Ontopolwa 69

Ompata kutya he oye lye

PETHIMBO lyoshituthi, oonkundathana dhaJesus naawiliki yAajuda otadhi pimbile. “Ongame ndi shi shi, one oluvalo lwaAbraham,” Jesus osho ta zimine, “ihe omwa hala okudhipaga ndje, oshoka oohapu dhandje kadhi mono eha mune. Ongame tandi popi shono nde shi mono puTate; nane wo longeni shono mwe shi uvu kuho.”

Nonando Jesus ite ya lombwele kutya he yawo oye lye, ote shi yelitha kutya he nahe yawo ke shi gumwe. Aawiliki Aajuda nokaaye shi kutya Jesus okwa dhiladhila lye, otaya yamukula taya ti: “Abraham oye tate.” Otaya dhiladhila kutya yo oye na eitaalo lya faathana nolyaAbraham, ngoka a li kuume kaKalunga.

Ihe Jesus ote ya halukitha neyamukulo ndika: “Ando one aana yaAbraham, andola hamu longo iilonga yaAbraham.” Dhoshili, omwana gwashili oha holele he. “Ihe ngashingeyi otamu kongo okudhipaga ndje,” Jesus ta ti, “omulumentu, nde mú lombwele oshili nde yi uvu muKalunga. Abraham ina ninga ngeyi.” Opo nduno Jesus ota ti ishewe: “One hamu longo iilonga yaho yeni.”

Natango kaye uvite ko kutya Jesus ota popi lye. Otaya tsikile okutya kutya yo oye li shili oyana yaAbraham notaya ti: “Otse inaatu valwa moluhondelo.” Omolwashoka taya ti kutya yo aagalikani yashili ngaashi Abraham, otaye shi koleke mokutya: “Otu na tate gumwe, oKalunga.”

Ihe Kalunga oye mbela lelalela He yawo? “Ando Kalunga ho yeni,” Jesus ta yamukula, “andola mu hole ndje, oshoka ongame nda zi muKalunga, nonde ya nda za kuye; ongame inaandi za mungame mwene, ihe oye a tumu ndje. Oshike kamu uvite ko elaka lyandje?”

Jesus okwa kambadhala okuulikila aawiliki yelongelokalunga mbaka iilanduliko molwoku mu ekelahi kwawo. Ihe ngashingeyi ota popi shu ukilila ta ti: “One mu na ho yeni, ondiaboli, nuuhalu waho yeni mwa hala oku u gwanitha.” Ondiaboli mbela ohe a tya ngiini? Jesus oku ulike kutya oye omudhipagi nokwa ti wo: “Oye omufundja nahe yiifundja ayihe.” (OB-1986) Onkee ano Jesus ta hulitha ta ti: “Oongoka gwomuKalunga, oye tu uvu oohapu dhaKalunga. Onkee ano itamu dhi uvu, oshoka one kamu shi yomuKalunga.”

Aajuda ya geyithwa komunyanena gwaJesus, otaya yamukula taya ti: “Itatu popi ando dhoshili, sho tatu ti; ongoye Omusamaria nowa kwatwa kompwidhuli?” Oshitya “Omusamaria” ohashi longithwa shi li uutumbulilo wondhino nowokuula aantu nayi, oshoka Aasamaria oyo oshigwana shoka shi tondike kAajuda.

Jesus oti ipwililikile epopyo lyondhino kutya ye Omusamaria nota yamukula ta ti: “Inaandi kwatwa kompwidhuli, ihe otandi simaneke Tate, one notamu sheke ndje.” Opo nduno Jesus ota ningi euvaneko ekumithi ta ti: “Ngele pe na ngoka ta dhiginine oohapu dhandje, oye ke na mpoka ta ka mona eso sigo aluhe.” Dhoshili, Jesus ina dhiladhila kutya ayehe mboka taye mu landula itaya ka sa nando eso lyo lyene. Mepingathano naashono, ye okwa hala okutya itaya ka hanagulwa po nando sigo aluhe, nenge itaya ka mona “eso etiyali” moka itaaya ka yumuka we.

Ihe Aajuda oohapu dhaJesus otaya dhiladhila kutya otadhi popi okwaahasa kwolela. Onkee ano taya ti: “Ngashingeyi tu shi shi, ompwidhuli oyi ku na. Abraham oye a sa naaprofeti, ihe ongoye oto ti: Ngele pe na ngoka ta dhiginine oohapu dhandje, oye ke na mpoka ta ka makela mo eso sigo aluhe. Ongoye u vule andola tate Abraham, oongoka a sa. Naaprofeti oya sa; ongoye to iningi lye?”

Moonkundathana adhihe ndhika, osha yela kutya Jesus otu ulukile aalumentu mbaka kutya oye Messias omuuvanekwa. Ihe pehala lyokuyamukula shu ukilila epulo lyawo li na ko nasha nokutya oye lye, Jesus ota ti: “Ongame andola tandi isimaneke, ando esimano lyandje olyowala. Tate oye nguka tamu ti, oye Kalunga keni, [oye ota simaneke ndje, OB-1986] one nokamu mu shi; ihe ongame ondi mu shi. Ando ndi tye, kandi mu shi, ando ongame omufundja ngashika one.”

Opo nduno Jesus otu ulike ishewe komudhiginini Abraham ta ti: “Abraham, oho, okwa ligolele okumona esiku lyandje; oye kwe li mono nokwa nyanyukwa.” Eeno, Abraham okwa tala nomeho gopaitaalo kokuya kwaMessias omuuvanekwa. Aajuda otaya yamukula inaaye shi itaala taya ti: “Oomvula dhoye inaadhi adha nando komilongo ntano, nowa mono Abraham!”

“Oshili, oshili tandi mú lombwele,” Jesus ta yamukula, “manga Abraham kwa li ina valwa, ongame nda li ko.” Dhoshili, Jesus ota popi kombinga yokukala po kwe manga inaa ninga omuntu e li omuntu omunankondo gwopambepo megulu.

Aajuda oya geyela okupopya kwaJesus kutya ye oko a kala manga Abraham inaa valwa, notaya toola omamanya ye mu dhenge. Ihe ota holama nota zi mo motempeli inaa mona oshiponga. Johannes 8:37-59; Ehololo 3:14; 21:8.

▪ Jesus otu ulike ngiini kutya he ye noyaatondi ye ke shi gumwe?

▪ Otashi ti shike sho Aajuda tayi ithana Jesus Omusamaria?

▪ Jesus okwa hala okutya shike sho ta ti kutya aalanduli ye itaya ka mona eso?