Ontopolwa 89

Olweendo lwesilohenda okuya kuJudea

IIWIKE yontumba ya piti, pethimbo lyOshituthi shEyapulo lyotempeli muJerusalem, Aajuda oya li taya kambadhala okudhipaga Jesus. Omolwashono a yi kolundume, sha yela kutya koshitopolwa hoka kakwa li kokule nEfuta lyaGalilea.

Opo a adhikile a yile ishewe kolukadhi ta yi kuJerusalem, nomondjila okwe endele tu uvitha momikunda dhaPerea, oshitopolwa shi li kuuzilo womulonga gwaJordan. Konima yokuhokolola eudhi lyomuyamba naLasarus, ota tsikile okulonga aalongwa ye iinima mbyoka e ya longele nale manga ya li muGalilea.

Pashiholelwa, ota ti kutya oshi li nawa omuntu opo “a mangelwe emanya lyoshini mothingo, ye u umbilwe mefuta,” shi vulithe sho ta hongolola kamwe “kuushona” waKalunga. Ota tsu wo omuthindo kutya okudhimina po okwa pumbiwa nota yelitha ta ti: “Nongele [omumwanyoko] te ku ningi nayi luheyali esiku limwe nota galuka luheyali e ta ti: Onda si oluhodhi, mu pa ombili.”

Sho aalongwa taye mu indile taya ti: “Tu gwedhela eitaalo,” Jesus ote ya yamukula ta ti: “Andola mu na eitaalo li thike ponsheno yosinapi e tamu lombwele omumwandi ngu: Ivudha po, ngu u itsike mefuta, ando tagu mú uvu.” Onkee ano eitaalo eshona ohali vulu nokuli okulonga iinima iinene.

Opo nduno Jesus ota hokolola onkalo ndjoka tayi vulu okuholoka po shili monkalamwenyo, ndjoka tayi yelitha iikala yu uka yomukalele gwaKalunga omunankondoadhihe. Jesus okwa ti: “Olye gwomune e na omukalele ta longo epya nenge ta litha, nge ta zi kepya, ote mu lombwele andola: Ila nziya, ngu u lye? Ite mu lombwele andola nokuli: Pakela ndje po uulalelo, ngu u izaleke e to yakula ndje, manga tandi li e tandi nu ngoye to ka lya ihe e to nu? Nenge mu shi ta hambelele [omupiya] ngo, sho a longo shono e shi lombwelwa? Ano osho nane wo, nge mwa gwanitha ayihe mwe yi lombwelwa, tyeni: Otse aakalele aahethi, twa longo shono ashike twa li tu na oku shi longa.” Ano aapiya yaKalunga kaye na okudhiladhila nando kutya otaya kwathele Kalunga sho taye mu longele. Mepingathano naashono, yo oye na okudhimbulukwa aluhe uuthembahenda mboka ye na oku mu galikana ye li iilyo yuukwanegumbo we iiyinekelwa.

Mbala sho Jesus a hokolola eudhi ndika otapu ya omutumwa. Okwa tumwa kuMaria naMarta, aamwayina aakiintu yaLasarus, mboka ya kala muBetania shomuJudea. “Omuwa, tala, oonguka u mu hole, ota alukwa,” omutumwa osho te mu lombwele.

Jesus ota yamukula ta ti: “Uuvu mbuno kau shi wokusa, owokusimanekitha Kalunga, Omuna gwaKalunga opo a simanekithwe kuwo.” Sho Jesus a kala po natango omasiku gaali mpoka e li, ota lombwele aalongwa ye ta ti: “Tu shuneni kuJudea.” Ihe otaye mu dhimbulukitha: “Rabbi, Aajuda opo yaa le ye ku dhenge nomamanya, noto yi ko ishewe!”

“Omutenya kagu na ootundi omulongo nambali?” Jesus osho te ya pula moku ya yamukula. “Oongoka te ende omutenya, iti ipumu, oshoka e lwete ko uuyelele wuuyuni mbuka. Ihe oongoka te ende uusiku, oye ti ipumu, oshoka ke na uuyelele muye.”

Osha yela kutya Jesus okwa hala okutya ‘ootundi dhomutenya,’ nenge ethimbo ndyoka Kalunga a gandja kuukalele waJesus wokombanda yevi, inadhi pwa ko natango, nokapu na ngoka ta vulu oku mu ningila uuwinayi manga ethimbo ndyoka inaali pwa ko. Ye oku na okulongitha okathimbo okafupi ‘komutenya,’ akehe hoka ke mu hupithilwa ko, molwashoka konima yethimbo “uusiku” otau ke ya, sho aatondi ye taya ka kala ye mu dhipaga.

Jesus ota gwedha ko ta ti: “Lasarus, kuume ketu, okwa kotha, ihe ongame tandi yi, ndi ke mu penduthe.”

Osha yela kutya aalongwa otaya dhiladhila kutya Lasarus okwa lala ta vululukwa moomposi naashika oshi li endhindhiliko ewanawa kutya ota ka aluka, notaye mu yamukula taya ti: “Omuwa, ngele a kotha, ota aluka.”

Opo nduno Jesus ote ya lombwele keenuhwenge ta ti: “Lasarus okwa si, ongame nonda nyanyukwa omolweni, sho nda adhika ndaa ko, opo mu itaale; ihe tu yeni kuye.”

Tomas oku shi shi kutya Jesus ota vulu okudhipagelwa muJudea, ihe nando ongaaka okwa hala oku mu ambidhidha, onkee ano ta ladhipike aalongwa ooyakwawo ta ti: “Natse wo tu yeni ko, tu ka sileni pamwe naye.” Ano aalongwa otaya tula oomwenyo dhawo moshiponga notaya yi pamwe naJesus molweendo nduka lwesilohenda okuya kuJudea. Lukas 13:22; 17:1-10; Johannes 10:22, 31, 40-42; 11:1-16.

▪ Openi Jesus a adhikile opo u uvitha?

▪ Omalongo geni Jesus te endulula, nonkalo yini ta hokolola ndjoka tayi vulu okuholoka po shili monkalamwenyo opo a yelithe oshitsa shini?

▪ Onkundana yini Jesus te etelwa, nokwa hala okutya shike shi na ko nasha ‘nomutenya nuusiku’?

▪ Tomas okwa hala okutya shike sho ta ti: ‘Tu yeni tu ka sileni pamwe naYe’?