Ontopolwa 101

MuBetania, megumbo lyaSimon

SHO Jesus ta zi muJeriko, ota yi kuBetania. Olweendo otalu kutha esiku alihe, molwashoka oto londo ookilometa 19 lwaampono moshitopolwa oshidhigu nokulonda. Jeriko oshi li oometa 250 lwaampono kohi yondjalo yefuta, na Betania oku li oometa 760 lwaampono pombanda yondjalo yefuta. Ngaashi to vulu okudhimbulukwa, muBetania omo maandjawo yaLasarus naamwayina aakiintu. Okamukunda haka oke li konyala ookilometa ndatu okuza muJerusalem, lwokuuzilontu wekulukila lyondundu yOomono.

Aantu oyendji oya thika nale muJeruslem omolwOpaasa. Oye ya kuyele ye ki iyoge pamukalo ngoka sha li hashi ningwa. Otashi vulika ya guma omudhimba nenge ya ninga sha shi ili shoka she ya kakeka. Onkee ano otaya landula omulongithwakalo gwokwiiyoga opo ya vule okudhana Opaasa pamukalo tagu vulu okutaambiwa ko. Sho mbaka ye ya kuyele taya gongala potempeli, oyendji otayi ipula ngele Jesus ote ya ngaa kOpaasa?

MuJerusalem omo mwa tameka ompata kombinga yaJesus. Osha tseyika apuhe kutya aawiliki yelongelokalunga oya hala oku mu kwata noku mu dhipaga. Dhoshili, oya gandja omalombwelo kutya ngele gumwe ta mono mpoka e li, ne ya tseyithile. Iikando iitatu moomwedhi opo dha piti—pOshituthi shOmatsali, pOshituthi shEyapulo nokonima sho a yumudha Lasarus—aawiliki mbaka oya li ya kambadhala oku mu dhipaga. Onkee ano aantu otayi ipula ngele Jesus ota ka holoka ngaa we montaneho. “Otamu ti ngiini?” osho taya pulathana.

Pokati mpoka Jesus ota thiki muBetania, ku na omasiku gahamano okutetekela Opaasa yi dhane, ndjoka pakalindeli kOshijuda hayi kala ko mo 14 gaNisan. Jesus ota thiki muBetania uusiku wEtitano mboka owo etameko lyesiku eti-8 lyaNisan. Ka li ta vulu okuya kuBetania mOlyomakaya, oshoka okweenda mEsabati—okuza sho etango tali ningine mEtitano sigo etango tali ningine mOlyomakaya—okwi indikwa kompango yOshijuda. Osha yela kutya Jesus ota yi kegumbo lyaLasarus, ngaashi e shi ningile nale e ta lala hoka uusiku wEtitano.

Ihe omukalimo gulwe gwomuBetania ota hiya Jesus naaendi pamwe naye kuulalelo mOlyomakaya. Omulumentu oSimon, ngoka a li nale omunashilundu notashi vulika a aludhilwe nale kuJesus. Molwuukwatya we wondjungu, Marta ota yakula aayenda. Ihe ngaashi shito, Maria ota yakula Jesus, oshikando shika okomukalo ngoka tagu pendutha ompata.

Maria okwa patulula ekende lyeloya nenge okahanga hoka ke na konyala omugwayo gwa nika nawa gwetata lyokilograma, ‘onardelela.’ Ogu na ondilo noonkondo. Dhoshili, ongushu yagwo oyi thike konyala pondjambi yokomumvo! Sho Maria a tile omugwayo momutse gwaJesus nokoompadhi e te dhi theta nomafufu ge, egumbo alihe olyu udha ezimba lya nika nawa.

Aalongwa otaya geye notaya pula taya ti: “Oshike ano [tagu] hepithwa owala?” Opo nduno Judas Iskariot ota ti: “Omugwayo ngu oshike inaagu [landithwa] oondenari omathele gatatu nodha gandjwa koohepele?” Ihe Judas iti ipula shili noohepele, molwashoka okwa li ha yaka iimaliwa mokampunda kiimaliwa hoka ka li kaalongwa.

Jesus ota popile Maria. “Mu etheni,” ye ta ti. “Oshike tamu mu [piyaganeke, OB-1986 ]? Oye a longele ndje oshilonga oshiwanawa. Oshoka oohepele omu dhi na aluhe mokati keni, noshaa esiku mwa hala, inaamu [nyengwa] oku ya ningila nawa, ihe ongame mwaa na ndje aluhe. Oye a ningi shono shi thike poonkondo dhe. Okwa tetekela okugwayekela olutu lwandje efumviko. Oshili tandi mú lombwele: shaa nkoka muuyuni auhe evaangeli tali ku uvithilwa, naashika nguno e shi ningi, oko [tashi], ka hokololelwa edhimbuluko lye.”

Jesus muBetania oku li mo ngashingeyi uule woowili dhi vulithe 24, nokukala po kwe okwa tseyika apuhe. Onkee ano oyendji taye ya kegumbo lyaSimon okumona Jesus, ihe otaye ya wo okumona Lasarus, ngoka naye wo e li moka. Ano haJesus owala aasaseri aakuluntu tayu uvanene okudhipaga ihe naLasarus wo. Oya hala oku shi ninga molwashoka aantu oyendji oyi itaala Jesus molwashoka ye wete ngoka a yumudhwa kuye kuusi e na omwenyo! Aawiliki yelongelokalunga mbaka kaye shi tuu aawinayi! Johannes 11:55–12:11; Mateus 26:6-13; Markus 14:3-9; Iilonga 1:12.

▪ Oshike tashi kundathanwa potempeli muJerusalem, nomolwashike?

▪ Omolwashike Jesus a li e na okuthika muBetania mEtitano pehala lyokuthika mOlyomakaya?

▪ Sho Jesus ta thiki muBetania, osha yela kutya openi ta kala mEsabati?

▪ Oshilonga shaMaria shini sha pendutha ompata, nongiini Jesus te mu popile?

▪ Oshike tashi ulike uuwinayi uunene waasaseri aakuluntu?