Ontopolwa 121

Koshipala shOsanhedrin, nopo nduno okuPilatus

OKU li pokusha. Petrus okwi idhimbike Jesus iikando itatu, niilyo yOsanhedrin oya mana ompangu yawo yiihelele noya halakana. Ihe otaya gongala ishewe ongula yEtitano sho eluwa tali tende, oshikando shika omoshinyanga shawo shOsanhedrin. Osha yela kutya elalakano lyawo olyo okumonikitha ompangu ndjoka yokongulohi ya fa yi li paveta. Sho Jesus te etwa komeho gawo, otaya popi ngaashi ya popile ongulohi taya ti: “Ongoye ngele Kristus, tu lombwela ano.”

“Nando ndi mú lombwele, itamu itaale,” Jesus ta yamukula. “Nonando ndi mú pule, itamu yamukula sha.” Ihe Jesus oti ipopi ye mwene nuulaadhi kutya oye lye, ta ti: “Ihe okonena ndjika tamu ka mona Omuna gwOmuntu ta kuutumba kolulyo lwoonkondo dhaKalunga.”

“Ongoye ano Omuna gwaKalunga?” yo ayehe oya hala ye shi tseye.

“Eeno, ongame ngu ngaashi mwa ti,” Jesus ta yamukula.

Kaalumentu mbaka ye na elalakano lyoku mu dhipaga, eyamukulo ndika olya gwanena. Oye li tala ko olyo okusheka Kalunga. “Etompelo lini po twa hala ishewe?” yo taya pula. “Otse yene twe dhi uvu mokana ke mwene.” Opo nduno otaya manga Jesus, otaye mu pititha mo notaye mu gandja kuPontius Pilatus, omupangeli Omuroma.

Judas, omugwaaleki gwaJesus, okwa kala a tala shoka tashi ningwa po. Sho e wete kutya Jesus okwa pangulwa, otu uvu nayi. Onkee ano ota yi kaasaseri aakuluntu naakuluntu e ke ya shunithile iisilveri 30 e ta yelitha ta ti: “Ongame onda yono, sho nda gwaaleke ombinzi yaa na oondjo.”

“Otu na shike nangoye? Ikwatha ngoye mwene,” osho taya yamukula kaaye na ko nasha. Onkee ano Judas iimaliwa iisilveri ote yi ekelehi motempeli e ta piti mo e ta kambadhala okwiimangeleka. Ihe osha yela kutya oshitayi hoka Judas ta manga ongodhi otashi teka, nolutu lwe otalu gwile pevi komamanya e talu topa.

Aasaseri aakuluntu kaye shi kutya iimaliwa iisilveri naye yi ninge ngiini. “Mbino kayi wapa okutulwa miimaliwa yotempeli,” osho ya tokola, “oshoka oyo iikulila yombinzi.” Konima yokukundathana, iimaliwa mbika otaye yi landa eyana lyomuhongi gwiiyuma yeloya, li ninge eyana lyokufumvika aakwiilongo. Onkee ano eyana olya lukwa “eyana lyombinzi.”

Oyo ongula onene natango sho Jesus ta falwa kongulumbala yomupangeli. Ihe Aajuda mboka ya li pamwe naye otaya tindi okuya mo molwashoka oyi itaala kutya ekwatathano nAapagani lya tya ngaaka otali ke ya nyateka. Onkene ano Pilatus opo e ya pe ompito ota piti mo e ke ya tsakaneke. “Oondjo tamu dhi tamanekele omulumentu nguno odhini po?” osho ta pula.

“Nguka ando kee shi omukolokoshi, ando inaatu mu gandja miikaha yoye,” osho taya yamukula.

Molwashoka Pilatus ina hala a kwatelwe mo, ota yamukula ta ti: “Mu kutheni po, ne mu mu pangule pampango yeni.”

Okuulika kutya oye na elalakano lyoku mu dhipaga, Aajuda otaya ti: “Otse twi indikwa okudhipaga omuntu.” Dhoshili, otashi vulika tashi ke eta oshipotha shomontaneho ngele oya dhipaga Jesus pethimbo lyOshituthi shOpaasa, oshoka aantu oyendji oya simaneka Jesus. Ihe ngele taya vulu okumona Aaroma ye mu dhipagele ondjo yi na ko nasha nopolotika, naashika otashi ke ya monikitha koshipala shaantu ya fa kaaye na mo ombinga.

Onkee ano aawiliki yelongelokalunga itaya popi sha kombinga yompangu yawo yonale moka ya pangulile Jesus omolwokusheka Kalunga, ngashingeyi otaya dhiladhila omalundilo galwe gi ili. Otaye mu pe uusama wopatatu: “Nguno otwe mu mono [1] ta tsitha aantu oondumbo [2] noti indike okugandja oompale komukesari [3] noti itile, oye Kristus, omukwaniilwa.”

Elundilo kutya Jesus ota ti kutya oye omukwaniilwa, otali ipulapulitha Pilatus. Onkee ano ota shuna ishewe mongulumbala, ti ithana Jesus e ye kuye e te mu pula ta ti: “Ongoye omukwaniilwa gwAajuda?” Noohapu dhilwe, owa taaguluka ompango mokutya kutya ongoye omukwaniilwa ta tsu ondumbo nOmukeesali?

Jesus okwa hala okutseya kutya Pilatus oku uva nale shi thike peni shi na ko nasha naye, onkee ano ta pula ta ti: “Oto shi popi mungoye mwene, nenge yalwe ya popi ndje kungoye?”

Pilatus oti iningitha a fa kee shi sha kombinga ye nokwa hala okuuva uushili. “Ongame Omujuda?” osho ta yamukula. “Aantu yoshilongo shaandjeni naasaseri aakuluntu oyo ye ku gandja kungame. Owa ningi shike?”

Jesus ita kambadhala nando okuyanda ompata ndjoka yi na ko nasha nuukwaniilwa we. Eyamukulo ndyoka Jesus ta gandja ngashingeyi osha yela kutya otali kumitha Pilatus. Lukas 22:66–23:3; Mateus 27:1-11; Markus 15:1; Johannes 18:28-35; Iilonga 1:16-20.

▪ Onelalakano lini Osanhedrin tayi gongala ishewe ethimbo lyongula?

▪ Judas ota si ngiini, noshike tashi ningwa niisilveri 30?

▪ Pehala lyoku mu dhipaga yo yene, omolwashike Aajuda ya hala Aaroma oyo ya dhipage Jesus?

▪ Omalundilo geni Aajuda taya lundile Jesus?