya, okulundulula iikala yawo nokweekelahi onkalamwenyo yawo yonale ombwinayi. Onkee ano aantu oyendjiyendji okuza kiitopolwa ayihe yomomudhingoloko gwaJordan nonokuli nokuJerusalem, otaye ya kuJohannes, note ya ninginitha, te ya ninginitha kohi yomeya gaJordan. Omolwashike?

Johannes ota ninginitha aantu shi li endhindhiliko nenge ezimino lyokwiitedhulula kwashili molwokuyona ehangano lyOmpango yaKalunga. Onkee ano sho Aafarisayi nAasadukayi yamwe taye ya kuJordan, Johannes te ya pangula. “Oluvalo lwomapili ne,” ye ta ti. “Imikeni . . . iiyimati yeitedhululo, ne inamu idhiladhila mune yene mu tye: Abraham oye tate; oshoka ongame otandi mú lombwele, Kalunga ota vulu okushitila Abraham oluvalo momamanya ngaka. Ekuya olya tulwa nokuli komakota gomiti; ano kehe tuu omuti, ihagu imi iiyimati iiwanawa, otagu kewa po notagu umbilwa momulilo.”

Molwashoka Johannes ota pewa eitulomo olindji, Aajuda otaya tumu kuye aasaseri nosho wo Aalevi. Otaye mu pula: “Ongoye olye?”

“Hangame Kristus,” Johannes ta ti.

“Ongoye olye ano?” taye mu pula. “Ongoye Elias?”

“Aawe, hangame,” ta yamukula.

“Ongoye omuprofeti ngwiyaka?”

“Aawe.”

Otaye mu kondjitha ano: “Ongoye olye ano, tu ka fale eyamukulo kumboka ye tu tumu. Ongoye to itile ngiini?”

Johannes ota yelitha: “Ongame ewi lyomwiigidhi mombuga; Yelekanithileni Omuwa ondjila, ngashika omuprofeti Jesaja a tile.”

“Oshike ano ho [ninginitha, NW],” oya hala ye shi tseye, “ongoye ngele ku shi Kristus nenge Elias nenge omuprofeti ngwiyaka?”

“Otandi [ninginitha] nomeya,” osho ta yamukula. “Ihe mokati keni [omwa] thikama nguka mwaaye mu shi. Oye tuu nguka te ya konima yandje.”

Johannes ota longekidha ondjila mokutula aantu monkalo yokomutima yu uka okutaamba ko Messias, ngoka ta ka ninga Omukwaniilwa. Johannes ota popi kombinga ye ta ti: “Ngoka te ya konima yandje, e vule ndje oonkondo, ongame noinandi opala nando okuhumbata oongaku dhe.” Dhoshili, Johannes ota ti nokuli: “Oongoka ta landula ndje, okwa li ndje komeho, oshoka oye oko a li, manga ongame nda li ndaa ko.”

Onkee ano etumwalaka lyaJohannes, “uukwaniilwa wegulu we ya popepi,” tali longo li li etseyitho lyomontaneho kutya uukalele wOmukwaniilwa gwaJehova ngoka a tulwa po, Jesus Kristus, ou li pokutameka. Johannes 1:6-8, 15-28; Mateus 3:1-12, KB; Lukas 3:1-18; Iilonga 19:4.

▪ Johannes omulumentu a tya ngiini?

▪ Omolwashike Johannes ta ninginitha aantu?

▪ Omolwashike Johannes ta vulu okutya kutya Uukwaniilwa owe ya popepi?