Ontopolwa 129

Omaihololo galwe gaJesus

AALONGWA oya teka natango omukumo. Kaye uvite natango kutya otashi ti shike sho ombila yi li owala, noinayi itaala shoka sha hokololwa kaakiintu. Onkee ano konima yethimbo mOsoondaha, Kleopas nomulongwa gulwe otaya zi muJerusalem taya yi kuEmaus, pu na oshinano shuule wookilometa 11 lwaampono okuza mpoka.

Mondjila manga taya kundathana iiningwanima yesiku, puyo otapu ya omukwiilongo. “Otamu kundathana shike mokweenda kweni?” osho te ya pula.

Aalongwa otaya thikama, iipala yawo ya polimana, Kleopas nota yamukula ta ti: “Ongoye awike omukwiilongo wa menekela muJerusalem, inoo uva mbyoka ya ningilwa mo pomasiku ngaka?” Ote mu pula ta ti: “Oshike?”

“Ooshika sha [ningilwa] Jesus Omunasaret,” taya yamukula. “Aasaseri aakuluntu naapangeli yetu nkene ye mu gandja, a pangulwe, a ka se, noye mu alele [koshiti shomahepeko]. Ihe otse twa li twe mu inekela nokutegelela, oye oonguka e na okukulila Aaisrael.”

Kleopas namukwawo otaya yelitha iiningwanima iikumithi yesiku ndyoka—sha hala okutya, ehokololoningomwa kutya aayengeli oya monika shoka kaashi li paunshitwe nosho wo ombila yi li owala—nopo ihe otaya zimine okwaauva ko kwawo shoka iinima mbika tayi ti. Omukwiilongo ote ya pukulula ta ti: “Yayee, one [aagoya] naanye koomwenyo okwiitaala ayihe mbyoka aaprofeti ye yi popi. Hayo tuu mbyoka Kristus okwa li e na oku yi humbata nokuya mesimano lye?” Opo nduno ote ya fatululile iitopolwa yomomanyolo omayapuki ngoka taga popi Kristus.

Lwahugunina otaya thiki popepi naEmaus nomukwiilongo ota ningi a fa ta pitilile po. Aalongwa oya hala okuuva oshindji natango notaye mu ladhipike taya ti: “Kala putse, ongulohi nokuli netango olyo ndyoka tali yi mo.” Onkee tali uulalelo puyo. Sho ta galikana naashono ta pambula oshikwiila e te shi ya pe, otaya dhimbulula kutya oye shili Jesus e li molutu lwopantu. Opo nduno ota nena po.

Ngashingeyi oyu uvite ko kutya omolwashike omukwiilongo e shi unene oshindji! Otaya pula taya ti: “Katwa li tu na ehwamo moomwenyo dhetu, sho a popi natse mondjila nokwe tu fatululile omanyolo?” (OB-1986) Otaya thikama itaaya kakadhala nando e taya shuna kuJerusalem neendelelo, hoka ya adha aayapostoli naamboka ya gongala pamwe nayo. Manga Kleopas namukwawo inaaya tya sha, yalwe otaya hokolola ya tuntukwa taya ti: “Omuwa okwa yumuka shili nokwa monika kuSimon!” Opo nduno yaali otaya hokolola nkene Jesus e yi ihololele wo. Shika osho oshikando oshitine ti ihololele aalongwa ye yi ili noyi ili mesiku ndyoka.

Jesus ota holoka ombadhilila oshikando oshititano. Nokuli nonando omiyelo odha patwa molwashoka aalongwa oya tila Aajuda, ote ya mo nota thikama mokati kawo e ta ti: “Ombili nayi kale nane!” Oya tila noonkondo oshoka otaya dhiladhila kutya oye wete ombepo. Onkee ano Jesus ta yelitha kutya ye ke shi ombepo, ta ti: “Oshike mwa tila ngeyi, noshike omadhiladhilo ga tya ngaaka ga penduka moomwenyo dheni? Taleni iikaha yandje noompadhi dhandje, mu dhimbulule, ongame mwene ndi li po. Gumii ndje, ne mu tale, oshoka ombepo kayi na ontumba nomasipa, ngaashi mwa tala ndje ndi ga na.” Natango oya nyengwa oku shi itaala.

Oku ya kwathela opo yu uve ko kutya oye shili Jesus, ote ya pula ta ti: “Omu na tuu sha shokuliwa?” Konima yokutaamba okantumba kohi ka yothwa e te ka li, ota ti: “Oyo mbika nde yi popi moohapu ndhoka nde dhi mu lombwele, manga nda li pune [manga inaandi sa], sho nda tile, ayihe mbyoka ya shangelwa ndje mompango yaMoses nomooprofeti nomomapsalmi, oyi na okugwanithwa.”

Muushili wo wene, Jesus ota ningi shoka sha fa ekonakonombimbeli e te ya longo ishewe ta ti: “Osho dha shangwa, Kristus kwa li e na okuhepekwa nokuyumuka kuusi esiku etitatu nomedhina lye eitedhululo lyedhimopo lyoondjo oli na okuuvithilwa iigwana ayihe nokutameka muJerusalem. One aahokololi yaambika ayihe.”

Molwetompelo lyontumba Tomas ke po pokugongala huka kwa simana noonkondo kwomOsoondaha kongulohi. Onkee ano omasiku taga landula, yalwe otaye mu lombwele nenyanyu taya ti: “Otse twa mono Omuwa!”

“Ngele itandi mono ooshaho dhoondungo miikaha ye,” Tomas ta tindi, “noitandi tsu mo [omunwe] gwandje mooshaho dhoondungo noshikaha shandje molupati lwe, kandi itaale.”

Konima yomasiku gahetatu, aalongwa otaya gongala ishewe mongulu. Oshikando shino Tomas oku li pamwe nayo. Nonando omiyelo odha patwa, Jesus ota thikama ishewe mokati kawo nota ti: “Ombili nayi kale nane!” Opo nduno ota pungulukile kuTomas, e te mu lombwele ta ti: “Ganeka omunwe gwoye, nkuka, ngu u tale iikaha yandje, ngu u ganeke oshikaha shoye, ngu u shi tse molupati lwandje, ngoye ino kala waa na eitaalo.”

“Omuwa gwandje noKalunga kandje!” Tomas ti igidha.

“Oshoka wa mono ndje, wi itaale”? Jesus ta pula. “Aanelago oomboka inaa mona noyi itaala.” Lukas 24:11, 13-48; Johannes 20:19-29.

▪ Omapulo geni omukwiilongo ta pula aalongwa yaali mboka ye li mondjila taya yi kuEmaus?

▪ Omukwiilongo ota popi shike shoka tashi hwamitha omitima dhaalongwa?

▪ Aalongwa otaya dhimbulula ngiini kutya omukwiilongo oye lye?

▪ Sho Kleopas namukwawo ya shuna kuJerusalem, ehokololo etuntuli lini tayu uvu?

▪ Eihololo etitano olini Jesus ti ihololele aalongwa ye noshike tashi ningwa po pethimbo lyalyo?

▪ Oshike tashi ningwa po konima yomasiku gahetatu gokwiiholola kwaJesus okutitano, nongiini lwahugunina Tomas a tompwa i itaale kutya Jesus oku na omwenyo?