Ontopolwa 1

Omatumwalaka taga zi megulu

DHOSHILI, Ombimbeli ayihe oyo etumwalaka lya za megulu ndyoka Tate yetu gwomegulu e tu pa yi tu longe. Ihe oomvula 2 000 lwaampono dha piti opwa gandjelwe omatumwalaka gaali gi ikalekelwa komuyengeli ngoka ha “thikama koshipala shaKalunga.” Edhina lye oGabriel. Natu konakoneni oonkalo dhokuya huka kwa simana kwopaali kombanda yevi.

Omumvo ogwo 3 K.E.N. Kiikulundundu yaJudea, tashi vulika kaaku shi kokule unene okuza kuJerusalem, okwa kala omusaseri gwaJehova gwedhina Sakaria. Ye nomukiintu gwe Elisabet oya kulupa. Nokaye na aanona. Sakaria ota longo iilonga ye yuusaseri palufo lwe motempeli yaKalunga muJerusalem. Ombaadhilila Gabriel ota holoka kombinga yokolulyo lwoshiyambelo hoka haku ningilwa omatsinino.

Sakaria okwa tila noonkondo. Ihe Gabriel ote mu kumike ta ti: “Sakaria, ino tila, egalikano lyoye olyu uvika, nomukiintu gwoye Elisabet ote ku valele okamati, e to ka luku Johannes.” Gabriel ota tsikile ta tseyitha kutya Johannes ota “ningi omunene koshipala shOmuwa,” nonokutya ye ota ka ‘longekidhila Omuwa oshigwana sha pwa.’

Ihe Sakaria ita vulu oku shi itaala. Otashi monika unene sha fa itaashi wapa opo ye naElisabet ya vule okumona okanona methimbo lyuukulupe wawo. Onkee ano Gabriel ote mu lombwele ta ti: “Ngoye oto thiti [ewi], ito wapa okupopya sigo esiku ndyoka shino tashi ningwa, oshoka wa dhini oohapu ndhoka dhandje.”

Pokati mpono, aantu mboka ye li pondje otayi ipula kutya omolwashike Sakaria a kala mo ethimbo ele unene motempeli. Lwahugunina sho ta zi mo, ita vulu okupopya ihe ota vulu owala okuudhika niikaha ye, notaya mono kutya okwa mona sha shaa shi shopaunshitwe.

Sakaria konima sho ethimbo lye lyokulonga motempeli lya pu ko, ota shuna kegumbo. Nombalambala konima yaashono, otashi ningwa shili—Elisabet ota ningi omusimba! Manga Elisabet a tegelela okumona okanona ke, ota kala megumbo uule woomwedhi ntano inaa za mo.

Konima yethimbo Gabriel ota holoka ishewe. Ota popi nalye mbela? Onomukiintu omugundjuka inaa hokanwa gwedhina Maria a za momukunda gwaNasaret. Etumwalaka lyashike e eta oshikando shino? Pulakena! “Ongoye wa [silwohenda] kuKalunga,” Gabriel ta lombwele Maria. “Tala, ngoye to ningi omusimba e to vala okamati, ngoye u na oku mu luka Jesus.” Gabriel ota tsikile ta ti: “Oye ta kala omunene, ye e na okwiithanwa Omuna gwOkombandambanda, . . . ota ningi omukwaniilwa gwegumbo lyaJakob sigo aluhe, nuukwaniilwa we kau na mpoka tau hulu po.”

Otatu vulu okukala nuushili kutya Gabriel okwa li e shi tala ko shi li uuthembahenda okugandja omatumwalaka ngaka. Nuuna tatu lesha oshindji kombinga yaJohannes naJesus, otatu ka mona sha yela nawa kutya molwashike omatumwalaka ngaka ga za megulu ga simana noonkondo. 2 Timoteus 3:16; Lukas 1:5-33.

▪ Omatumwalaka gaali geni ga simana taga gandjwa okuza megulu?

▪ Olye ta gandja omatumwalaka ngoka, noolye taye ga pewa?

▪ Omolwashike omatumwalaka omadhigu noonkondo okwiitaalwa?