Ontopolwa 71

Okwaaneitaalo kwAafarisayi ihaaku pitwa momutse

AAKULUNTU yomuheheli ngoka a li nale omuposi oya tila sho yi ithanwa koshipala shAafarisayi. Oye shi shi kutya opwa tokolwa kutya kehe gumwe ngoka ta hempulula eitaalo muJesus ota ka kondwa mo mosinagoga. Onkalo ya tya ngaaka okukala waahe na ekwatathano nayalwe momudhingoloko otayi vulu okweeta onkalamwenyo ondhigu, unene tuu kuukwanezimo wa hepa. Onkee ano aakuluntu oye shi kotokela.

“Nguka omuna gweni, tamu ti, a valwa omuposi?” Aafarisayi taya pula. “Ongiini ano, sho a mono ko ngashingeyi?”

“Otu shi shi, nguka omumwetu nokwa valwa omuposi,” aakuluntu taye shi zimine. “Ihe nkene a ningi omunameho, katu shi shi, naangoka e mu tonatitha omeho ge, katu mu shi.” Kapu na omalimbililo kutya omwana okwe ya hokololela ayihe mbyoka ya ningwa po, ihe aakuluntu otaya popi nekotoko taya ti: “Mu puleni; ye omukuluntu, ni ipopile ye mwene.”

Onkee ano Aafarisayi otayi ithana ishewe omulumentu. Oshikando shika otaya kambadhala oku mu tilitha mokwiininga ya fa ya mona uunzapo owindji tau pe Jesus uusama. “Pa Kalunga esimano,” yo taya ti. “Otu shi shi, omulumentu ngwiyaka omulunde.”

Omulumentu ngoka a li nale omuposi, iti ipatana egandjo lyuusama lyawo nota ti: “Ngele oye omulunde, kandi shiwo.” Ihe ota tsikile ko ta ti: “Shimwe ndi shi shi, ongame nguka nda li omuposi, ngashingeyi te mono ko.”

Aafarisayi otaya kambadhala okumona epuko muunzapo we notaya pula ishewe taya ti: “Okwe ku ningi ngiini? Omeho goye okwe ga tonatitha ngiini?”

“Opo nde mú hokololele,” omulumentu ta nyenyeta, “inaamu dhi uva nani? Omwa hala, mu dhi uvulule shike?” Nota pula neshadho ta ti: “Omwa hala ando, mu ninge wo aalongwa ye?”

Eyamukulo ndika otali geyitha Aafarisayi. “Ongoye omulongwa gwe,” yo taye mu tamaneke, “ihe otse aalongwa yaMoses. Otu shi shi, Kalunga okwa popitha Moses, ihe ngono nkoka a za, katu shi ko.”

Omuheheli omwiifupipiki ota yamukula a kumwa ta ti: “Eeno, opo tuu mpoka pe na onkumwe, sho kamu shi shi mpoka a za, nando okwa tonatitha omeho gandje.” Ehulithodhiladhilo lini li na okuningwa mwaashika? Omuheheli otu ukitha eitulomo kedhiladhilo ndyoka lya ziminwa kwaayehe ta ti: “Otu shi shi, Kalunga ihu uvu aalunde, ihe oongoka ha tila Kalunga nota gwanitha ehalo lye, oye tu uvika kuye. Nkene uuyuni wa za, inaku uvika nando omuntu a tonatitha omeho gomuvalwa omuposi.” Ehulithodhiladhilo oli na okukala lya yela: “Nguka andola kwa li kee shi gwomuKalunga, ando kee na shoka ta vulu okuninga.”

Aafarisayi kaye na eyamukulo ketompathano lya tya ngaaka lya yela nolyopandunge. Itaya vulu okuzimina nando oshili, nomolwashoka taya tuku omulumentu taya ti: “Ongoye wa valwa muulundelela nowa hala, u tu longe!” Onkee ano omulumentu oye mu undulile pondje, sha yela kutya oye mu tidha mo mosinagoga.

Sho Jesus tu uvu shoka ya ningi, ota kongo omulumentu nota ti: “Ongoye wi itaala Omuna gwaKalunga?”

Omuheheli ngoka a li nale omuposi ota pula ta ti: “Omuwa, oye olye, ndi mu itaale?”

‘Ngoka ta popi nangoye, oye,’ Jesus ta yamukula.

Nziyanziya omulumentu ota tsu oongolo koshipala shaJesus nota ti: “Omuwa, ondi itaala.”

Opo nduno Jesus ota yelitha ta ti: “Kepangulo [ndika, NW] nde ya muuyuni mbuka, oombono ihaa mono ko, ya mone ko, naamboka haa mono ko, ya tsike.”

Opo nduno Aafarisayi mboka taya pulakene otaye mu pula taya ti: “Natse wo aaposi nani?” Andola oya li ya zimina kutya oyo aaposi pamadhiladhilo, ando opu na eipopilo kepataneko lyawo okupataneka Jesus. Ngaashi Jesus te ya lombwele: “One andola aaposi, ando mwaa na oondjo.” Ihe molwuukukutu womitima dhawo otaya ti kutya yo kaye shi aaposi nonokutya inaya pumbwa nando okuyelelwa pambepo. Omolwashoka Jesus ta ti: “Ihe ngashingeyi hamu ti: Ohatu mono ko; onkee oondjo dheni tadhi kala po.” Johannes 9:19-41.

▪ Omolwashike aakuluntu yomuheheli ngoka a li nale omuposi ya tila sho Aafarisayi taye ya ithana, nongiini ano taya yamukula nekotoko?

▪ Aafarisayi otaya kambadhala ngiini okutilitha omulumentu ngoka a li nale omuposi?

▪ Etompathano lyopandunge lini lyomulumentu tali geyitha Aafarisayi?

▪ Omolwashike Aafarisayi kaaye na eipopilo mokupataneka kwawo Jesus?