Ontopolwa 18

Johannes ta shonopala, Jesus ta nenepala

KONIMA yOpaasa yoposhitemamvula shomo 30 E.N., Jesus naalongwa ye otaya zi muJerusalem. Itaya shuna ano komagumbo gawo muGalilea, ihe otaya yi komukunda Judea, hoka taya ka ninginitha aantu. Johannes Omuninginithi iilonga oyo tuu mbyoka ote yi longo ngashingeyi uule womvula lwaampono, noku na natango aalongwa puye.

Dhoshili, Jesus haye mwene ta ninginitha aantu, ihe aalongwa ye oyo taye shi ningi kohi yewiliko lye. Okuninginitha kwawo oku na eityo limwe alike nokwaJohannes, oko endhindhiliko lyokwiiyela ombedhi kwOmujuda molwokuyona kehangano lyOmpango yaKalunga. Ihe konima yokuyumuka kwe, Jesus ota lombwele aalongwa ye ya ninginithe aantu netompelo lilwe. Eninginitho lyopaKriste nena olyo endhindhiliko lyokwiigandja kwomuntu okulongela Jehova Kalunga.

Ihe Jesus petameko lela lyuukalele we, ye naJohannes, nonando otaya longo ya topoka, yo otaya longo notaya ninginitha aantu mboka yi iyela ombedhi. Ihe aalongwa yaJohannes oya tsa ondumbo notaya nyenyeta puye shi na ko nasha naJesus taya ti: “Rabbi, . . . tala, oye ta [ninginitha, NW], naayehe otaya yi kuye.”

Johannes pehala lyokukala a tsa ondumbo, okwa nyanyukilwa oku shi enditha nawa kwaJesus nokwa hala wo aalongwa ye ye shi nyanyukilwe. Ote ya dhimbulukitha ta ti: “One yene oonzapo dhandje, ngame sho nda tile: hangame Kristus, ihe onda tumwa oku mu tetekela.” Opo nduno ota longitha eudhi ewanawa: “Oongoka e na omufuko, [oye] ombushiki; ihe kuume kombushiki ngoka a thikama note mu pulakene, oye ta nyanyukilwa shili ewi lyombushiki. Ano enyanyu lyandje olya gwanenena.”

Johannes, e li kuume kOmbushiki, oomwedhi hamano lwaampono dha piti okwa nyanyukililwe sho a tseyitha aalongwa ye Jesus. Yamwe yomokati kawo oya ningi iilyo yomonakuyiwa yongundu yomuyalekwa gwaKristus gwomegulu yAakriste ya gwayekwa nombepo. Johannes okwa hala aalongwa ye mbono ye li puye ya landule wo Jesus, oshoka elalakano lye olyo okulongekidhila ondjila uukalele waKristus mboka tau ende nawa. Ngaashi Johannes Omuninginithi ta yelitha: “Oye e na okunenepala, ihe ngame ondi na okushonopala.”—OB-1986.

Omulongwa gwaJesus omupe Johannes, ngoka a li wo nale omulongwa gwaJohannes Omuninginithi, ota nyola shi na ko nasha nonakuziwa yaJesus noshilonga She sha simana mehupitho lyaantu, ta ti: “Oongoka ta zi megulu, oye gwokombanda yaayehe. . . . [He] oye e hole Omwana nokwa gandja ayihe moshikaha she. Oongoka i itaala Omwana (gwaKalunga), oye e na omwenyo gwaaluhe; ihe oongoka ita vulika kOmwana, ita ka mona ko omwenyo, ihe ondjahi yaKalunga otayi kala kombanda ye.”

Ethimbo efupi konima sho Johannes Omuninginithi a kundathana okushonopala kwiilonga ye, okwa kwatwa po komukwaniilwa Herodes. Herodes okwa kutha po Herodias, omukulukadhi gwamumwayina Filippus, a ninge omukulukadhi gwe, naashono Johannes a holola montaneho iilonga ye yaa fele, Herodes okwe mu tulitha mondholongo. Sho Jesus tu uvu kombinga yokukwatwa po kwaJohannes, ye naalongwa ye otaya zi mo muJudea e taya yi kuGalilea. Johannes 3:22–4:3; Iilonga 19:4; Mateus 28:19; 2 Aakorinto 11:2; Markus 1:14; 6:17-20.

▪ Omaninginitho ngono ga ningwa kohi yewiliko lyaJesus ga tetekela eyumuko lye otaga ti shike? Nomaninginitho gokonima yeyumuko lye otaga ti shike?

▪ Johannes otu ulike ngiini kutya okunyenyeta kwaalongwa ye kaku li pauyuuki?

▪ Omolwashike Johannes a tulwa mondholongo?