Ontopolwa 131

Omaihololo gahugunina nosho wo Opentekoste yomo 33 E.N.

POMPITO yontumba Jesus ota ningi omalongekidho opo aayapostoli ye ayehe 11 ya tsakanene naye pondundu yomuGalilea. Osha yela kutya aalongwa yalwe oya lombwelwa kombinga yokugongala huka naantu ye vulithe po 500 otaya gongala. Oshigongi shino itashi kala tuu shinyanyudha sho Jesus ta holoka e ta tameke oku ya longa!

Kakele kiinima yilwe, Jesus ota yelithile engathithi enene lyaantu kutya Kalunga okwe mu pa oonkondopangelo adhihe megulu nokombanda yevi. “Indeni ano,” ye ta kumagidha, “ka ningeni aantu ayehe aalongwa yandje noku ya [ninginithila, NW] medhina lyaTate nolyOmwana nolyOmbepo Ondjapuki, noku ya longa okudhiginina ayihe mbika nde yi mú lombwele.”

Dhidhiladhila owala kwaashika! Aalumentu, aakiintu naanona oya mono ayehe elombwelo ndino lya faathana okukala nombinga miilonga yokuninga aantu aalongwa. Aapataneki otaya ka kambadhala okukankeka iilonga yawo yeuvitho noyelongo, ihe Jesus ote ya hekeleke ta ti: “Tala, ongame ndi li pamwe nane omasiku agehe sigo ehulilo lyuuyuni.” Jesus ota kala pamwe naalanduli ye kekwatho lyombepo ondjapuki, oku ya kwathela ya gwanithe uukalele wawo.

Ayihe kumwe, Jesus ota holokele aalongwa ye uule womasiku 40 ga landula eyumuko lye e te yu ulukile kutya oku na omwenyo. Pethimbo lyomaihololo ngaka ote ya longo kombinga yUukwaniilwa waKalunga nota tsu omuthindo shoka shi li iinakugwanithwa yawo ye li aalongwa ye. Pompito yimwe oti ihololele nokuli omumwahe Jakob nota tompo nguno a li omukeeneitaalo kutya Oye shili Kristus.

Omanga aayapostoli ye li natango muGalilea, osha yela kutya Jesus ote ya lombwele ya shune kuJerusalem. Sho ta tsakanene nayo hoka, ote ya lombwele ta ti: “Inamu za mo muJerusalem, ihe tegeleleni egwanitho lyeuvaneko lyaTate, oondyoka mwe li uvu kungame. Oshoka Johannes okwa [ninginitha, NW] nomeya, ihe otamu ka [ninginithwa, NW] nOmbepo Ondjapuki, omasiku gamwe nge ga piti po.”

Konima Jesus ota gongala ishewe naayapostoli ye note ya kutha mo moshilando e ta yi pamwe nayo sigo okuBetania, shoka shi li kuuzilo wesilu lyondundu yOomono. Shikumitha, nonando e ya lombwela ashihe shi na ko nasha nokuya kwe megulu hoka ku li popepi, yo oyi itaala natango kutya Uukwaniilwa we otau ka dhikwa kombanda yevi. Onkee ano taya pula taya ti: “Omuwa, opethimbo tuu ndika to dhikile Israel [uukwaniilwa, KB]?”

Jesus pehala lyokukambadhala ishewe okwoopaleka euvoko lyawo lya puka, ote ya yamukula owala ta ti: “Kashi shi oshinima sheni okutseya omathimbo nenge ootundi ndhoka Tate e dhi pangulitha oonkondo dhe.” Opo nduno ota tsu ishewe omuthindo iilonga mbyoka ye na okulonga, ta ti: “One otamu [ka] pewa oonkondo, Ombepo Ondjapuki nge te ya mune, one notamu ka ninga oonzapo dhandje omuJerusalem nomuJudea nomuSamaria nosigo okooha dhuuyuni.”

Manga taye mu tala natango, Jesus ota tameke okulonda ta yi megulu nopo nduno oshikogo otashi mu siikile montaneho yawo. Konima sho i ihula olutu lwe lwopanyama, ota londo megulu e li omuntu gwopambepo. Manga mboka 11 taya ligamene natango kegulu, aalumentu 2 ya zala oonguwo oontokele otaye ya holokele. Aayengeli mbano ye na omalutu gopanyama otaya pula taya ti: “Aalumentu ne Aagalilea, oshike mwa thikama notamu tala kegulu? Jesus tuu nguka e mú kuthwa a yi megulu, osho tuu ngeyi ta galuka, ngaashi mwe mu mono a yi megulu.”

Momukalo moka Jesus opo a zi kevi, ina monika kaantu ayehe, ihe okwa monika owala kaalanduli ye aadhiginini. Ano osho naanaa ta ka galuka momukalo gwa faathana—ita monika kaantu ayehe, ihe aalanduli ye owala aadhiginini taya dhimbulula kutya okwa galuka nokwa tameka okukala po kwe moonkondo dhUukwaniilwa.

Ngashingeyi aayapostoli otaya londoloka kondundu yOomono, e taya taaguluka esilu lyaKidron notaya shuna ishewe muJerusalem. Otaya kala moka mokuvulika kelombwelo lyaJesus. Konima yomasiku omulongo, pOshituthi shOshijuda shOpentekoste mo 33 E.N., manga aalongwa 120 ya gongala mondjugo yopombanda muJerusalem, ombadhilila ewi lya fa oshihomo oshinene otali udha egumbo alihe. Omalaka ga fa gomulilo otaga monika, nakehe gumwe e li po ota lambelwa kulimwe naalongwa ayehe otaya tameke okupopya omalaka gi ili nogi ili. Shika osho etililo lyombepo ondjapuki ndjoka Jesus u uvaneke! Mateus 28:16-20; Lukas 24:49-52; 1 Aakorinto 15:5-7; Iilonga 1:3-15; 2:1-4.

▪ Oolye Jesus ta pe omalombwelo gahugunina kondundu yomuGalilea, nomalombwelo ngano ogeni?

▪ Ehekeleko lini Jesus ta pe aalongwa ye, nota ka kala pamwe nayo ethimbo li thike peni?

▪ Uule wethimbo li thike peni konima yeyumuko lye Jesus ti ihololele aalongwa ye, note ya longo shike?

▪ Omuntu guni ngoka sha yela kutya ka li natango omulongwa komeho yeso lyaJesus, Jesus ti ihololele?

▪ Omakugongala gaali gahugunina geni Jesus ta ningi naayapostoli ye, noshike tashi ningwa po poompito ndhino?

▪ Ongiini Jesus ta ka galuka momukalo gwa faathana naangoka a zi po?

▪ Oshike tashi ningwa pOpentekoste yomo 33 E.N.?