Ontopolwa 91

Lasarus ta yumudhwa

JESUS, naamboka taye ende pamwe naye, ngashingeyi otaya thiki pombila yaLasarus. Yo yeneyene oyo ekololo lye edhilwa nemanya posheelo. “Kutheni po emanya,” Jesus ta ti.

Marta ota tindi, oshoka ke uvite ko natango kutya Jesus okwa hala okuninga shike. “Omuwa,” ye ta ti, “okwa nika nokuli, oshoka okwa ningi omasiku gane.”

Ihe Jesus ota pula ta ti: “[Inandi] ku lombwela, andola wi itaale, ando to mono ko eadhimo lyaKalunga?”

Onkee ano emanya otali kuthwa po. Opo nduno Jesus ota ligamene pombanda nota galikana ta ti: “Tate, otandi ku hambelele, ongoye sho u uva ndje. Ondi shi shi, ongoye ho uvu ndje aluhe; ihe omolwaantu mbaka ya kundukidha ndje otandi popi shino, opo yi itaale, ongoye wa tuma ndje.” Jesus ota galikana montaneho opo aantu ya vule okumona kutya shoka ta ka ninga ngashingeyi otashi ka gwanithwa okupitila moonkondo ndhoka ta pewa kuKalunga. Opo nduno oti igidha mokule ta ti: “Lasarus, za mo!”

Opo tuu mpoka Lasarus ota zi mo. Iikaha ye noompadhi dhe odha li dha mangwa natango niimango yelapi noshipala she osha dhiingilwa noshifugulitho. “Mu mangululeni, ne mu mu ethe, a ye,” Jesus ta ti.

Sho taya mono oshikumithalonga shika, oyendji yomAajuda mboka yi ile okuhekeleka Maria naMarta otaya tameke okwiitaala Jesus. Ihe yalwe otaya yi ya ka lombwele Aafarisayi shoka sha ningwa po. Yo naasaseri aakuluntu otaya longekidha nziyanziya pu ningwe oshigongi shompangu yopombanda yOshijuda, Osanhedrin.

Osanhedrin oya kwatela mo ngoka a li omusaseri omukuluntu kuyakwawo pethimbo mpoka, Kaifas, nosho wo Aafarisayi nAasadukayi, aasaseri aakuluntu naamboka ya li nale aasaseri aakuluntu kuyakwawo. Mbaka otaya popi ya nika oluhodhi taya ti: “Otu na okuninga ngiini, oshoka omulumentu nguka ota longo iilongandhindhiliko oyindji? Nge tatu mu etha ngaaka, ayehe otaye mu itaale, nAaroma otaye ya notaye tu kutha oshilongo naantu wo.”

Nonando aawiliki yelongelokalunga otaya zimine kutya Jesus “ota longo iilongandhindhiliko oyindji,” yo oye na ko owala nasha nondondo yawo yene nosho wo onkondopangelo dhawo. Eyumudho lyaLasarus olya alula Aasadukayi noonkondo, molwashoka inaayi itaala meyumuko.

Kaifas, ngoka tashi vulika Omusadukayi, ngashingeyi ota popi nota ti: “Oondunge dheni odhowala, ne itamu dhiladhila, okusa kwomuntu gumwe omolwaantu ayehe kwe mú opalela, ku vule okuteka po kwoshigwana ashihe.”

Kalunga okwa nwetha mo Kaifas a popye shika, oshoka konima yethimbo omuyapostoli Johannes okwa nyola ta ti: “Ihe shono [Kaifas] ine shi popya muye mwene.” Shoka Kaifas a li a hala naanaa okutya osha li kutya Jesus oku na okudhipagwa opo kaa tsikile we okunkundipaleka oondondo dhawo dhoonkondopangelo nosho wo enwethomo lyawo. Ihe paJohannes, ‘Kaifas okwa hunganeke kutya Jesus ke na owala okusa omolwoshigwana, ihe opo a kongolole wo aana yaKalunga.’ Dhoshili, olyo elalakano lyaKalunga opo Omwana a se e li iikulila yaayehe.

Ngashingeyi Kaifas ote shi pondola okunwetha mo Osanhedrin yi ninge oompangela dhokudhipaga Jesus. Ihe Jesus ota zi po mpoka, tashi vulika oompangela ndhika e dhi uva nale kuNikodemus, oshilyo shOsanhedrin ngoka e na uukuume naye. Johannes 11:38-54.

▪ Omolwashike Jesus ta galikana montaneho manga inaa yumudha Lasarus?

▪ Mboka ya mona eyumudho ndika otayi inyenge ngiini kulyo?

▪ Oshike tashi holola uuwinayi wiilyo yOsanhedrin?

▪ Oshike sha li edhiladhilo lyaKaifas, ihe Kalunga okwe mu longitha a hunganeke shike?