Ontopolwa 122

Okuza kuPilatus ota yi kuHerodes e ta shunithwa ko ishewe

NONANDO Jesus ita kambadhala nando oku shi holeka Pilatus kutya ye omukwaniilwa, ota yelitha kutya Uukwaniilwa we kau na oshiponga kuRoma. “Uukwaniilwa wandje kau shi womuuyuni mbuka,” Jesus ta ti. “Andola uukwaniilwa wandje womuuyuni mbuka, ando aamati yandje ya kondjo, ndaa gandjwe miikaha yAajuda; ihe ngashingeyi uukwaniilwa wandje kau shi [waamuka].” Ano Jesus ota zimine iikando itatu kutya oku na Uukwaniilwa, nonando kau shi wokevi.

Ihe Pilatus ote mu kondjitha natango ta ti: “Ongoye ano omukwaniilwa?” Sha hala okutya, ongoye omukwaniilwa nonando Uukwaniilwa woye kau shi oshitopolwa shuuyuni mbuka?

Jesus ota yelithile Pilatus kutya oku li mondjila, nota yamukula ta ti: “Eeno, ngaashi to ti, ongame omukwaniilwa. Onkee nda valwa nonkee nde ya muuyuni, ndi hokolole oshili. Kehe tuu ngoka gwomoshili oye tu uvu ewi lyandje.”

Eeno, elalakano lyolela lyokukala po kwaJesus kombanda yevi olyo okuhokolola “oshili,” unene tuu oshili kombinga yUukwaniilwa we. Jesus okwi ilongekidha okukala a dhiginina oshili ndjoka nokuli nando onayi pule omwenyo gwe. Nonando Pilatus ota pula: “Oshili oshike?” ina tegelela a yelithilwe natango. Ye oku uva sha gwana okuninga etokolo.

Pilatus ota shuna kengathithi lyaantu mboka ya tegelela pondje yongulumbala. Osha yela kutya Jesus okwa thikama pooha naye sho ta lombwele aasaseri aakuluntu naamboka ye li pamwe nayo ta ti: “Kandi wete ko oondjo momuntu nguka.”

Engathithi lyaantu olya geyithwa ketokolo ndyoka nolya tameke okutsitsimika tali ti: “Oye a vundakanitha aantu nokulonga aantu muJudea ashihe, sho a tameke muGalilea sigo oompaka.”

Uulaadhi wa pitilila waahe li pandunge wAajuda otau kumitha shili Pilatus. Onkee ano manga aasaseri aakuluntu naakuluntu taya tsikile nokwiigidha, Pilatus ota pungulukile kuJesus e ta pula ta ti: “Ino uva ko, sho taye ku popi odhindjidhindji?” Ihe Jesus ita kambadhala nando okuyamukula sha. Okumwena kwe nonando ota lundilwa nayi otaku kumitha Pilatus.

Mokumona kutya Jesus Omugalilea, Pilatus ota mono omukalo gwokwiikutha mo moshinakugwanithwa shoka. Omupangeli gwaGalilea, Herodes Antipas (omwanamati gwaHerodes Omunene), oku li muJerusalem omolwOpaasa onkee ano Pilatus ta tumine Jesus kuye. Nale, Herodes Antipas okwa tetithile ko omutse gwaJohannes Omuninginithi, nopo nduno Herodes okwa tila sho u uvu kombinga yiikumithalonga mbyoka ya longwa kuJesus, a tila ta dhiladhila kutya pamwe Jesus oye shili Johannes ngoka a yumuka kuusi.

Ngashingeyi Herodes okwa nyanyukilwa noonkondo etegameno lyokumona Jesus. Hamolwashoka ti ipula nonkalonawa yaJesus nenge molwashoka a hala okuninga oonkambadhala dha mana mo okumona kutya uusama mbono ta pewa owoshili nenge owiifundja. Mepingathano naashono, ye oku na owala okatalekonawa nosho wo etegameno okumona Jesus ta longo oshikumithalonga shontumba.

Ihe Jesus ota tindi okumbilipaleka okatalekonawa kaHerodes. Dhoshili, sho ta pulwa kuHerodes, ite mu yamukula sha. Herodes okwa yemata, ye naakwiita ye otaya yolo Jesus. Otaye mu zaleke onguwo hayi adhima notaye mu sheke. Opo nduno otaye mu shunitha kuPilatus. Oshilanduliko, Herodes naPilatus mboka ya li nale ye tondathane, otaya ningi ookuume kopothingo.

Sho Jesus ta galuka, Pilatus oti ithana aasaseri aakuluntu, aapangeli Aajuda nosho wo oshigwana ya gongale pamwe note ya lombwele ta ti: “Mwe eta omuntu nguka kungame mwa ti: oye omupukithi gwaantu, ano taleni, ongame mwene nde mu pula omontaneho yeni, noinaandi mona momuntu nguka oondjo ndhoka tamu dhi mu [tamanekele], naHerodes ine dhi mona, oshoka oye kwe mu shuna kutse, ano taleni, oye nguka ina ninga sha shoku mu pa oondjo dheso. Onkee ano nda hala, ndi mu dhengithe nondi mu ethe.”

Ano Pilatus okwa yelitha olutiyali kutya Jesus ke na oondjo. Okwa hala oku mu mangulula, molwashoka oku wete kutya omolwondumbo owala aasaseri ye mu gandja. Manga Pilatus ta tsikile nokukambadhala okumangulula Jesus, ota mono nokuli etompelo lya kola natango oku shi ninga. Manga a kuutumba koshipundi she shokupangula, omukiintu gwe ote mu tumine etumwalaka te mu londodha ta ti: “Omulumentu nguka omuyuuki ino mu ningila uuwinayi, oshoka ongame onde mu ehamenwa shili uusiku wonena moondjodhi [ndhoka sha yela kutya odha za kuKalunga].”

Ihe ongiini mbela Pilatus ta vulu okumangulula omulumentu nguka kee na oondjo, ngaashi e shi shi kutya oku na oku shi ninga? Johannes 18:36-38; Lukas 23:4-16; Mateus 27:12-14, 18, 19; 14:1, 2; Markus 15:2-5.

▪ Jesus ota yamukula ngiini epulo kombinga yUukwaniilwa we?

▪ “Oshili” ndjoka Jesus a hokolola ethimbo lyonkalamwenyo ye ayihe kombanda yevi oyo shike?

▪ Pilatus ota pangula ngiini, aantu otayi inyenge ngiini, noshike Pilatus ta ningile Jesus?

▪ Herodes Antipas oye lye, omolwashike a nyanyukilwa noonkondo okumona Jesus, noshike te mu ningile?

▪ Omolwashike Pilatus a hala noonkondo okumangulula Jesus?