Ontopolwa 65

Olweendo lwomeholamo okuya kuJerusalem

OSHO oshikufuthinge shokolundume lwevi shomo 32 E.N., nOshituthi shOmatsali oshi li popepi. Jesus okwa ngambekele unene iilonga ye muGalilea okuza pOpaasa yomo 31 E.N. sho Aajuda ya li ya kambadhala oku mu dhipaga. Otashi vulika okuza pethimbo ndyono Jesus a talele po owala Jerusalem okukala piituthi itatu yokomumvo yAajuda.

Ngashingeyi aamwayina yaJesus otaye mu ladhipike taya ti: “Inda, u ze po mpaka, ngu u ye kuJudea.” Jerusalem osho oshinenelando shaJudea nosho wo osentruma yelongelokalunga lyoshilongo ashihe. Aamwayina otaya tompathana taya ti: “Kaku na ngoka a hala a tseyike, ta longo sha meholamo.”

Nonando Jakob, Simon, Josef naJudas inayi itaala kutya omumwayinamati omukuluntu, Jesus, oye shili Messias, yo oya hala u ulike oonkondo dhe dhopashikumithalonga kwaayehe mboka ya li ya gongala poshituthi. Ihe Jesus okwa tseya kutya opu na oshiponga. “Uuyuni itau wapa oku mú tonda,” ye ta ti, “ihe ongame otau tondo ndje, oshoka otandi u hokolola nokutya [iilonga] yawo oyo iiwinayi.” Onkee ano Jesus ta lombwele aamwayinamati ta ti: “Ne indeni koshituthi, Ongame itandi yi manga koshituthi shika.”—KB.

Oshituthi shOmatsali osho oshituthi shomasiku gaheyali. Esiku etihetatu ohashi hulithwa nomaipyakidhilo ga mana mo. Oshituthi otashi ulike ehulilo lyomumvo gwuunamapya nolyo ethimbo lyenyanyu enene nolyomapandulo. Omasiku gamwe konima sho aamwayina yaJesus ya yi ya ka kale poshituthi pamwe naaendi oyendji, ye naalongwa ye otaya zi po meholamo opo aantu kaaye ya mone. Otaya yi nondjila ndjoka ya pita muSamaria, pehala lyayimwe ndjoka yi li popepi nomulonga gwaJordan ndjoka hayi longithwa koyendji.

Molwashoka Jesus pamwe nooyakwawo otaya ka pumbwa omahala gokukala momukunda gwaSamaria, ota tetekelitha aatumwa komeho oku ka ninga omalongekidho. Ihe aantu otaya tindi okuningila Jesus sha sho yu uvu kutya ye ota yi kuJerusalem. Jakob naJohannes otaya pula ya geya taya ti: “Omuwa, wa hala, tu ithane omulilo megulu gu ya lungunithe po?” Jesus ote ya ganda molwashoka taya dhiladhila oshinima sha tya ngaaka, notaya yi yu uka komukunda gulwe.

Manga taye ende mondjila, omunongoraamata ota ti kuJesus: “Omuhongi, onda hala oku ku landula shaa mpoka to yi.”

“Oombandje odhi na omakwena, noondhila dhokegulu odhi na iihandhila,” Jesus ta yamukula, “ihe Omuna gwOmuntu kee na mpo ta gwilike omutse gwe.” Jesus mpaka ota yelitha kutya omunongoraamata ota ka mona uudhigu ngele ta ningi omulanduli Gwe. Nosha yela kutya edhiladhilo olyo kutya omunongoraamata ota monika e na unene uuntsa okutaamba ko omukalo nguka gwonkalamwenyo.

Komulumentu gulwe Jesus ota ti: “Landula ndje.”

“Laleka ndje, manga, ndi ka fumvike tate,” omulumentu ta yamukula.

“Etha aasi ya fumvike aasi yawo,” Jesus ta yamukula, “ihe ngoye inda, u ku uvithe [uukwaniilwa waKalunga, KB].” Osha yela kutya he yomulumentu ina sa natango, molwashoka andola okwa li osho, ando omwana ina vula okukala mpaka ta pulakene kuJesus. Ano osha yela kutya omwana ota pula a pewe ethimbo opo a vule oku ka tegelela eso lyahe. Ina hala okupititha Uukwaniilwa waKalunga komeho monkalamwenyo ye.

Manga taya tsikile nondjila yokuya kuJerusalem, omulumentu gulwe ota ti kuJesus: “Omuwa, onda hala ndi ku landule, ihe etha ndje manga, ndi ka laleke mbeyaka ye li kegumbo.”

Jesus ote mu yamukula ta ti: “Kaku na omuntu a kwata noshikaha she oshipululitho e ta tala lwanima, ye kwo opalela ando [uukwaniilwa waKalunga, KB].” Mboka taya ka kala aalongwa yaJesus, oye na okutaalelitha omeho gawo kiilonga yUukwaniilwa. Ngaashi naanaa ofoola tayi vulu okukala ya golyoka ngele omupululi ita kala a tala komeho u ukilila, osho omuntu kehe ngoka ta tala konima konkalelo ndjika onkulu yiinima tashi vulika a pundukithwe mondjila ndjika tayi fala komwenyo gwaaluhe. Johannes 7:2-10; Lukas 9:51-62; Mateus 8:19-22.

▪ Aamwayina yaJesus oyo oolye, nohaye mu tala ko ngiini?

▪ Omolwashike mbela Aasamaria kaaye na omikalo, noshike Jakob naJohannes ya hala okuninga?

▪ Oonkundathana ndatu dhini Jesus e na mondjila, nongiini ta tsu omuthindo esimano lyiilonga yeiyambomwene?