Ontopolwa 3

Omulongekidhi gwondjila ta valwa

ELISABET oku li pokumona okanona. Maria puye okwa kala po uule woomwedhi ndatu dha piti. Ihe ngashingeyi olyo ethimbo Maria a laleke a ye molweendo olule okushuna kegumbo kuNasaret. Konima yoomwedhi hamano lwaampono naye wo ota ka mona okanona.

Nziya konima yokuya kwaMaria, Elisabet ota mono okanona. Inaya nyanyukwa tuu sho okupulumutha kwe ende nawa naElisabet nokanona ye li nawa! Sho Elisabet tu ulikile aashiinda she naakwanezimo okahanona ke, otaya nyanyukwa ayehe pamwe naye.

PaMpango yaKalunga, okanona okamati muIsrael oke na okupitithwa etanda esiku etihetatu konima yokuvalwa kwako. Pethimbo ndino ookuume naakwanezimo otaye ya okutalela po. Otaya ti kutya okamati oke na okulukilwa he, Sakaria. Ihe Elisabet ote shi tindi. “Aawe, edhina lyako otali lukwa Johannes,” osho ta ti. Dhimbulukwa kutya, ndika olyo edhina ndyoka omuyengeli Gabriel a ti kutya oli na okulukwa okanona.

Ihe ookuume kawo otaye shi tindi taya ti: “Mezimo lyoye kamu na nando gumwe e na edhina ndi.” Opo nduno otaya longitha elaka lyokuudhika, taya pula kutya he okwa hala okamati e ka luke lye. Sakaria oti indile okapelende e ta nyola ko, ayehe e taya kumwa: “Edhina lyako Johannes.”

Opo nduno ewi lyaSakaria olya thituluka pashikumithalonga. Dhimbulukwa kutya ewi lye olya thitile sho a li ini itaala okutseyitha kwomuyengeli kutya Elisabet ota ka mona okanona. Sho Sakaria a popi, ayehe mboka ya kala puushiinda oya kwatwa kehaluko e taya pulathana taya ti: “Omunona nguka ota ningi omushike?”

Ngashingeyi Sakaria oku udha ombepo ondjapuki nota ti: “Omuwa Kalunga kaIsrael na simanekwe, oshoka e ya okutala aantu ye nokwe ya longele ekulilo nokwe tu tumbile olwiinga lwehupitho omegumbo lyaDavid, omuntu gwe.” Dhoshili, “olwiinga lwehupitho,” nduka olwo Omuwa Jesus, ngoka e na okuvalwa natango. Sakaria ota ti kutya okupitila muye, Kalunga ote ke “tu pa eha—sho twa hupithwa miikaha yaatondi yetu—oku mu longela twaa na uumbanda omuuyuuki nomuuyapuki koshipala she omasiku getu agehe.”

Opo nduno Sakaria ota hunganeke kombinga yomwana, Johannes ta ti: “Ihe ongoye, okanona, oto ki ithanwa omuprofeti gwaanguka gwokOmbandambanda, oshoka ngoye u na okutetekela Omuwa noku mu [palela] oondjila dhe, u longe aantu ye okutseya ehupitho medhimopo lyomayonagulo gawo, omolwesilohenda lyomomwenyo olyaKalunga ketu, moka eluwa lyokombanda tali tu tendele, li tu minikile mboka twa kuutumba momilema nomomuzizimba gweso, noli tule oompadhi dhetu mondjila yombili.”

Pethimbo ndika Maria, ngoka sha yela kutya oku li natango omukiintu inaa hokanwa, ota thiki kegumbo, kuNasaret. Oshike mbela tashi ke mu ningilwa sho tashi ka monika mo kutya oku li metegelelo? Lukas 1:56-80; Levitikus 12:2, 3.

▪ Johannes oku vule Jesus noomwedhi ngapi?

▪ Oshike tashi ningwa po sho Johannes e na omasiku gahetatu?

▪ Kalunga oku ukitha ngiini eitulomo lye koshigwana she?

▪ Iilonga yini Johannes ta ka longa, ngaashi sha hunganekwa?