Ontopolwa 78

Kaleni mwi ilongekidha!

KONIMA yokulondodha omangathithi gaantu shi na ko nasha nolwiho nokukumagidha aalongwa ye kaaya gandje eitulomo inaali pumbiwa kiinima yopanyama, Jesus ote ya ladhipike ta ti: “Ino tila, ngoye oshigunda oshishona, oshoka Ho a hala oku mú pa [uukwaniilwa, KB].” Kungeyi ota holola kutya omwaalu omushona gwowala (konima yethimbo gu ulikwa gu li 144 000) tagu ka kala mUukwaniilwa womegulu. Oyendji yomwaamboka taya ka mona omwenyo gwaaluhe, otaya ka kala aalelwa yUukwaniilwa yokombanda yevi.

“Uukwaniilwa” kau shi tuu omagano omakumithi! Jesus ota hokolola nkene aalongwa ye na okwiinyenga uuna taye u pewa note ya ladhipike ta ti: “Landeni po eliko lyeni, ne mu gandje iipewahenda.” Eeno, oye na okulongitha iiniwe yawo okukwathela yalwe pambepo nokungeyi otayi ilikolele “eliko megulu ihali hulu po.”

Opo nduno Jesus ota kumagidha aalongwa ye kutya oye na okukala yi ilongekidhila okugaluka kwe. Ota ti: “Oombwetelo dheni nadhi kale dha mangwa, noolamba dheni dha hwama, ne mu fe aantu ya tegelela omuwa gwawo ta zi kohango, opo ye mu [egulule] nziya, nge te ya nota konkola. Aanelago [aapiya, KB] mboka omuwa gwawo te ya adha ya tonata, nge te ya, oshili tandi mú lombwele, oye ti izaleke note ya lombwele, ya kuutumbe, note ya yakula.”

Meudhi ndika, eilongekidho lyaapiya pokugaluka kwomuwa gwawo otali ulikwa kokuhutila oonguwo dhawo oonde pombanda noku dhi homeka momapaya gawo nokugwanitha iinakugwanithwa yawo sigo omokati kuusiku kuuyelele woolamba dhu udha omahooli. Jesus ota yelitha ta ti: ‘Ngele omuwa te ya pelangelo etiyali [okuza pomugoyi gwuusiku lwaampono sigo omokati kuusiku] nenge nokuli pelangelo etitatu [okuza pokati kuusiku sigo opondatu yongula lwaampono], note ya adha yi ilongekidha, oyo aanelago.’

Omuwa ota futu aapiya ye pamukalo inaagu monika nale. Ote ya lombwele ya kuutumbe poshitaafula note ya yakula. Ite ya yakula ngaashi aapiya, ihe ongaashi ookuume aadhiginini. Ondjambi ndjoka taya pewa molwashoka ya tsikile okulongela omuwa gwawo uusiku auhe manga ya tegelela okugaluka kwe kayi shi tuu ombwanawa! Jesus ota hulitha ta ti: ‘Nane wo osho mu kale mwi ilongekidha, oshoka Omuna gwOmuntu ote ya ethimbo ndyoka inamu li tengeneka.’

Ngashingeyi Petrus ota pula: “Omuwa, eyele ndi otse we li lombwele nenge ayehe?”

Pehala lyokugandja eyamukulo lyu ukilila, Jesus ota hokolola eudhi lilwe. Ote ya pula ta ti: “Olye ano elenga lyegumbo omudhiginini nomunandunge, mwene gwe e mu pa elelo [lyaapiya] ye, e ya pe oondya pethimbo lyadho? [Omupiya, KB] omunelago ngoka mwene gwe nge te ya note mu adha ta longo ngeyi. Oshili tandi mú lombwele: oye te mu pe elelo lyiinima ye ayihe.”

Osha yela kutya Jesus Kristus oye “mwene.” “Elenga” otali thaneke “oshigunda oshishona” shaalongwa ayehe kumwe, na ‘aapiya’ otayu ulike kongundu oyo tuu ndjoka yo 144 000 ndjoka tayi pewa Uukwaniilwa womegulu, ihe uutumbulilo mbuka otau tsu omuthindo iilonga yawo pauhandimwe. ‘Iinima’ mbyoka elenga edhiginini li na okutonatela, oyo iinima yamwene yopaukwaniilwa yokombanda yevi, moka mwa kwatelwa aalelwa yUukwaniilwa yokombanda yevi.

Jesus ota tsikile neudhi notu ulike kutya otashi vulika hailyo ayihe yongundu yelenga nenge yomupiya tayi ka kala iidhiginini, mokuyelitha ta ti: “Ihe [omupiya] ngo nge ti ipopile momwenyo gwe: Omuwa gwandje ite ya mbala, nota tameke okudhenga [aapiya] naadhike nokulya nokunwa nokukolwa, mwene [gwomupiya] ngoka note ya esiku ndyoka ine mu tegelela, . . . [ote mu geyele noonkondo adhihe, NW].”—Yelekanitha KB.

Jesus ota ndhindhilike kutya okuya kwe okwe etele Aajuda ethimbo edhigu, oshoka yamwe oya taamba ko omalongo ge nayalwe oye ge ekelehi. Oomvula dhi vulithe pundatu dha piti, okwa li a ninginithwa momeya, ihe ngashingeyi eninginitho lye meso oli li pokupwa, nota ti: “Onda thiminikwa komwenyo sigo tali gwanithwa.”

Konima sho Jesus a lombwele aalongwa ye iinima mbika, ota popi ishewe nomangathithi gaantu. Okwa yemata sho taya tindi nokutangalala okuzimina uunzapo wa yela kutya oye lye naashoka tau ti. Ota ti: “Nge tamu mono omugamba gwa mena kuuninginino, otamu ti: Omvula tayi ya, nosho tayi ya. Nombepo yokuumbugantu nge tayi pepe, otamu ti: Taku zi oluteni, nosho talu ningi wo. Aafudhime ne, mu shi kunongela oshipala shevi noshegulu, ihe mwaa shi kunongela ngiini ano ethimbo ndika?” Lukas 12:32-59.

▪ “Oshigunda oshishona” osha thikama po miilyo ingapi, noshike tayi pewa?

▪ Jesus ota tsu ngiini omuthindo nkene sha pumbiwa opo aapiya ye ya kale yi ilongekidha?

▪ Meudhi lyaJesus olye “mwene,” “elenga,” ‘aapiya’ nosho wo ‘iinima’?