Ontopolwa 47

Omahodhi taga shituka enyanyu enene

SHO Jairus e wete omukiintu ngoka e niwe ketiko lyombinzi a aluka, pwaahe na omalimbililo einekelo lye moonkondo dhaJesus dhokulonga iikumithalonga otali indjipala. Kuyele esiku ndyoka, Jairus okwa pulile Jesus e ye a kwathe okamwanakadhona okaholike koomvula 12 hoka ke li pokusa. Ihe ngashingeyi shoka Jairus a tila noonkondo otashi ningwa. Manga Jesus ta popi natango nomukiintu, otapu ya aalumentu yontumba notaya lombwele Jairus newi lya gundjila taya ti: “Omumwoye omukadhona okwa si, oshike to vulitha we omuhongi?”

Onkundana kayi shi tuu onkumithi! Dhiladhila owala: Omulumentu nguka, ngoka a simana noonkondo momudhingoloko gwe, ngashingeyi ke na we shoka ta vulu okuninga sho tu uvu eso lyokamwanakadhona. Ihe Jesus shoka tashi popiwa oku shi uvite. Ano ota pungulukile kuJairus nota ti neladhipiko: “Ino tila, shaa wi itaala.”

Jesus ota shuna pamwe nomulumentu ngoka a nika oluhodhi kegumbo lye. Sho taya thiki hoka, otaya adha ko euyagano enene lyaantu taya lili notaya takuma. Engathithi lyaantu olya gongala notayi inyanyagula ya nika oluhodhi olunene. Sho Jesus ta yi mo, ote ya pula ta ti: “Oshike tamu uyagana notamu lili? Okanona inaka sa, oka kotha.”

Sho aantu taye shi uvu, otaya tameke okuyola Jesus nondhino, oshoka oye shi shi kutya omukadhona okwa sa shili. Ihe Jesus ota ti kutya okwa kotha owala. Mokulongitha oonkondo dhe ndhoka a pewa kuKalunga, ye ote ku ulika kutya aantu otaya vulu okugalulwa kuusi nuupu ngaashi taya vulu okupenduthwa moomposi oondhigu.

Ngashingeyi Jesus ota laleke ayehe ya ye pondje kakele kaPetrus, Jakob, Johannes nahe nayina yomukadhona ngoka a sa. Opo nduno ota yi pamwe naambaka yatano moka mwa lala okanona. Jesus ote ka kwata koshikaha nota ti: “Talita kuum!” shoka ngele tashi tolokwa, tashi ti: “Omukadhona, otandi ku lombwele, penduka.” Nombalambala omukadhona ota penduka nota tameke okweenda! Aakuluntu ye sho ye shi mono oya kwatwa kehaluko omolwenyanyu enene.

Konima yoku ya lombwela kutya naya pe okanona sha shokulya, Jesus ota lombwele Jairus nomukulukadhi gwe yaa lombwele nando olye shoka sha ningwa po. Ihe mekondjithathano naashoka Jesus a popi, onkundana yaashika otayi taandele noshitopolwa shoka ashihe. Ndika olyo eyumuko etiyali ndyoka Jesus ta ningi. Mateus 9:18-26; Markus 5:35-43; Lukas 8:41-56.

▪ Onkundana yashike Jairus te etelwa, nongiini Jesus te mu ladhipike?

▪ Onkalo oyi li ngiini sho taya thiki pegumbo lyaJairus?

▪ Omolwashike Jesus ta ti kutya okanona hoka ka sa oka kotha owala?

▪ Yatano mboka ye li pamwe naJesus noye li oonzapo dheyumuko oyo oolye?