Ontopolwa 25

Okweetela olukeno omunashilundu

SHO Jesus naalongwa ye yane taya talele po iilando yaGalilea, onkundana kombinga yiinima iikumithi mbyoka ta ningi otayi taandele noshitopolwa ashihe. Onkundana kombinga yiilonga ye otayi thiki moshilando shimwe moka mu na omulumentu te ehama oshilundu. Ndohotola Lukas ota hokolola kutya omulumentu okwa li “u udha oshilundu.” Sho uuvu mbuka uunyanyalithi tau humu komeho, otau lemaneke kashona nakashona iitopolwa yi ili noyi ili yolutu. Onkee ano omunashilundu nguka oku li monkalo ya gwana okweetelwa ohenda.

Sho Jesus ta thiki moshilando, omunashilundu ote ya kuye. PaMpango yaKalunga, omunashilundu oku na okwiigidha ta londodha ta ti: “Onakunika oshidhila, nakunika oshidhila!” (OB-1986) okukeelela opo yalwe kaaya hedhe kuye unene e tashi vulika shi ya kwate. Ngashingeyi omunashilundu ota tsu oongolo koshipala shaJesus note mu galikana: “Omuwa, andola wa hala, ando to vulu okuyelitha ndje.”

Omulumentu ke na tuu eitaalo muJesus! Ihe uuvu we kawa li tuu tau mu monitha e etitha ohenda! Jesus ota ka ninga mbela shike? Ando ongoye ando oto ningi ngiini? Mokwiinyengithwa kolukeno, Jesus ota ganeke oshikaha she e ta gumu omulumentu, ta ti: “Onda hala, yela.” Mbalambala oshilundu osha yela ko kuye.

Owa hala mbela gumwe e na olukeno lwa tya ngeyi oye a kale omukwaniilwa gwoye? Omukalo ngoka Jesus ta panga nago omunashilundu nguka, otagu tu pe einekelo kutya pethimbo lyelelo lyUukwaniilwa We, ehunganeko lyOmbimbeli ndika otali ka gwanithwa: “Oye ta si ohenda aafupi naatokele noomwenyo dhoohepele ote dhi hupitha.” Eeno, Jesus ota ka gwanitha ehalo lye lyokomutima okukwathela ayehe mboka taya mono iihuna.

Nokuli manga Jesus inaa aludha omunashilundu, uukalele we owa li we eta enyanyu enene mokati kaantu. Opo a gwanithe ehunganeko lyaJesaja, Jesus ngashingeyi ota lombwele omulumentu omwaaludhwa ta ti: “Tala, ino shi lombwela nando olye.” Opo nduno ote mu lombwele ta ti: “Inda, u ka monike komusaseri, ngu u ka gandjele ealuko lyoye omagano ga lombwelwa kuMoses, ge ya ningile oonzapo.”

Ihe omulumentu okwa nyanyukwa unene noita vulu okukala a mwenena oshikumithalonga. Ota yi nota tameke okutaandeleka onkundana shaa mpono, sha yela kutya ota pendutha ohokwe onene nosho wo okapulekonawa maantu opo nduno Jesus ka li we ta vulu okuya moshilando montaneho. Onkee ano, Jesus ota kala pomahala gi imwenenena pwaahe na aantu, naantu yokoombinga adhihe oye ya oku mu pulakena nokupangwa omavu gawo. Lukas 5:12-16; Markus 1:40-45; Mateus 8:2-4; Levitikus 13:45; 14:10-13; Epsalmi 72:13; Jesaja 42:1, 2.

▪ Oshilundu ohashi vulu okweeta oshizemo shini, nelondodho lini omunashilundu a li e na okugandja?

▪ Omunashilundu oti indile ngiini ekwatho kuJesus, noshike tatu vulu okwiilonga meyamukulo lyaJesus?

▪ Ongiini omulumentu omwaaludhwa inaa vulika kuJesus, noshilanduliko oshini?