Ontopolwa 120

Okwiidhimbika mehale lyegumbo

PETRUS naJohannes mboka ya thigile po Jesus moshikunino shaGetsemane e taya yi ontuku ya tila pamwe noshihupe shaayapostoli, oya ngungumana. Otashi vulika ya adha Jesus ta falwa kegumbo lyaHannas. Sho Hannas ta tumine Jesus kOmusaseri Omukuluntu kuyakwawo Kaifas, Petrus naJohannes otaya landula ko ye li konima kokule, sha yela kutya oya tila omolwoomwenyo dhawo notayi ipula wo unene shi na ko nasha naashoka tashi ka ningilwa Omuwa gwawo.

Sho taya thiki pegumbo enenenene lyaKaifas, Johannes ota yi mehale, oshoka oku shiwike komusaseri omukuluntu kuyakwawo. Ihe Petrus okwa thigwa a thikama pondje pomweelo. Ihe Johannes ota galuka mo nziya nota popi nomulangeli gwoposheelo, omukadhona omudhike, na Petrus ota pitikwa a ye meni.

Okwa li ku na uutalala naapiya nomalenga gomusaseri omukuluntu kuyakwawo oya tema omulilo gwomakala. Petrus ota thikama puyo e ta huhulukwa manga a tegelela oshizemo shompangu yaJesus. Moka omulangeli gwoposheelo ngoka a pitika Petrus e ye mo ote mu tala nawa kuuyelele womulilo. “Nangoye wo wa li pamwe naJesus Omugalilea”! osho ti igidha.

Petrus okwa yemata molwashoka a dhimbululwa noti idhimbike montaneho yaayehe kutya ye Jesus ke mu shi nando. “Kandi shiwo nokandi uvite ko shoka to ti,” osho ta ti.

Opo tuu mpoka, Petrus ota piti mo a ka kale muuyanda. Omukadhona gulwe ote mu mono mpoka e ta lombwele wo aantu mboka ya thikama mpoka ta ti: “Naanguka wo okwa li pamwe naJesus Omunasaret.” Petrus ote shi idhimbike ishewe, nota gana ta ti: “Omulumentu nguka kandi mu shi.”

Petrus ota kala mehale nota kambadhala ngaashi tashi vulika kaa monike. Otashi vulika opo pethimbo mpoka ta tukuluthwa kokwiiga kwekondombolo momilema dhokoongulasha. Pethimbo opo tuu mpono, ompangu yaJesus otayi tsikile nosha yela kutya otayi ningilwa moshitopolwa shomegumbo handiyaka yehale. Osha yela kutya Petrus nayalwe mboka ye li pevi ya tegelela oye wete nkene oonzapo dhi ili nodhi ili ndhoka tadhi etwa mo okugandja uunzapo wadho tadhi ya mo notadhi zi mo.

Opwa pita konyala owili yimwe okuza sho Petrus a li a dhimbululwa lwahugunina kutya oku li pamwe naJesus. Ngashingeyi oyendji yomwaamboka ya thikama mpoka otaye ya kuye e taya ti: “Oshili, nangoye wo gumwe gwaambeyaka, oshoka nelaka lyoye olye ku holola.” Gumwe gwomongundu ndjoka oye omukwanezimo gwaMalkus ngoka okutsi kwe kwa tetwa ko kuPetrus. “U shi inaandi ku mona meyana pamwe naye?” ye ta ti.

“Omulumentu nguka kandi mu shi,” Petrus ta popi nomuthindo. Dhoshili, ota kambadhala oku ya tompa kutya yo ayehe oya puka mokutukana nokugana shi na ko nasha naashoka, nomuushili wo wene, oti ithingi ye mwene ngele ita popi oshili.

Sho owala Petrus ti idhimbike Jesus oshikando shika oshititatu, lyo ekondombolo otali igi. Nopethimbo opo tuu mpono, Jesus ngoka sha yela kutya ota zi megumbo e ta thikama mewalanda ndyoka lya taalela kehale ota punguluka nota tala kuye. Nziyanziya Petrus ota dhimbulukwa shoka Jesus a popile mondjugo yopombanda pwa pita owala oowili dhontumba a ti: “Ekondombolo manga inaali iga lwaali, ongoye to idhimbike ndje lutatu.” Te ehamekwa kuudhigu woondjo dhe Petrus ota yi pondje nota lili nokulililila.

Ongiini mbela shino tashi vulu okuningwa? Ongiini mbela Petrus a li ta vulu okwiidhimbika Omuwa gwe iikando itatu ya landulathana nziya konima owala sho a li e na einekelo enene moonkondo dhe dhopambepo? Osha yela kutya Petrus monkalo ndjoka okwa yi mo inee shi tegelela. Oshili otayi pilikwa na Jesus oti ithanwa omulongi gwomuyonena omutondithi. Shoka shi li mondjila otashi ningwa sha puka naangoka kee na ondjo ota pewa ondjo. Onkee ano molwuudhigu wopompito ndjono, Petrus ota kala a piyagana. Ombadhilila, uudhiginini we owa yematekwa; noluhodhi olunene okwa sindwa kuumbanda wokutila aantu. Shika inashi tu ningilwa nando! Mateus 26:57, 58, 69-75; Markus 14:30, 53, 54, 66-72; Lukas 22:54-62; Johannes 18:15-18, 25-27.

▪ Petrus naJohannes otaya piti ngiini posheelo shokuya mehale lyegumbo lyomusaseri omukuluntu kuyakwawo?

▪ Oshike tashi ningwa po megumbo manga Petrus naJohannes ye li mehale?

▪ Ekondombolo otali igi iikando ingapi, niikando ingapi Petrus ti idhimbike kutya ye Kristus ke mu shi?

▪ Sho Petrus ta tukana nota gana otashi ti shike?

▪ Oshike sha ningitha Petrus i idhimbike kutya ye Jesus ke mu shi?