Ontopolwa 132

Kolulyo lwaKalunga

ETILILO lyombepo ondjapuki pOpentekoste olyo euliko kutya Jesus okwa shuna megulu. Emoniko ndyoka tali monika komulongwa Stefanus mbala konima yaashino otali ulike wo kutya Ye okwa thika moka. Manga owala Stefanus inaa dhipagwa nomamanya molwiilonga ye yokugandja uunzapo nuudhiginini, oti igidha ta ti: “Tala, ongame ndi lwete omagulu ge eguluka, nOmuna gwOmuntu ku li po a thikama kolulyo lwaKalunga.”

Manga Jesus e li kolulyo lwaKalunga, ota tegelele a lombwelwe kuHe: “Pangela mokati kaaniita nangoye!” Ihe pokati mpono Jesus ota kala ta ningi shike sigo ta katukile aatondi ye onkatu? Ota kala ta pangele nenge ta lele kombanda yaalongwa ye aagwayekwa, te ya wilike miilonga yawo yokuuvitha note ya longekidha okupitila meyumuko okukala ye li aakwaniilwa ooyakwawo mUukwaniilwa waHe.

Pashiholelwa, Jesus ota hogolola Saulus (ngoka konima yethimbo a tseyika nawa nedhina lye lyOshiroma, Paulus) okukwatela komeho iilonga yokuninga aantu aalongwa miilongo yilwe. Saulus oku na uulaadhi shi na ko nasha nOmpango yaKalunga, ihe okwa pukithwa kaawiliki yelongelokalunga lyOshijuda. Oshizemo osho kutya Saulus ina kala owala a panda edhipago lyaStefanus ihe ota yi wo kuDamasko a pewa epitikilo komusaseri omukuluntu kuyakwawo Kaifas oku ka manga aalumentu naakiintu kehe ta mono mboka ye li aalanduli yaJesus noku ya fala kuJerusalem. Ihe manga Saulus e li mondjila yokuya hoka, ombaadhilila ota adhiminwa kuuyelele uunene noti ihata pevi.

“Saulus, Saulus, omolwashike to tidhagana ndje?” ewi tali zi monzo ihaayi monika osho tali pula. “Ongoye lye, Omuwa?” Saulus ta pula.

Eyamukulo olyo: “Ongame Jesus, ngoka to mu tidhagana.”—OB-1986.

Saulus, ngoka a tsikithwa kuuyelele wopashikumithalonga, ota lombwelwa kuJesus a ye muDamasko noku tegelele a pewe omalombwelo. Opo nduno Jesus oti ihololele Ananias memoniko, gumwe gwomaalongwa ye. Jesus ota lombwele Ananias shi na ko nasha naSaulus ta ti: “Oye oshuma shandje sha hogololwa shokuhumbatela mo edhina lyandje okaapagani nokaakwaniilwa nokaana yaIsrael.”

Dhoshili, kekwatho lyaJesus, Saul (ngoka a tseyika ngashingeyi oye Paulus) naauvithi yevaangeli yalwe otaye shi pondola noonkondo miilonga yawo yokuuvitha noyokulonga. Muushili wo wene, oomvula 25 lwaampono konima yokwiihololelwa kwe kuJesus mondjila yokuya kuDamasko, Paulus ota nyola kutya ‘evaangeli’ olyu “uvithilwa aashitwa ayehe yokohi yegulu.”

Konima sho pwa piti oomvula odhindji, Jesus ota gandja omusholondondo gwomamoniko komuyapostoli gwe omuholike, Johannes. Okupitila momamoniko ngaka, ngoka Johannes ta hokolola membombimbeli Ehololo, ye okwa kala a fa opo e li natango sho Jesus ta galuka e li moonkondo dhUukwaniilwa. Johannes ota ti kutya “mombepo,” sha hala okutya, okupitila mombepo ondjapuki, okwa falwa (pamadhiladhilo) methimbo lyokomeho ‘mesiku lyOmuwa.’ “Esiku” ndika olyo shike?

