Ontopolwa 27

Mateus ti ithanwa

NZIYA konima yokwaaludha omusilombanda, Jesus ota zi muKapernaum ta yi kEfuta lyaGalilea. Omangathithi gaantu otage ya ishewe kuye, nota tameke oku ga longa. Manga te ende, oku wete Mateus, ngoka hi ithanwa wo Levi, a kutuumba pongulu yoompale. “Landula ndje,” Jesus te mu ithana.

Otashi vulika Mateus omalongo gaJesus e ga shi nale, ngaashi naanaa Petrus, Andreas, Jakob naJohannes sho yi ithanwa. Nongaashi yo, Mateus oti inyenge mbalambala keithano. Ota thikama, ta thigi po iilonga ye e li omuteloni, nota landula Jesus.

Konima yaashono, Mateus ota ningi oshituthi oshinene megumbo lye, tashi vulika ta dhana okwiithanwa kwe. Kakele kaJesus naalongwa Ye, mboka ya li nale ooyakwawo yaMateus nayo opo ye li. Olundji aalumentu mbaka oya dhinika kAajuda ooyakwawo molwashoka yo ohaya gongelele oompale aapangeli yaRoma mboka ya tondika. Kakele kaashono, yo olundji ohaya nyokoma aantu shaahe li pauyuuki moku ya pula iimaliwa oyindji yi vulithe poompale ndhono hadhi futwa shito.

Aafarisayi mokumona Jesus e li poshituthi pamwe naantu ya tya ngaaka, otaya pula aalongwa ye taya ti: “Omuhongi gweni oshike ta lile pamwe naateloni naalunde?” Sho Jesus te dhi uvu ota yamukula Aafarisayi ta ti: “Oomboka ya kola, oyo kaa na omwaaludhi, aavu tuu ayeke. Esilohenda nda hala, handjambo. Oshoka inaandi ya okwiithana aayuuki, aawe, aalunde tuu.”

Osha yela kutya Mateus okwi ithana aateloni mbaka kegumbo lye opo ya vule okupulakena Jesus noya mone ealudho lyopambepo. Onkee ano Jesus ote endaathana nayo opo e ya kwathele ya mone ekwatathano ewanawa naKalunga. Jesus ina dhina aantu ya tya ngaaka, ngaashi Aafarisayi mboka yi ishi uuyuuki taya ningi. Muushili wo wene, mepingathano naashono, oti inyengithwa kohenda, a longe e li omwaaludhi gwawo gwopambepo.

Ano okuulikila aalunde ohenda kwaJesus kaku shi oku ya dhimina po oondjo dhawo ihe oko euliko lyomaiyuvo golukeno ga faathana naangoka u ulikilile mboka ya li taye ehama palutu. Pashiholelwa, dhimbulukwa kutya sho a ganeke oshikaha she nohenda nokwa gumu omunashilundu, okwa ti: “Onda hala, yela.” Natu ulike ohenda sha faathana mokukwathela aantu mboka ya pumbwa ekwatho, unene tuu oku ya kwathela pamukalo gwopambepo. Mateus 8:3; 9:9-13; Markus 2:13-17; Lukas 5:27-32.

▪ Mateus oku li peni sho Jesus e mu mono?

▪ Iilonga yaMateus oyashike, nomolwashike aantu ya tya ngaaka ya dhinika kAajuda ooyakwawo?

▪ Enyenyeto lini lya ningilwa Jesus, noti inyenge ngiini?

▪ Omolwashike Jesus te endathana naalunde?