Ontopolwa 85

Okukonga mboka ya kana

JESUS oku na ehalo enene okukonga nokumona mboka taya ka longela Kalunga neifupipiko. Onkee ano ta kongo nota popi naayehe kombinga yUukwaniilwa, mwa kwatelwa mboka ya tseyika apuhe kutya oyo aalunde. Aantu ya tya ngaaka ngashingeyi otaye ya kuye oku mu pulakena.

Aafarisayi naanongompango sho taye shi mono, otaya pe Jesus uusama molwashoka te endathana naantu mboka yo ya tala ko kaaye na oshilonga shasha. Otaya ngungutula taya ti: “Nguno ota taamba aalunde e ta lile pamwe nayo.” Shika inaye shi tala ko tuu nondhino! Aafarisayi naanongompango ohaya kala naantu yowala ya fa ye li niiyagaya. Dhoshili, ohaya longitha uutumbulilo wOshiheberi ‛am ha·’aʹrets, “aantu yomepya [yokevi],” okuulika ondhino ndjoka ya dhina nayo aantu ya tya ngaaka.

Mepingathano naashika, Jesus oha simaneke ayehe noha kala nayo nesimano, nohenda nosho wo nolukeno. Oshilanduliko, oyendji yomoonakwiishonopeka mbaka, mwa kwatelwa aantu mboka ya tseyika kutya ohaya longo iinima ya puka, otaye mu pulakene nohokwe. Ihe ongiini nduno kombinga yokupa Jesus uusama kwAafarisayi molwashoka ta kambadhala okukwathela mboka yo ya tala ko kaaye na oshilonga shasha?

Jesus ota yamukula epataneko lyawo mokulongitha eudhi. Ota popi ngaashi Aafarisayi yo yene ye shi tala ko, ye wete ye li aayuuki noya gamenwa moshigunda shaKalunga, omanga ‛am ha·’aʹrets mboka ya dhinwa ye li moshinkoti shekano nomonkalo yokukana. Pulakena sho ta pula:

“Olye ngoka gwomune [e] na oonzi ethele limwe e ta kanitha mo yimwe, ita thigi po ando ndhoka omilongo omugoyi nomugoyi e ta ka landula ndjiyaka ya kana sigo te yi mono? Nonge te yi mono, ote yi humbata komapepe ge nokunyanyukwa. Nonge te ya kegumbo, oti ithana ookuume ke naashiinda ye note ya lombwele: Tu nyanyukweni, oshoka onzi yandje ya li ya kana onde yi mono.”

Opo nduno Jesus ota longitha shoka she eleka kwaashoka ta hokolola nota yelitha ta ti: “Otandi mú lombwele: osho nomegulu tamu kala enyanyu lyokunyanyukilwa omulunde gumwe i itedhulula, li vule ndyoka lyokunyanyukilwa aayuuki omilongo omugoyi nomugoyi inaa sa uuthigona weitedhululo.”

Aafarisayi oyi itala ko yo yene ye li aayuuki notaya dhiladhila ano kutya yo inaya pumbwa okwiitedhulula. Sho yamwe yomuyo ya pele Jesus uusama oomvula dhontumba dha piti molwashoka ta li pamwe naateloni nonaalunde, okwa tile kuyo: “Inaandi ya okwiithana aayuuki, aawe, aalunde tuu.” Aafarisayi mboka yi ishi uuyuuki, mboka kaaye wete kutya oya pumbwa okwiitedhulula, itaye eta enyanyu megulu. Ihe aalunde mboka yi iyela ombedhi shili oyo taye li eta mo.

Okutsa omuthindo gwa kola edhiladhilo kutya egaluko lyaalunde mboka ya li ya kana otali eta enyanyu enene, Jesus ota hokolola natango eudhi lilwe. Ota ti: “Omukiintu olye, ngele e na iimaliwa iisilveri omulongo e ta kanitha po shimwe, ita hwameke onyeka, ye ita kombo megumbo noku shi konga shili sigo te shi mono ko? Nonge te shi mono, oti ithana ookane ke naashiinda ye e ta ti: Tu nyanyukweni, oshoka oshimaliwa shandje nde shi kanithile, onde shi mono ihe.”

Opo nduno Jesus ota longitha eudhi ndika komukalo gwa faathana. Ota gwedha ko ta ti: “Otandi mú lombwele, osho tuu tamu ningi enyanyu maayengeli yaKalunga omolwomulunde gumwe i itedhulula.”

Kashi shi tuu oshindhindhilikwedhi sho aayengeli yaKalunga ye na ko nasha nohole negaluko lyaalunde mboka ya li ya kana! Oshi li unene tuu ngawo molwashoka hugunina ‛am ha·’aʹrets, mboka ya dhinika noye li aaishonopeki, otaya ka mona ompito yokuninga iilyo yUukwaniilwa waKalunga womegulu. Oshilanduliko osho kutya, yo otaya mono ehala lya simana megulu li vule lyaayengeli! Ihe pehala lyokusa efupa nenge okumona inaaya simana, aayengeli otaya zimine neifupipiko kutya aantu mbaka aalunde oya taalela noya sinda omaupyakadhi monkalamwenyo ngoka tage ya vulitha okulonga ye li aakwaniilwa naasaseri yomegulu ye na ohenda nosho wo olukeno. Lukas 15:1-10; Mateus 9:13; 1 Aakorinto 6:2, 3; Ehololo 20:6.

▪ Omolwashike Jesus te endathana naantu mboka ya tseyika kutya aalunde, nAafarisayi otaye mu pe uusama washike?

▪ Aafarisayi ohaya tala ko ngiini aantu yowala?

▪ Jesus ota longitha omaudhi geni, notatu vulu okwiilonga mo shike mugo?

▪ Omolwashike enyanyu lyaayengeli endhindhilikwedhi?