Ekonakono lyuukeka lyomahunganeko gOmbimbeli, mwa kwatelwa ehunganeko lyaJesus mwene kombinga yomasiku gahugunina, otaga holola kutya “esiku lyOmuwa” olya tameka momumvo gwa ndhindhilikwa pandjokonona 1914! Onkee ano Jesus okwa galuka mo 1914 mokwaamonika, inaashi tseyika kaantu ayehe ihe aapiya ye aadhiginini oyo owala ya li ya tseya kutya okwa galuka. Momumvo ngoka Jehova okwa lombwele Jesus a pangele mokati kaaniita naye!

Mokuvulika kelombwelo lyaHe, Jesus okwa yelitha omagulu mokuumba mo Satana noompwidhuli dhe, e yu umbile kombanda yevi. Konima sho Johannes a mono shika tashi ningwa memoniko, otu uvu ewi lyomegulu tali ti: “Ngashingeyi ehupitho noonkondo [nuukwaniilwa owa ninga waKalunga, KB] ketu, nepangelo olya Kristus gwe.” Eeno, Kristus okwa tameke okupangela e li Omukwaniilwa mo 1914!

Shika kasha li tuu onkundana ombwanawa kaagalikani yaJehova megulu! Otaya ladhipikwa taku ti: “Onkee ano nyanyukweni, one omagulu naamboka mwa kala mugo!” Ihe onkalo oyi li ngiini kwaamboka ye li kombanda yevi? “Yaye evi nefuta,” ewi okuza megulu osho tali tsikile, “oshoka ondiaboli ya kulukile kune, e na ondjahi onene, oshoka e shi shi, e na ethimbo efupi lyowala.”

Tse otu li ngaashingeyi methimbo ndyoka efupi lyowala. Aantu ngashingeyi otayu ulike ngele oya gwana okuya muuyuni uupe waKalunga nenge mokuhanagulwa po. Oshili oyo kutya ethikilo lyoye otali uthwa ngashingeyi kunkene ngoye to inyenge konkundana ombwanawa yUukwaniilwa waKalunga ndjoka tayi uvithwa muuyuni auhe kohi yewiliko lyaKristus.

Jesus Kristus konima yaashono ota ka longa e li Omukalelipo gwaKalunga okukutha po onkalelo ayihe yiinima yaSatana kombanda yevi naayehe mboka taye yi ambidhidha. Jesus ota ka kutha po uukolokoshi auhe mbuno piita mbyoka hayi ithanwa mOmbimbeli Harmagedon. Konima yaashino, Jesus, Omuntu omunenenene meshito alihe a landula Jehova Kalunga mwene, ota ka kwata Satana noompwidhuli dhe e te ya manga ya kale uule woomvula eyuvi “molumbogo,” sha hala okutya, onkalo ya fa eso moka ihaamu vulu okulongwa sha. Iilonga 7:55-60; 8:1-3; 9:1-19; 16:6-10; Epsalmi 110:1, 2; Aaheberi 10:12, 13; 1 Petrus 3:22; Lukas 22:28-30; Aakolossa 1:13, 23; Ehololo 1:1, 10; 12:7-12; 16:14-16; 20:1-3; Mateus 24:14.

▪ Jesus konima yokulonda kwe megulu, ota kala peni, noshike a tegelela?

▪ Okombanda yoolye Jesus ta pangele konima yokulonda kwe megulu, nongiini okupangela kwe taku hololwa?

▪ Uunake “esiku lyOmuwa” lya tameke, noshike sha ningwa po petameko lyalyo?

▪ Okuhuma komeho kwiilonga yeuvitho lyonena otaku gumu ngiini kehe gumwe gwomutse paumwene?

▪ Ngele iilonga mbika yeuvitho ya pu, iiningwanima yini tayi ka landula ko?