Ontopolwa 49

Olweendo lulwe lweuvitho muGalilea

KONIMA yoomvula mbali lwaampono dheuvitho lyokwakola, mbela Jesus ota ka tameka ngashingeyi okulonga nonyalo nokukala ta longo shampa ta longo? Mepingathano naashono, ye ota tamununa mo iilonga ye yeuvitho mokutameka nolweendo lulwe, olutitatu muGalilea. Ota talele po iilando ayihe nomikunda adhihe moshitopolwa, ta longo moosinagoga notu uvitha onkundana ombwanawa yUukwaniilwa. Shoka e wete molweendo nduka, otashi mu itaalitha unene shi vulithe shito kutya iilonga yeuvitho oyi na okulongwa nokwakola.

Shaa mpono Jesus ta yi, oku wete kutya omangathithi gaantu oga pumbwa ealudho lyopambepo nosho wo ehekeleko. Yo oya fa oonzi dhaa na omusita ndhoka dha hepekwa nodhe ekelwahi, noku yu uvitile ohenda. Ota lombwele aalongwa ye ta ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.”

Jesus oku na ondungedhiladhilo yi na ko nasha niilonga ye. Oti ithana aayapostoli 12, mboka opo a hogololele pwa pita konyala omvula yimwe. Ote ya topola ooyaali nooyaali opo ya ninge oongundu dhi li hamano dhaauvithi note ya pe omalombwelo. Ote ya yelithile ta ti: “Inamu ya kaapagani, nonando moshilando shimwe shAasamaria inamu ya mo, aawe, indeni tango [okoonzi] ndhoka dha kana dhomegumbo lyaIsrael. Ihe shaa mpoka tamu ende, mu ya lombwele mu tye: [Uukwaniilwa wegulu owa hedha popepi, KB].”

Uukwaniilwa mboka ye na okuuvitha, owo mboka Jesus e ya longa ya galikane moshiholelwa shegalikano. Uukwaniilwa owa hedha popepi mondunge kutya Omukwaniilwa gwaKalunga ngoka a tulwa po, Jesus Kristus, opo e li. Uushili kutya Jesus okwa pe aalongwa ye oonkondo dhokwaaludha aavu nokuyumudha nokuli aasi, otau ulike kutya yo otaya longo ye li aakalelipo yepangelo ndyoka kaali shi lyopantu. Ote ya lombwele ya longe iilonga mbika oshali.

Opo nduno ota lombwele aalongwa ye kaaya ninge omailongekidho ge na ko nasha niinima yopanyama molwolweendo lwawo lweuvitho. “Inamu ilongelela momakwamo geni iingoli, iisilveri nenge iikushu, hampunda yokweenda nayo, hahema mbali, hangaku nenge ondhimbo; oshoka omulongi a gwana okupewa iipalutha ye.” Mboka ya pandula etumwalaka, otaye ki inyenga nokugandja iikulya nehala. Ngaashi Jesus ta ti: “Nge tamu thiki moshilando shontumba nenge momukunda, puleni, olye e shi kwiinekelwa, ne mu kale maandjawo, sigo tamu ka huma ko.”

Opo nduno Jesus ote ya pe omalombwelo nkene aanegumbo taya yiwa puyo netumwalaka lyUukwaniilwa. Ote ya lombwele ta ti: “Nonge tamu yi megumbo, li kundeni. Negumbo ndyoka ngele li shi kwiinekelwa, ombili yeni nayi kale mo; ihe ngele kali shi kwiinekelwa, ombili yeni nayi shune kune. Nangele itamu taambwa, noohapu dheni itadhi pulakenwa, zeni mo megumbo ndyoka nenge moshilando shono, ne mu pupule ontsi koompadhi dheni.”

Jesus otu ulike kutya epangulo otali ka kala edhigu shili koshilando shoka tashi ekelehi etumwalaka lyawo. Ote ya yelithile ta ti: “Oshili tandi mu lombwele: evi lyaSodom nolyaGomorra otali ningi [ihwepo], li vule oshilando shika esiku lyepangulo.” Mateus 9:35–10:15; Markus 6:6-12; Lukas 9:1-5.

▪ Uunake Jesus ta tameke olweendo lwe olutitatu lweuvitho muGalilea, notalu mu itaalitha shike?

▪ Sho ta tumu aayapostoli ye 12 ye ku uvithe, omalombwelo geni te ya pe?

▪ Omolwashike shi li mondjila kaalongwa okulonga yalwe kutya Uukwaniilwa owa hedha popepi?