Ontopolwa 24

Molwashike Jesus i ile kombanda yevi

ESIKU ndyoka sho Jesus e li muKapernaum pamwe naalongwa ye yane olya li limwe lyomaipyakidhilo, nongulohi ndjoka aantu yomuKapernaum otaye eta aavu yawo ayehe kuye opo e ya aludhe. Kapwa li ethimbo lyeimweneneno.

Ngashingeyi oyo ongula yomaushu yesiku lya landula ko. Manga kwa luudha natango, Jesus ota penduka e ta piti mo oye awike. Ota yi kehala lyi ilile hoka ta vulu okugalikana He meimweneneno. Ihe okwiimwenenena kwaJesus okwethimbo efupi, oshoka sho Petrus nayalwe ya mono kutya ke po, otaya yi ye ke mu konge.

Sho Jesus ye mu mono, Petrus ota ti: “Ayehe otaye ku kongo.” Aantu yomuKapernaum oya hala Jesus a kale puyo. Oya pandula shili shoka e ya ningile! Ihe Jesus okwe ya mbela kombanda yevi nelalakano lyokulonga iikumithalonga yomaaludho? Ota ti shike kwaashino?

Pahokololo limwe lyOmbimbeli, Jesus ota yamukula aalongwa ye ta ti: “Tu yeni komikunda dhomuushiinda, ndi uvithile nkoka wo, oshoka osho shika nde shi endele.” Nokuli nonando aantu otaya ladhipike Jesus a kale po, ote ya lombwele ta ti: “Ondi na okuuvithila iilando yilwe wo evaangeli [lyuukwaniilwa waKalunga, KB], oshoka olyo tuu ndika nde li tuminwa.”

Eeno, Jesus okwe ya kombanda yevi unene tuu okuuvitha Uukwaniilwa waKalunga mboka tau ka yukipalitha edhina lyaHe notau ka kandula po sigo aluhe omavu gaantu agehe. Ihe opo a gandje uunzapo kutya ye okwa tumwa kuKalunga, Jesus ota longo iikumithalonga yomaaludho. Omathelemimvo ga piti po Moses okwa longele iikumithalonga komukalo gwa faathana okukoleka uunzapo we e li omukalele gwaKalunga.

Ngashingeyi sho Jesus ta zi muKapernaum oku ku uvitha miilando yilwe, aalongwa ye yane otaya yi pamwe naye. Mbaka yane oyo Petrus nomumwayina Andreas, nosho wo Johannes nomumwayina Jakob. Ngiika oto dhimbulukwa kutya opo owala ya li yi ithanwa oshiwike sha zi ko okukala aaniilonga pamwe naJesus molweendo lwotango.

Olweendo lwaJesus lwokuuvitha muGalilea pamwe naalongwa ye yane otalu ende nawa shikumitha! Dhoshili, onkundana kombinga yiilonga ye otayi taandele nokuli muSiria ashihe. Omangathithi omanene gaantu okuza kuGalilea, Judea nohandiyaka yomulonga Jordan otaga landula Jesus naalongwa ye. Markus 1:35-39; Lukas 4:42, 43; Mateus 4:23-25; Eksodus 4:1-9, 30, 31.

▪ Oshike tashi ningwa po ongula konima yesiku lyomaipyakidhilo lyaJesus muKapernaum?

▪ Omolwashike Jesus a tuminwa kombanda yevi, nelalakano lyiikumithalonga ye olyashike?

▪ Oolye taya yi pamwe naJesus molweendo lwe lweuvitho kuGalilea, naantu otayi inyenge ngiini kombinga yiilonga yaJesus?