Ontopolwa 8

Ompangela yomukwanyanya oya ponyo

JOSEF ota pendutha Maria oku mu hokololela onkundana ya simanenena. Omuyengeli gwaJehova opo owala a li e mu holokele nokwa ti: “Thikama, kutha okanona nayina, u tembukile kuEgipiti, ngu u kale ko sigo tandi ku lombwele; oshoka Herodes e li po ta dhiladhila okukonga okanona, e ka dhipage.”

Mbaka yatatu oya yi ontuku nziyanziya. Nosha li naanaa pethimbo, oshoka Herodes okwa mono kutya aayanekelinyothi oye mu kotokele e taya zi mo moshilongo. Dhimbulukwa kutya, oya li ye na okushuna kuye ngele ya mono Jesus opo ye ke shi mu hokololele. Herodes okwa geye nokugeyelela. Onkee ano monkambadhala ye yokudhipaga Jesus, ta gandja elombwelo kutya uumatyona auhe womimvo mbali nosho wo mbono uushuushuka muBetlehem nomomikunda dhasho ou na okudhipagwa. Oomvula ndhika okwe dhi yalula pauyelele mboka a pelwe nale kaayanekelinyothi mboka ya zile kUuzilo.

Edhipago lyuunona auhe uumati kalya li tuu enyanyalithi! Aakwiita yaHerodes oyi iteyele megumbo negumbo. Nongele taya adha mo okanona kokamati, otaye ka akula mo mekolo lyayina. Tse katu shi wo kutya oya dhipaga uunona ungapi, ihe elilagano enene neyayagano lyooyina otayi gwanitha ehunganeko lyomOmbimbeli ndyoka lya popiwa komuprofeti gwaKalunga Jeremia.

Lwopokati mpono, Josef nuukwanegumbo we oya thiki nawa kuEgipiti, nongashingeyi oya kala moka. Ihe uusiku umwe omuyengeli gwaJehova ota holokele ishewe Josef mondjodhi. “Thikama, kutha okanona nayina,” omuyengeli ta ti, “ngu ye kevi lyaIsrael, oshoka mbeyaka kwi ya langele omwenyo gwokanona, oya sa.” Onkee ano mokugwanitha ehunganeko lilwe lyOmbimbeli ndyoka tali ti kutya Omwana gwaKalunga okwi ithanwa muEgipiti, uukwanegumbo otau galukile koshilongo shoyaandjawo.

Osha yela kutya Josef okwa hala a kale muJudea, mondoolopa yaBetlehem, moka ya li ya kala manga inaaya ya ontuku kuEgipiti. Ihe otu uvu kutya omwanamati gwaHerodes omukolokoshi Arkelaos ngashingeyi oye omukwaniilwa gwaJudea, nomondjodhi onkwawo Jehova ote mu londodha shi na ko nasha noshiponga shoka. Onkee ano Josef nuukwanegumbo we taya yi kuumbangalantu e taya tula mondoolopa yaNasaret muGalilea. Momudhingoloko nguka moka mwa kokela Jesus, ogu li kokule nondingandinga yelongelokalunga lyOshijuda. Mateus 2:13-23; Jeremia 31:15; Hosea 11:1.

▪ Oshinima oshinyanyalithi shini omukwaniilwa Herodes ta ningi sho aayanekelinyothi inaaya galuka we, ihe ongiini Jesus ta gamenwa?

▪ Omolwashike Josef sho a galuka kuEgipiti itaa kala we muBetlehem?

▪ Omahunganeko gOmbimbeli geni ga gwanithwa muulethimbo mbuno?