Ontopolwa 46

Okwa gumu onguwo yaJesus

ONKUNDANA kutya Jesus okwa galuka kuDekapolis otayi thiki kuKapernaum, nengathithi enene lyaantu otali gongala pefuta oku mu hambelela sho ta galuka. Osha yela kutya oyu uva kutya okwa mweneke oshikungulu nokwa aludha aalumentu mboka ya li ye niwe koompwidhuli. Sho te ya komunkulofuta, otaye mu ngundumanene ya nyanyukwa noye na etegelelo a ninge sha.

Gumwe gwomwaamboka ya hala noonkondo okumona Jesus oye Jairus, omukuluntu gwosinagoga. Ota tsu oongolo poompadhi dhaJesus note mu galikana a mana mo: “Okamwandje okakadhona taka alukililwa; ila, ngu u ka tenteke iikaha, ka aluke, ko ka kale ke na omwenyo.” Molwashoka ko oko awike okanona ke noke na owala oomvula 12, Jairus oku ka hole unene noonkondo.

Jesus ote shi zimine, e ta yi pamwe nengathithi lyaantu kegumbo lyaJairus. Dhiladhila owala okutuntukwa kwaantu mpoka kwa li ku thike manga ya tegelela oshikumithalonga shilwe natango. Ihe eitulomo lyomukiintu gumwe mengathithi olyu ukithwa owala kuupyakadhi we mwene wa kwata miiti.

Omukiintu nguka okwa kala uule woomvula 12 ta hepekwa ketiko lyombinzi. Okwa kala ha yi kondohotola nondohotola nokwa longitha po iimaliwa ye ayihe momapango. Ihe ina mona ekwatho lyasha; pehala lyaashono, uupyakadhi we owa nayipala.

Ngaashi tashi vulika to vulu oku shi uva ko, kakele koku mu nkundipaleka noonkondo, omukithi gwe ogwe mu sitha wo ohoni nogwe mu shundulitha. Pakukala uuvu wa tya ngaaka ihau popiwa pokati kaantu. Kakele kaashono, paMpango yaMoses, etiko lyombinzi otali ningi omukiintu a kale ina yela, noshaa ngoka te mu gumu nenge ta gumu oonguwo dhe dha nika ombinzi, oku na okwiiyoga nota kala inaa yela sigo okongulohi.

Omukiintu iikumithalonga yaJesus okwe yi uva nongashingeyi okwe ya kuye. Molwashoka ina yela, ota piti mengathithi lyaantu ta kambadhala ngaashi tashi vulika kaa monike, noti ipopile ta ti: “Shimpa tuu nda gumu konguwo ye, otandi aluka.” Sho te shi ningi, mbalambala otu uvu kutya etiko lyombinzi lye olwa kodha!

“Olye ngo a gumu ndje?” Oohapu dhaJesus ndhoka inadhi mu kunkitha tuu! Mbela okwe shi tseya ngiini? ‘Omuhongi,’ Petrus ta ti, ‘ongundu yaantu otayi ku thininike notayi ku pumagula, noto ti: Olye a gumu ndje?’

Jesus ota lengalenga omukiintu nota yelitha ta ti: “Gumwe a gumu ndje, oshoka ndi idhimbulula, mwa zi oonkondo mungame.” Dhoshili, kaku shi okugumwa kwowala, oshoka ealudho ndyoka kwe eta, olya zitha oonkondo muJesus.

Sho omukiintu e wete kutya ita vulu okukala inaa dhimbululwa, ote ya e ta tsu oongolo komeho yaJesus a tila nota kakama. Ota hokolola oshili ayihe yi na ko nasha nuuvu we montaneho yaantu ayehe nonkene opo a aludhwa.

Mokwiinyengithwa kokwiihempulula kwe ku udha, Jesus ote mu hekeleke nolukeno ta ti: “Omumwandje omukadhona, eitaalo lyoye olye ku [aludha]. Inda nombili, ngu u kale wa aluka kuuvu woye.” Kashi li tuu nawa okutseya kutya Ngoka a hogololwa kuKalunga a pangele evi oye omuntu omunalukeno, omunahenda, noha sile aantu oshimpwiyu noku na oonkondo oku ya kwathela! Mateus 9:18-22; Markus 5:21-34; Lukas 8:40-48; Levitikus 15:25-27.

▪ Jairus olye, nomolwashike te ya kuJesus?

▪ Uupyakadhi washike omukiintu gumwe e na, nomolwashike shi li oshidhigu kuye oku ka konga ekwatho kuJesus?

▪ Omukiintu ota aludhwa ngiini, nongiini Jesus te mu hekeleke?