Ontopolwa 102

Olweendo lwaKristus lwesindano okuya muJerusalem

ONGULA ya landula ko, Osoondaha, 9 Nisan, Jesus ota zi muBetania pamwe naalongwa ye e taye ende kombanda yondundu yOomono yu uka kuJerusalem. Meni lyethimbo efupi otaya thiki popepi naBetfage, shoka shi li kondundu yOomono. Jesus ota lombwele yaali yomaalongwa ye ta ti:

“Indeni komukunda ngwiyaka gu li komeho geni, notamu ka adha ko nziyanziya okasino okakiintu ka pandekwa nontana yako; u pandukululeni, ne mu u ete kungame. Nangele ku na ngoka te mu lombwele sha, mu tye: Omuwa e u pumbwa; oye note u tumu mbala.”

Nonando petameko aalongwa kaaye wete kutya omalombwelo ngaka oge na sha negwanitho lyehunganeko lyOmbimbeli, konima yethimbo otaye shi mono. Omuprofeti Sakaria okwa hunganeke kutya Omukwaniilwa gwaKalunga omuuvanekwa okwa li te ke ya muJerusalem a kayila kokasino, eeno, “okasino, ontana yokasino okakiintu.” Omukwaniilwa Salomo naye wo okwa kayilile ontana yokasino okuya a ka gwayekwe.

Sho aalongwa taya yi muBetfage e taya kutha ontana nayina, yamwe yomwaamboka ya thikama mpoka otaya pula taya ti: “Otamu ningi shike?” Ihe sho ya lombwelwa kutya iinamwenyo otayi faalelwa Omuwa, aalumentu otaye etha aalongwa ya fale uusino kuJesus. Aalongwa otaya yala oonguwo dhawo kombunda yokasino okakiintu noyontana yako, ihe Jesus ota londo kontana.

Manga Jesus te ya muJerusalem a kayila, engathithi lyaantu otali nenepala. Oyendji yomaantu otaya yala oonguwo dhawo mondjila, omanga yalwe taya tete iitayi yomiti notaye yi yala mondjila. “Na lalekwe nuuyamba omukwaniilwa ngu te ya medhina lyOmuwa,” osho tayi igidha. “Ombili megulu nesimano opombanda!”

Aafarisayi yamwe mengathithi lyaantu otaya geyithwa koohapu ndhika notaya nyenyeta taya lombwele Jesus taya ti: “Omuhongi, ganda aalongwa yoye.” Ihe Jesus ota yamukula ta ti: “Otandi mú lombwele: mbaka ngele taa mwena, omamanya otagi igidha ihe.”

Sho Jesus te ya popepi naJerusalem, ota tala koshilando nota tameke okulila molwasho e ta ti: “Nangoye andola wa dhimbulula esiku ndika lyonena shono sho opalele ombili yoye, ihe ngashingeyi sha holekwa omeho goye.” Jerusalem oshi na okugeelwa, omolwokwaahavulika kwasho kowina, ngaashi Jesus a hunganeke:

“Aaniita nangoye [Aaroma mboka ye li mewiliko lyondjayi Titus] taa fulu [omikanka dhokutulwa iiti ya honga tayi, NW] ku kundukidha, otaye ku thitikile notaye ku thininike koombinga adhihe notaye ku kumuna po osigo okominkanka, naamwoye yomungoye, yo itaa thigi po emanya lya londekwa kekwawo.” Ehanagulo ndika lyaJerusalem ndyoka lya hunganekwa kuJesus, olya ningwa lela konima yoomvula 37, momumvo 70 E.N.

Iiwike owala yontumba ya piti, oyendji yomengathithi lyaantu oya monene nkene Jesus ta yumudha Lasarus. Ngashingeyi mbaka otaya hokololele yalwe kombinga yoshikumithalonga shoka. Onkee ano sho Jesus ta thiki muJerusalem, oshilando ashihe osha tukuluka. “Olye nguka?” aantu oya hala oku shi tseya. Omangathithi gaantu otaga kala taga ti: “Oye omuprofeti nguka, Jesus, gwokuNasaret shaGalilea.” Sho taya mono shoka tashi ningwa, Aafarisayi otaya nyenyeta kutya itaya vulu sha nani nandonando, oshoka ngaashi yo taya ti: “Uuyuni auhe [owe] mu landula.”

Jesus ota yi kotempeli a ka longe aantu, ngaashi naanaa shi li omukalondjigilile gwe ngele ta talele po muJerusalem. Hoka aaposi niilema otaye ya kuye, note ya aludha! Sho aasaseri aakuluntu naanongoraamata taya mono iikumithalonga mbyoka Jesus ta longo naashono tayu uvu uumati tau igidha motempeli tau ti: “Hosianna, omuna gwaDavid,” otaya geye. “Ongoye u uvite ko tuu, mbano shoka taa ti?” osho taye mu pataneke.

“Eeno,” Jesus ta yamukula. “One inaamu lesha nani nando olumwe: Omomakana gaanona noguuhanona wi ilongekidhile ehambelelo?”

Jesus ota tsikile okulonga nota tala iinima ayihe yi li motempeli. Otaku toko mbala. Onkene ta zi po pamwe naamboka 12 e taye ende ookilometa ndatu nenge dhi thike lwaampono okushuna kuBetania. Okwa kala hoka uusiku wOsoondaha, tashi vulika megumbo lyakuume ke Lasarus. Mateus 21:1-11, 14-17; Markus 11:1-11; Lukas 19:29-44; Johannes 12:12-19; Sakaria 9:9.

▪ Uunake nongiini Jesus ta yi muJerusalem e li Omukwaniilwa?

▪ Osha simana ngiini opo omangathithi gaantu ga tange Jesus?

▪ Jesus oku uvite ngiini sho ta tala Jerusalem, nehunganeko lini ta popi?

▪ Oshike tashi ningwa po sho Jesus ta yi motempeli?