Ontopolwa 31

Okupolola omaha mEsabati

NZIYANZIYA Jesus naalongwa ye otaya zi muJerusalem taya shuna kuGalilea. Olyo ethimbo lyoshitemamvula, nomomapya omu na omaha giilya. Aalongwa oya sa ondjala. Onkee ano taya polola omaha e taya li. Ihe molwashoka olyo Esabati, shoka taya ningi itashi kala inaashi monika.

Aawiliki yelongelokalunga muJerusalem opo owala ya li taya kambadhala okudhipaga Jesus aniwa molwokuyona kwe oompango dhEsabati. Ngashingeyi Aafarisayi otaye mu tamaneke. “Tala, aalongwa yoye otaa ningi shono shi indikwa okuningwa etango lyEsabati,” osho taya ti.

Aafarisayi otaya ti kutya okupolola omaha noku ga thenga peke u lye okwa faathana nokuteya nokuyungula. Ihe okufatulula kwawo ya kwata miiti iilonga mbyoka yi na okulongwa okwa ninga Esabati omutenge, omanga lya li lya dhiladhililwa okukala ethimbo lyenyanyu, tali tungu pambepo. Omolwashono Jesus ta yamukula niiholelwa yopamanyolo okuulika kutya Jehova Kalunga ka li nando nedhiladhilo opo ompango Ye yEsabati yi longithwe momukalo gwa kwata miiti inaashi pumbiwa.

Jesus ota ti kutya sho David naalumentu ye ya li ya sa ondjala, oya yile metsali e taya li iikwiila yetaliko. Pandjigilile, iikwiila mbyoka oya kuthilwe nale koshipala shaJehova noya pingenenwe po niipe, noya li hayi pungulilwa okuliwa kaasaseri. Ihe moonkalo ndhono, David naalumentu ye kaya li ya pangulwa molwashoka ye yi li.

Jesus ota gandja oshiholelwa shilwe, ta ti: “Nenge inaamu lesha mompango, aasaseri nke taa yono Esabati motempeli, yo kaa na oondjo?” Eeno, aasaseri ohaya tsikile niilonga yokutsela iimuna nokuli mEsabati nohaya longo iilonga yilwe potempeli okulongekidha omayambo giinamwenyo! “Ihe otandi mú lombwele: oonguka e li mpaka, oye e vule otempeli,” Jesus osho ta ti.

Jesus ota tsikile ta kumagidha Aafarisayi, ta ti: “Andola mwa tseya, shino oshike: Esilohenda nda hala, hamagano, ando inamu pangula mbaka inaa yona sha.” Opo nduno ota hulitha ta ti: “Oshoka Omuna gwOmuntu oye mwene gwEsabati.” Jesus okwa hala okutya shike naashino? Jesus ota popi kombinga yelelo lye lyUukwaniilwa wombili lyoomvula eyuvi.

Ngashingeyi uule woomvula 6 000, aantu oya kala taya monithwa iihuna kokupikwa nayi kuSatana Ondiaboli, omanga elongithonkondo nosho wo iita ya kala oyo iiningwanima yesiku kehe. Mepingathano naashika, elelo lyEsabati enene lyaKristus otali ka kala ethimbo lyokuthuwa po kokumona iihuna akuhe nokuthininikwa kwa tya ngaaka. Mateus 12:1-8; Levitikus 24:5-9; 1 Samuel 21:1-6; Numeri 28:9; Hosea 6:6.

▪ Elundilo lini tali tamanekelwa aalongwa yaJesus, ihe ongiini Jesus te li yamukula?

▪ Epuko lyAafarisayi lini Jesus tu ulike kulyo?

▪ Okomukalo guni Jesus e li “mwene gwEsabati”?