Ontopolwa 6

Okanona ku uvanekwa

PEHALA lyokushuna kuNasaret, Josef naMaria otaya kala muBetlehem. Naashono Jesus e na omasiku gahetatu, otaye mu pititha etanda, ngaashi Ompango yaKalunga ya pewa Moses tayi ti. Osha yela kutya oshi li wo omukalondjigilile okuluka okanona okamati mesiku etihetatu. Onkee ano okanona otaye ka luku Jesus, ngaashi omuyengeli Gabriel a ti nale.

Otapu piti omasiku ge vulithe pomwedhi, na Jesus oku na omasiku 40. Openi aakuluntu ye taye mu fala ngashingeyi? Okotempeli muJerusalem, mpoka pu na owala ookilometa dhontumba okuza mpoka ya kala. PaMpango yaKalunga ya pewa Moses, omasiku 40 konima yokumona okanona okamati, yina yako okwa li a tegelelwa okufala eyambo lyeithetitho kotempeli.

Shika osho Maria ta ningi. Ota fala uungutyona uyali ongeyambo lye. Shika otashi ulike sha kombinga yonkalo yopamahupilo gaJosef naMaria. Ompango yaMoses otayi ti kutya okanzigona, hoka ke na ongushu yi vule yuungutyona, oko ke na okuyambwa. Ihe ngele yina shika ite shi vulu, omatendenguti gaali nenge uungutyona uyali owa gwana.

Motempeli, omulumentu omukulupe otu ukata Jesus. Edhina lye oSimeon. Kalunga okwe mu hololele kutya ita ka sa manga inaa mona Kristus nenge Messias, omuuvanekwa gwaJehova. Sho Simeon te ya motempeli esiku ndyono, ombepo ondjapuki otayi mu ukitha kokanona hoka ka humbatwa kuJosef naMaria.

Manga Simeon u ukata Jesus, ota hambelele Kalunga nota ti: “Omuwa, nena to laleke ndje ihe omuntu gwoye, ndi ye [nombili, OB-1986] ngaashi wa tile, oshoka omeho gandje oga mono ehupitho lyoye, we li longo montaneho yaantu ayehe, uuyelele okuminikila aapagani nesimano lyoshigwana shoye Israel.”

Josef naMaria oya kumwa sho ye shi uvu. Opo nduno Simeon ote ya laleke nuuyamba nota lombwele Maria kutya okamwana oka “tulwa po okupundukitha nokuyambukitha oyendji yomuIsrael,” nonokutya oluhodhi otalu ku ulula omutima gwe ngaashi egongamwele lya tsa.

Pethimbo ndyono omuprofeti Hanna gwoomvula 84 omo e li motempeli. Dhoshili, iha zi mo nando motempeli. Pethimbo opo tuu mpoka ota hedha popepi nayo nota tameke ta hambelele Kalunga e ta popi shi na ko nasha naJesus ta lombwele ayehe mboka ya hala okupulakena.

Josef naMaria inaya nyanyukilwa tuu iiningwanima mbika yomotempeli! Dhoshili, iinima ayihe mbika otayi ya pe uushili kutya okanona oko Omuuvanekwa gwaKalunga. Lukas 2:21-38; Levitikus 12:1-8.

▪ Osha yela kutya omukalondjigilile gwokuluka okanona okamati okaIsrael ogwa li hagu ningwa uunake?

▪ Omukulukadhi Omwiisrael okwa li a tegelelwa a ninge shike ngele okanona ke okamati ka adha omasiku 40, nongiini okugwanitha po oshitegelelwa shika taku holola onkalo yopamahupilo yaMaria?

▪ Oolye ya dhimbulula kutya Jesus oye lye pompito ndjino, naashika oye shi ulike ngiini?