Ontopolwa 29

Okulonga iilonga iiwanawa mEsabati

OLYO ethimbo lyothinge yomo 31 E.N. Opwa pita oomwedhi dhontumba okuza sho Jesus a li ta popi nomukiintu pomuthima muSamaria manga a li mondjila ta zi kuJudea ta yi kuGalilea.

Konima yokulonga okunenenene muGalilea ashihe, Jesus ota yi ishewe kuJudea, hoka tu uvitha mosinagoga. Okuyelekanitha eitulomo ndyoka Ombimbeli tayi gandja kuukalele we muGalilea, otayi hokolola kashona kombinga yiilonga yaJesus muJudea pethimbo lyetalelopo ndika nosho wo pethimbo lyoomwedhi ndhoka a kala mpoka konima yoPaasa ya piti. Osha yela kutya uukalele we muJudea kawa li wa taambwa ko nohokwe ngaashi muGalilea.

Nziyanziya Jesus ota yi mela lyondjila okuya koshinenelando shaJudea, Jerusalem, omolwOpaasa yomo 31 E.N. Mpaka popepi nOsheelo shOonzi shoshilando, opu na edhiya hali ithanwa Betesda, mpoka tapu ya aavu oyendji, aaposi niilema. Oyi itaala kutya aantu otaya vulu okwaaluka mokuya momeya gomedhiya ngele tagi inyenganyenga.

Olyo Esabati, na Jesus ota mono omulumentu e li pedhiya ngoka a ala uule woomvula omilongo 38. Jesus mokutseya kutya omulumentu okwa ninga ethimbo ele te ehama, ote mu pula ta ti: “Wa hala okwaaluka?”

Ota yamukula Jesus ta ti: “Omuwa, kandi na omuntu ta fala ndje medhiya, omeya sho ga nyenganyengithwa; nomanga ongame tandi yi, gulwe ta tetekele ndje okukulukila mo.”

Jesus ote mu lombwele: “Thikama, kutha po ontala yoye, ngu u ende.” Naanziya omulumentu okwa aluka, ota kutha po ontala ye, nota tameke okweenda!

Ihe sho Aajuda taya mono omulumentu, otaya popi taya ti: “Nena Esabati, nompango itayi ku pitike, u humbate ontala.”

Omulumentu ote ya yamukula ta ti: “Oongoka a aludha ndje, oye a lombwele ndje: Kutha ontala yoye, ngu u ende.”

“Omulumentu ngoka olye e ku lombwele: Kutha ontala yoye, ngu u ende?” osho taya pula. Jesus okwa zi po omolwengathithi lyaantu, naangoka a aludhwa edhina lyaJesus ka li e li shi. Ihe konima yaashono, Jesus nomulumentu otaya tsakanene motempeli, nomulumentu ota mono kutya olye ngoka e mu aludha.

Onkee ano omulumentu ngoka a aludhwa ota yi kAajuda note ya lombwele kutya oJesus ngoka e mu aludha. Sho Aajuda taye shi uvu, otaya yi kuJesus. Onetompelo lyashike? Okumona mbela nkene ha vulu okulonga iikumithalonga mbika? Hasho. Ihe oku mu pa uusama molwashoka ta longo iilonga mbika iiwanawa mEsabati. Noya tameke nokuli oku mu tidhagana! Lukas 4:44; Johannes 5:1-16.

▪ Ethimbo li thike peni lwaampono lya piti po okuza sho Jesus i ihulu okutalela po Judea?

▪ Omolwashike edhiya ndyoka li ithanwa Betesda lya li li holike unene?

▪ Oshikumithalonga shini Jesus ta longo pedhiya, neinyengo lyAajuda olya li ngiini?